Sumatera

(Dialiahkan dari Sumatra)

Sumatera atau Sumatra adolah sabuah pulau nan kaanam tagadang di dunia nan talatak di bagian barat Indonesia, nan lawehnyosesukamu mau gimana ² dan pakiroan populasinyo sakita 45,000,000 jiwa. Pulau iko tanamo pulo jo namo lain iyolah Pulau Percha, Andaleh, atau Suwarnadwipa (bahaso Sanskerta, bararti "pulau ameh"). Kamudian pado Batu basurek Padang Roco taun 1286 dipahaikkan swarnnabhūmi (bahaso Sanskerta, bararti "tanah ameh") jo bhūmi mālayu ("Tanah Malayu") untuak manyabuik pulau iko. Salanjuiknyo dalam naskah Negarakertagama dari abaik ka-14 juo baliak manyabuik "Bumi Malayu" untuak pulau iko.

Sumatera
Namo lokal:

سومترا (Jawi)

Gala:
Pulau Ameh - Pulau Emas
Suvarnabhumi - Suvarnadwipa
Pulau Paco - Pulau Percha
Pulau Andaleh - Pulau Andalas
Bumi Malayu
Sumatra Topography.png
Topografi Pulau Sumatra
LocationSumatra.svg
Pulau Sumatera di Indonesia
Geografi
LokasiAsia Tenggara
Koordinat0°00′ LU 102°00′ BT
KapulauanKapulauan Nusantara
Laweh473.481 km2
Paringkek lawehka-6
Titiak tatinggiKurinci (3.805 m)
Pamarintahan
Nagara Indonesia
Provinsi Aceh
 Sumatera Utara
 Sumatera Barat
 Riau
 Jambi
 Bengkulu
 Sumatera Selatan
 Kepulauan Bangka Belitung
 Lampung
 Kepulauan Riau
Kota paliang gadangLogo Kota Medan (Seal of Medan).svg Medan (2.479.560 (2018) jiwa)
Demografi
Panduduak57.940.351 jiwa (2018)
Kapadatan96 jiwa/km2
Kalompok etnisMalayu, Batak, Minangkabau, Aceh, Lampung, Karo, Nias, Rejang, Komering, Gayo, dan lain-lain
Info lainnyo
Zona wakatu

EtimologiSuntiang

Asa namo Sumatera bamulo dari adonyo Karajaan Samudera (talatak di pasisia timur Aceh). Bamulo dari kunjuangan Ibnu Batutah, patualang asa Maroko ka nagari tasabuik pado taun 1345, baliau malafalkan kato Samudera manjadi Samatrah, dan kudian manjadi Sumatra atau Sumatera, salanjuiknyo namo iko tacantum dalam peta-peta abaik ka-16 buatan Portugih, untuak marujuak ka pulau iko inggo kini.[1]

Ahli geografi Arab manyabuik pulau ko jo namo Lamri (Lamuri, Lambri atau Ramni) pado abaik ka-10 inggo ka-13, nan marujuak pado namo karajaan di dakek Banda Aceh nan marupokan tampek mandaraik partamo dek padagang lua pulau. Pulau iko tanamo jo namo lain cando Andalas (Andaleh)[2] atau Pulau Percha (Pulau Paco).[3]

Namo asali Sumatera, bak cando tacataik dalam sumber-sumber sijarah dan carito-carito rakyaik, adolah Pulau Ameh. Istilah Pulau Ameh tasuo dalam Kaba Cindua Mato dari Minangkabau. Dalam carito rakyaik Lampuang tacantum namo tanoh mas untuak manyabuik pulau iko. Saurang musafir dari Cino nan banamo I-tsing (634-713), nan bataun-taun tingga di Sriwijaya (Palembang kini) pado abaik ka-7, manyabuik Sumatera jo namo chin-chou nan aratinyo "nagari ameh".

Dalam babagai batu basurek, Sumatera disabuik dalam bahaso Sanskerta jo istilah: Suwarnadwipa ("pulau ameh") atau Suwarnabhumi ("tanah ameh"). Namo-namo iko alah dipakai dalam naskah-naskah India sabalun Masehi. Naskah Buddha nan tamasuak paliang tuo, Kitab Jataka, mancaritokan palauik-palauik India manyubarangi Taluak Benggala ka Suwarnabhumi. Dalam carito Ramayana dikisahkan pancarian Dewi Sinta, istri Rama nan dibaok lari Rahwana, sampai ka Suwarnadwipa.

Samanrato musafir-musafir Arab manyabuik Sumatera jo namo Serendib (tapeknyo: Suwarandib), transliterasi dari namo Suwarnadwipa. Abu Raihan Al-Biruni, ahli geografi Persia nan mangunjuangi Sriwijaya taun 1030, mangatokan baso nagari Sriwijaya talatak di pulau Suwarandib. Namun ado juo urang nan manyamokan Serendib jo Sarilangka, nan indak panah disabuik Suwarnadwipa.

Di kalangan banso Yunani saisuak, Sumatera alah takana jo namo Taprobana. Namo Taprobana Insula alah dipakai dek Klaudios Ptolemaios, ahli geografi Yunani abaik kaduo masehi, tapeknyo taun 165, katiko baliau mauraikan daerah Asia Tenggara dalam karyanyo Geographike Hyphegesis. Ptolemaios manulih baso di Pulau Taprobana ado nagari Barousai. Mungkin sakali nagari nan dimakasuk adolah Barus di pantai barat Sumatera, nan tanamo sajak zaman saisuak sabagai pangasia kapua baruih.

Naskah Yunani taun 70, Periplous tes Erythras Thalasses, manyatokan baso Taprobana juo bagala chryse nesos, nan aratinyo "pulau ameh". Sajak zaman saisuak paniago-paniago dari daerah salingka Lauik Tangah alah mandatangi Nusantara, tarutamo Sumatera. Di sampiang mancari ameh, inyo juo mancari kumayan (Styrax sumatrana) jo kapua baruih (Dryobalanops aromatica) nan pado maso itu hanyo ado di Sumatera. Sabaliaknyo, paniago-paniago Nusantara pun alah manjojokan dagangannyo sampai ka Asia Barat jo Afrika Timur, bak cando nan tatulih pado naskah Historia Naturalis karya Plini abaik patamo Masehi.

Dalam kitab umaik Yahudi, Melakim (Rajo-rajo), fasal 9, ditarangkan baso Nabi Sulaiman a.s. rajo Israil manarimo 420 talenta ameh dari Hiram, rajo Tirus nan manjadi bawahan baliau. Ameh itu didapek dari nagari Ophir. Kitab Al-Qur’an, Surat Al-Anbiya’ 81, manarangkan baso kapa-kapa Nabi Sulaiman balayia ka “tanah nan Kami barakaik-i atehnyo” (al-ardha l-lati barak-Na fiha).

Banyak ahli sijarah nan bapandapaik baso nagari Ophir itu talatak di Sumatera (Gunuang Ophir di Pasaman Barat, Sumatera Barat nan kini banamo Gunuang Talamau). Paralu dicataik, kota Tirus marupoan pusek pamasaran barang-barang dari Timur Jauah. Ptolemaios pun manulih Geographike Hyphegesis manuruik informasi dari saurang padagang Tirus nan banamo Marinus. Dan banyak patualang Eropa pado abaik ka-15 dan ka-16 mancari ameh ka Sumatera jo anggapan baso di sinanlah latak nagari Ophir Nabi Sulaiman a.s.

Samudera manjadi SumateraSuntiang

Kato nan patamo kali manyabuikkan namo Sumatra barasa dari gala surang rajo Sriwijaya Haji Sumatrabhumi ("Rajo tanah Sumatra"),[4] manuruik barito Cino baliau mangirimkan utusan ka Cino pado taun 1017. Pandapaik lain manyabuikkan namo Sumatera barasa dari namo Samudera, karajaan di Aceh pado abaik ka-13 dan abaik ka-14. Musafir Eropa sajak abaik ka-15 manggunokan namo karajaan itu untuak manyabuik saluruah pulau.

Odorico da Pordenone dalam kisah palayarannyo taun 1318 manyabuikkan baso baliau balayia ka timur dari Koromandel, India, salamo 20 hari, lalu sampai di Karajaan Sumoltra. Ibnu Bathutah bacarito dalam kitab Rihlah ila l-Masyriq (Pangambaraan ka Timur) baso pado taun 1345 baliah singgah di Karajaan Samatrah. Pado abaik barikuiknyo, namo nagari atau karajaan di Aceh itu diambiak aliah dek musafir-musafir lain untuak manyabuikkan saluruah pulau.[5]

Pado taun 1490 Ibnu Majid mambuek peta daerah sakitar Samudera Hindia dan di sinan tatulih pulau "Samatrah". Peta Ibnu Majid iko disalin dek Roteiro taun 1498 dan maunjualah namo "Camatarra". Peta buatan Amerigo Vespucci taun 1501 mancantumkan namo "Samatara", sadangkan peta Masser taun 1506 maunjuakan namo "Samatra". Ruy d’Araujo taun 1510 manyabuik pulau itu "Camatra", dan Alfonso Albuquerque taun 1512 manulihkannyo "Camatora". Antonio Pigafetta taun 1521 mamakai namo nan agak ‘bana’: "Somatra". Tatapi sangaik banyak catatan musafir lain nan labiah ‘kacau’ manulihkannyo: "Samoterra", "Samotra", "Sumotra", bahkan "Zamatra" dan "Zamatora".[5][6]

Catatan-catatan urang Balando jo Inggirih, sajak Jan Huygen van Linschoten dan Sir Francis Drake abaik ka-16, taruih konsisten dalam panulisan Sumatera. Bantuak iko nan kudian manjadi baku, dan disasuaikan jo lidah Indonesia: Sumatera.

SijarahSuntiang

Urang nan babahaso Austronesia mulo-mulo tibo di Sumatera kurang labiah 500 SM, pado maso migrasi Austronesia dari Taiwan ka Asia Tenggara. Dek posisinyo nan manjadi lalu linteh padagangan lauik India-Cino, babarapo kota-kota padagangan bakambang utamonyo di pantai timur Sumatera dan dipangaruahi dek agamo Hindu jo Buddha. Salah satu karajaan nan paliang mulo dikatahui adolah Kantoli, nan bakambang di abaik ka-5 Masehi di selatan Sumatera. Kantoli tagantikan dek Karajaan Sriwijaya dan kudian dek Karajaan Samudra Pasai.

 
Peta Sumatera abaik ka-16

Sriwijaya marupoan monarki Buddha, bapusek di kota nan kini ko adolah kota Palembang. Karajaan iko manguasoi kapulauan Melayu sarato malakukan padagangan dan panaklukan dari abaik ka-7 inggo ka-9, sarato mambantu manyebarkan kabudayoan Melayu ka saluruah Sumatera, Samananjuang Melayu, dan bagian barat Borneo. Karajaan Sriwijaya marupoan karajaan maritim (thalassocracy) nan mampalaweh pangaruahnyo dari pulau ka pulau. Palembang pado maso itu marupoan pusek pambalajaran nan tanamo, dan marupoan tampek patualang Cino I-Tsing baraja bahaso Sanskrit sabalun pai ka India pado 671 Masihi. Dalam pajalanan baliaknyo ka Cino, baliau juo maabihkan maso salamo ampek taun di Palembang untuak manarjamahkan teks agamo Buddha dan manulih duo manuskrip.

Pangaruah Sriwijaya bakurang pado abaik ka-11 salapeh disarang Karajaan Chola nan katiko itu mamarintah di India Selatan. Sumatera salanjuiknyo takluak kapado karajaan-karajaan di Jawa, iyolah patamo dek Singhasari dan kudian dek Majapahit. Pado maso nan samo Islam masuak ka Sumatera di abaik ka-6 dan ka-7 Masehi malalui sudaga Arab jo India.[7] Manjalang akhia abaik ka-13, rajo-rajo karajaan Samudra alah mamaluak agamo Islam. Iko tampak dek Marco Polo nan singgah di pulau iko pado taun 1292 dan dek Ibnu Battuta nan singgah duo kali sapanjang 1345-1346. Karajaan Samudera digantikan dek Kasultanan Aceh nan kuek, nan tagak inggo abaik ka-20.

Kadatangan Balando alah mambuek banyak nagari-nagari di pulau Sumatera sacaro baransua-ansua jatuah di baruah kuasonyo. Namun Kasultanan Aceh di utara pulau manjadi pangalang utamo, nan manyababkan Balando talibaik dalam Parang Aceh (1873-1903) nan lamo jo maha. Kabanyakan Sumatera jatuah di bawah pamarintahan Hindia Balando, dan manjadi pangasia utamo marica, gatah kajai, jo minyak. Pado mulo jo patangahan abaik ka-20, ahli akademik dan pamimpin Sumatera manjadi tokoh-tokoh uatmo dalam pagerakan kamardekaan Indonesia.

GeografisSuntiang

Pulau Sumatera talatak di bagian barat gugusan kapulauan Nusantara. Di sabalah utara babatehan jo Taluak Benggala, di timur jo Selat Malaka, di sabalah selatan jo Selat Sunda, sarato di sabalah barat jo Samudra Hindia. Di sabalah timur pulau, banyak ditamui rawo nan dialiri dek sungai-sungai gadang nan bamuaro di sinan, antaro lain Asahan (Sumatera Utara), Sungai Siak (Riau), Kampar, Inderagiri (Sumatera Barat, Riau), Batang Hari (Sumatera Barat, Jambi), Musi, Ogan, Lematang, Komering (Sumatera Selatan), jo Way Sekampung (Lampung). Samantaro babarapo sungai nan bamuaro ka pasisia barat pulau Sumatera di antaronyo Batang Tarusan (Sumatera Barat), jo Ketahun (Bengkulu).

Di bagian barat pulau, tabantang Pagunuangan Bukik Barisan nan mambujua dari utara inggo selatan. Sapanjang bukik barisan ado gunuang-gunuang api nan masih aktif, saroman Geureudong (Aceh), Sinabung (Sumatera Utara), Marapi, Talang (Sumatera Barat), Gunuang Kaba (Bengkulu), jo Kurinci (Sumatera Barat, Jambi). Di pulau Sumatera ado pulo babarapo danau, di antaronyo Danau Laut Tawar (Aceh), Danau Toba (Sumatera Utara), Danau Singkarak, Danau Maninjau, Danau Diateh, Danau Dibawah, Danau Talang (Sumatera Barat), Danau Kurinci (Jambi) jo Danau Ranau (Lampung - Sumatera Selatan).

Daftar gunuang di SumateraSuntiang

Flora jo faunaSuntiang

Sumatera marupokan pulau nan manjadi manunjang baragam vegetasi nan dapek diuni dek baragam spesies, tamasuak 17 tanaman endemik.[8] Spesies unik nan ado antara lain pinus sumatera nan mandominasi utan pinus tropis Sumatera di pagunuangan utara pulau jo tanaman utan ujan cando Rafflesia arnoldii (bungo tungga paliang gadang di dunia) jo titan arum (rumpun bungo paliang gadang di dunia)

Pulau iko manjadi rumah untuak 201 spesies mamalia jo 580 spesies buruang. Ado sambilan spesies mamalia endemik Pulau Sumatera jo 14 lainnyo nan endemik Kapulauan Mentawai.[8] Ado 300 spesies ikan aia tawa di Sumatera.[9] Ado juo 93 spesies amfibi di Sumatera nan 21 di antaronyo endemik Sumatera.[10]

Harimau sumatera, badak sumatera, buruang tokhtor sumatera, gajah sumatera, orangutan sumatera jo orangutan tapanuli kasadonyo marupokan spesies nan tarancam punah, nan maindikasikan baso angko ancaman lingkuangannyo baitu tinggi. Pado Oktober 2008, Pamarintah Indonesia maumumkan rencana untuak palinaduangan utan-utan Sumatera nan tasiso.[11]

Ado 10 taman nasional di Sumatera, tamasuak tigo di antaronyo nan tadaftar dalam Situs Warisan Dunia Warisan Hutan Hujan Tropis Sumatera, yaitu Taman Nasional Gunuang Leuser, Taman Nasional Kerinci Seblat, jo Taman Nasional Bukit Barisan Selatan. Taman Nasional Berbak marupokan ciek dari tigo taman nasional di Indonesia nan tadaftar sabagai lahan basah nan mamiliki kapantiangan internasional di bawah Konvensi Ramsar.

PanduduakSuntiang

Sumatera adolah pulau nan indak baitu padek panduduak, jo 123,46 urang per km2 – kiro-kiro 58,557 juta panduduak (pado Sensus Panduduak 2020).[12] Dek lawehnyo, Sumatera tatap nan kalimo[13] pulau paliang padek panduduak di dunia.

Populasi historis
Taun Jumlah
Pend.
  
±%  
1971 20.808.148—    
1980 28.016.160+34.6%
1990 36.506.703+30.3%
1995 40.830.334+11.8%
2000 42.616.164+4.4%
2005 45.839.041+7.6%
2010 50.613.947+10.4%
2015 55.198.752+9.1%
2020 58.557.211+6.1%
sources:[14][15]

Sacaro umum, pulau Sumatera diuni dek bangso Malayu, nan tabagi ka dalam babarapo etnis. Etnis-etnis gadang iolah Aceh, Batak, Melayu, Minangkabau, Besemah, Rejang, Ogan, Komering, jo Lampung. Di wilayah pasisia timur Sumatera jo di babarapo kota-kota gadang sarupo Medan, Palembang, jo Pekanbaru, banyak bamukim etnis Tionghoa. Panduduak pulau Sumatera hanyo tapusek di wilayah Sumatera Timur jo dataran tinggi Minangkabau. Mato pancaharian panduduak Sumatera sabagian basa sabagai patani, nalayan, jo padagang.

BahasoSuntiang

Agamo di Sumatera – Sensus 2010[16]
Agamo persentase
Islam
  
87.1%
Kristen
  
10.7%
Buddha
  
1.4%
Hindu
  
0.3%
Agamo lainnyo/
Indak manjawek
  
0.3%
Konghucu
  
0.1%

Ado labiah dari 52 bahaso nan dipakai, kasadoalahannyo tamasuak dalam rumpun bahaso Malayo-Polinesia dari kaluarga bahaso Austronesia. Dalam rumpun tasabuik, inyo tabagi ka babarapo cabang: Cham (Aceh, nan arek jo bahaso Campo di Kamboja jo Vietnam), Malayik (Malayu, Minangkabau, Besemah, jo bahaso lainnyo nan bakarabaik), Sumatera Barat Daya-Kapulauan Pangalang (Batak, Gayo, dan lainnyo), Lampung (Lampung jo Komering), jo Borneo (Rejang, nan arek ubuangannyo jo Dayak Darek sarato Bukar Sadong nan dipakai di Kalimantan jo Sarawak (Malaysia)). Cabang Sumatera Barat Daya-Kapulauan Pangalang sarato Lampung marupokan cabang bahaso nan endemik Sumatera. Cando daerah lain di Indonesia, bahaso Indonesia manjadi bahaso nasional sarato pangubuang (basantara) nan dipakai dek urang Sumatera. Bago dek itu, Sumatera mampunyoi basantaranyo surang, cando Malayu Medan jo Malayu Palembang[17] nan bapakai di Sumatera Utara jo Sumatera Selatan, utamonyo daerah urban. Bahaso Minangkabau[18] bapakai di Sumatera Barat sarato sabagian dari Sumatera Utara, Bengkulu, Jambi jo Riau (utamonyo Pekanbaru jo area-area nan badakekan jo Sumatera Barat). Samantaro bahaso Aceh manjadi basantara di dalam provinsi Aceh.

AgamoSuntiang

Panduduak Sumatera mayoritas baagamo Islam (87,1%) jo saketek (10,7%) nan marupokan panganuik agamo Kristen, utamonyo di Sumatera Utara. Di wilayah pakotaan, sarupo Medan, Pekanbaru, Batam, Pangkal Pinang jo Palembang, ditamui pulo babarapo urang panganuik Buddha jo Hindu nan mancapai kurang dari 2%.[16]

TransportasiSuntiang

Kota-kota di pulau Sumatera diubuangkan dek tigo rueh jalan linteh (Indonesia: Jalan Lintas Sumatra; jalinsum), yakni linteh tangah, linteh timur, jo lintas barat, nan malintang dari utara - selatan Sumatera. Salain itu ado pulo rueh jalan nan malintang dari barat - timur, sarupo rueh Bengkulu - Palembang, Padang - Jambi, sarato Padang - Dumai.

Di babarapo bagian pulau Sumatera, kareta api marupokan sarana transportasi piliahan. Di bagian selatan, jalua kareta api bamulo dari Palabuahan Panjang (Lampung) inggo Lubuaklinggau jo Palembang (Sumatera Selatan). Di tangah pulau Sumatera, jalua kareta api hanyo ado di Sumatera Barat. Jalua iko maubuangkan antaro kota Padang jo Sawahlunto sarato kota Padang jo kota Pariaman, walau nan aktif kini hanyo Padang - Pariaman jo Padang - Lubuak Aluang. Samaso kolonial Balando inggo taun 2001, jalua Padang - Sawahlunto dipagunokan untuak maangkuik batu baro. Tapi samanjak cadangan batu baro di Ombilin mulai saketek, mangko jalur iko indak bafungsi lai. Sajak akia taun 2006, pamarintah provinsi Sumatera Barat, baliak maaktifkan jalur iko sabagai jalur kareta wisata.

Di utara Sumatera, jalua kareta api mambantang dari kota Medan sampai ka kota Tebing Tinggi. Pado jalua iko, kareta api dipagunokan sabagai sarana maangkuik kalapa sawik jo panompang.

Panabangan internasional dilayani dari Banda Aceh (Palabuahan udaro Internasional Sultan Iskandar Muda), Medan (Palabuahan udaro Internasional Polonia), Padang (Palabuahan udaro Internasional Minangkabau), jo Palembang (Palabuahan udaro Internasional Sultan Mahmud Badaruddin II). Samantaro palabuahan kapa lauik ado di Belawan (Medan), Taluak Bayua (Padang), jo Bakauheni (Lampung).

EkonomiSuntiang

Pulau Sumatera marupokan pulau nan kayo jo hasia bumi. Dari limo provinsi kayo di Indonesia, tigo provinsi ado di pulau Sumatera, iyolah provinsi Nanggroe Aceh Darussalam, Riau jo Sumatera Selatan. Hasil-hasil utamo pulau Sumatera iolah kalapo sawik, tambakau, minyak bumi, timah, bauksit, batu baro, jo gas alam. Hasil-hasil bumi tasabuik sabagian basa diolah dek parusahoan-parusahoan asiang, misalnyo PT Caltex nan maolah minyak bumi di provinsi Riau.

Tampek-tampek pangasil barang tambang iolah :

  • Arun (NAD), mangasilkan gas alam.
  • Pangkalan Brandan (Sumatera Utara), mangasilkan minyak bumi
  • Duri, Dumai, dan Bengkalis (Riau), mangasilkan minyak bumi
  • Tanjung Enim (Sumatera Selatan), mangasilkan batu baro
  • Plaju dan Sungai Gerong (Sumatera Selatan), mangasilkan minyak bumi
  • Tanjung Pinang (Kepulauan Riau), mangasilkan bauksit
  • Indarung (Sumatera Barat), mangasilkan semen
  • Sawahlunto (Sumatera Barat), mangasilkan batubaro

Babarapo kota di pulau Sumatera, juo marupoan kota paniagoan nan cukuik penting. Medan kota tagadang di pulau Sumatera, marupoan kota paniagoan utamo di pulau iko. Banyak parusahoan-parusahoan gadang nasional nan bakantua pusaik di siko.

Provinsi di SumateraSuntiang

Sumatera (tamasuak pulau-pulau sakitarannyo) dulunyo ciek provinsi antaro taun 1945 jo 1948. Kini alah manjadi sapuluah dari 34 provinsi di Indonesia, barikuik provinsi jo populasinyo.[19]

Namo Laweh (km2) Populasi
sensus
2000
Populasi
sensus
2010
Populasi
sensus
2015
Populasi
sensus
2020
Ibu Kota
  Aceh 57.956,00 4.073.006 4.486.570 4.993.385 5.274.871 Banda Aceh
  Sumatera Utara 72.981,23 11.642.488 12.326.678 13.923.262 14.799.361 Medan
  Sumatera Barat 42.012,89 4.248.515 4.846.909 5.190.577 5.534.472 Padang
  Riau 87.023,66 3.907.763 5.543.031 6.330.941 6.394.097 Pekanbaru
  Kapulauan Riau 8.256,10 1.040.207 1.685.698 1.968.313 2.064.564 Tanjung Pinang
  Jambi 50.058,16 2.407.166 3.088.618 3.397.164 3.548.228 Jambi
  Sumatera Selatan 91.592,43 6.210.800 7.446.401 8.043.042 8.467.432 Palembang
  Bengkulu 19.919,33 1.455.500 1.713.393 1.872.136 2.010.670 Bengkulu
  Lampung 34.623,80 6.730.751 7.596.115 8.109.601 9.007.848 Bandar Lampung
  Kapulauan Bangka Belitung 16.424,14 899.968 1.223.048 1.370.331 1.455.678 Pangkal Pinang
Total 480.847,74 42.616.164 50.613.947 55.198.752 58.557.211

Kota gadangSuntiang

 
Medan, kota paliang gadang di Sumatera

Manuruik populasinyo, Medan adolah kota paliang gadang di Sumatera.[20] Medan juo marupokan kota nan paliang banyak dikunjuangi sarato kota paliang bakambang di Sumatera.

Paringkek Kota Provinsi Populasi
2019
Hari Jadi Area (km2)
1 Medan Sumatera Utara 2.949.830 1 Juli 1590; 431 tahun nan lalu (1590-07-01) 265,10
2 Palembang Sumatera Selatan 1.573.898 17 Juni 683; 1338 tahun nan lalu (683-06-17) 358,55
3 Bandar Lampung Lampung 1.176.677 17 Juni 1682; 339 tahun nan lalu (1682-06-17) 197,22
4 Batam Kepulauan Riau 1.063.941 18 Desember 1829; 191 tahun nan lalu (1829-12-18) 960,25
5 Pekanbaru Riau 900.465 23 Juni 1784; 237 tahun nan lalu (1784-06-23) 632,26
6 Padang Sumatera Barat 887.675 7 Agustus 1669; 352 tahun nan lalu (1669-08-07) 694,96
7 Jambi Jambi 610.854 17 Mei 1946; 75 tahun nan lalu (1946-05-17) 205,38
8 Bengkulu Bengkulu 366.435 18 Maret 1719; 302 tahun nan lalu (1719-03-18) 393,7
9 Dumai Riau 350,678 20 April 1999; 22 tahun nan lalu (1999-04-20) 1.727,38
10 Pematangsiantar Sumatera Utara 282.885 24 April 1871; 150 tahun nan lalu (1871-04-24) 79,97
11 Binjai Sumatera Utara 282.415 17 Mei 1872; 149 tahun nan lalu (1872-05-17) 90,45
12 Banda Aceh Aceh 240.462 22 April 1205; 816 tahun nan lalu (1205-04-22) 61,36
13 Lubuklinggau Sumatera Selatan 226.002 21 Juni 2001; 20 tahun nan lalu (2001-06-21) 401,50
14 Tanjungbalai Sumatera Utara 167.012 27 Desember 1620; 400 tahun nan lalu (1620-12-27) 60,52
15 Tebing Tinggi Sumatera Utara 156.815 1 Juli 1917; 104 tahun nan lalu (1917-07-01) 38,44

RujuakanSuntiang

  1. Nicholaas Johannes Krom, De Naam Sumatra, BKI, 100, 1941.
  2. Marsden, William (1783). The History of Sumatra. Dutch: Longman. pp. 5. 
  3. Cribb, Robert (2013). Historical Atlas of Indonesia. Routledge. pp. 249. 
  4. Munoz. Early Kingdoms. pp. 175. 
  5. a b Sneddon, James N. (2003). The Indonesian language: its history and role in modern society. UNSW Press. p. 65. ISBN 9780868405988. https://books.google.com/books?id=A9UjLYD9jVEC&pg=PA65. Diakses pado 16 Desember 2015. 
  6. Macdonell, Arthur Anthony (1924). A Practical Sanskrit Dictionary with Transliteration, Accentuation, and Etymological Analysis. Motilal Banarsidass Publications. p. 347. ISBN 9788120820005. https://books.google.com/books?id=laIPgMQF_XsC&pg=PA347. Diakses pado 16 Desember 2015. 
  7. G.R. Tibbets,Pre-Islamic Arabia and South East Asia, in D.S. Richards (ed.),1970, Islam and The Trade of Asia, Oxford: Bruno Cassirer Pub. Ltd, p. 127 nt. 21; S.Q.Fatimi, In Quest of Kalah, in D.S. Richards (ed.),1970, p.132 n.124; W.P. Groeneveldt, Notes in The Malay Archipelago, in D.S. Richards (ed.),1970, p.129 n.42
  8. a b Whitten, Tony (1999). The Ecology of Sumatra. Tuttle Publishing. ISBN 962-593-074-4. 
  9. Nguyen, T. T. T., and S. S. De Silva (2006). "Freshwater finfish biodiversity and conservation: an asian perspective". Biodiversity & Conservation 15(11): 3543–3568
  10. "Hellen Kurniati". The Rufford Foundation. Diarsipkan dari versi asli tanggal 25 August 2017. Diakses tanggal 25 August 2017. 
  11. "Forest, Wildlife Protection Pledged at World Conservation Congress". Environment News Service. 14 October 2008. Diarsipkan dari versi asli tanggal 3 June 2012. Diakses tanggal 25 July 2012. 
  12. Badan Pusat Statistik, Jakarta, 2020.
  13. "Population Statistics". GeoHive. Diarsipkan dari versi asli tanggal 4 April 2012. Diakses tanggal 25 July 2012. 
  14. "Penduduk Indonesia menurut Provinsi 1971, 1980, 1990, 1995, 2000 dan 2010" [Indonesian Population by Provinces 1971, 1980, 1990, 1995, 2000 and 2010]. Badan Pusat Statistik (dalam bahasa Indonesia). Diarsipkan dari versi asli tanggal 1 July 2013. Diakses tanggal 17 July 2013. 
  15. Badan Pusat Statistik, Jakarta, 2019.
  16. a b Badan Pusat Statistik, Kewarganegaraan, Suku Bangsa, Agama, dan Bahasa Sehari-hari Penduduk Indonesia [Citizenship, Ethnicity, Religion, and the Everyday Languages of Indonesian Citizens] (PDF) (dalam bahasa Indonesia), Badan Pusat Statistik, ISBN 978-979-064-417-5, diarsipkan dari versi asli (PDF) tanggal 23 September 2015, diakses tanggal 5 January 2019 
  17. Wurm, Stephen A., ed (1996). Atlas of Languages of Intercultural Communication in the Pacific, Asia, and the Americas: Vol. I: Maps. Vol II: Texts. Berlin and New York: Mouton de Gruyter. ISBN 9783110819724. https://books.google.com/books?id=lFW1BwAAQBAJ&q=palembang+malay+lingua+franca&pg=PA675. 
  18. "Minangkabau Language". gcanthminangkabau.wikispaces.com. Diarsipkan dari versi asli tanggal 4 April 2014. 
  19. Badan Pusat Statistik, Jakartya, 2021.
  20. Biro Pusat Statistik, Jakarta.

Bacoan lanjuikSuntiang

Pautan luaSuntiang