Los Lambuang

Los Lambuang atau tanamo juo jo Pasa Lambuang adolah bagian dari Pasa Lereang, Bukittinggi, nan dipagunokan untuak pusek kuliner nasi kapau. Salain nasi kapau, tasuo pulo katupek pitalah nan dipadagangkan di siko.

Los Lambuang di Bukittinggi

Los Lambuang ko mampunyoi kaunikan dibandiang tampek jajanan atau makanan di pasa lainnyo.Satiok panjua di los ko mampunyoi caro nan babeda-beda dalam bajualan, walau samo-samo nasi kapau. Pabedaan tasabuik tampak dari caro panyajian sarato jinih samba nan dijua. Panamoan lapak tiok lapau nasi di los ko umumnyo di awali jo kato Uni/Ni, cando Uni Pit, Ni Lis, jo Ni Newan. Kudian ado pulo aturan nan indak tatulih di antaro panjua-panjua nasi di siko dalam palabelan Kapau pado panamoan lapau. Hanyo panjua dari Kanagarian Kapau sajo nan dibuliahan mamakai label iko. Paronoan lapaunyo juo khas jo rono biru nan marupokan rono kabanggaan urang Bukittinggi.

Sijarah

Los Lambuang mulo badiri sajak taun 1980 jo dagangan utamo nasi kapau jo katupek nan manjadi incaran wisatawan. Kapau ko surang adolah namo sabuah nagari di Kabupaten Agam nan manjadi kampuang asa padagang makanan di Los Lambuang dan alah manjua makanan sacaro turun tamurun. Menu masakan nan disadiokan di Los Lambuang umumnyo ampia samo. Mode gulai tambunsu, gulai tunjang, gulai itiak, dendeng balado, itiak lado ijau, gulai cancang, pangek ikan, ayam goreng, ayam panggang, ayam goreng lado ijo, inggo goreng baluik. Ado pulo gulai khas Kapau nan barisi irisan rabuang, cubadak, kacang panjang, jo lobak. Gulai ko manjadi ciri khas pambeda antaro nasi kapau jo nasi padang pado umumnyo. Salain itu, ado pulo panambahan bumbu randang jo samba goreng sabagai panguek raso.

Los nan dibangun tasabuik dinamokan juo Loih Galuang (Los malangkuang) dek bantuak atoknyo nan satangah malingka. Dalam pakambangannyo di tahun 1896, dibangun pulo los di bagian timur untuak padagang kain jo toko kalontong. Tahun 1900, untuak panjua dagiang jo ikan segar dibangun ciek los (kini los lambuang, tampat jua nasi kapau). Los ko dibangun di sisi bukik sabalah timur, supayo limbah aia dapek dialia ka banda di bawah bukik. Lokasi los nan talatak di kamiriangan. Warga Bukittinggi manyabuiknyo sabagai pasa leleng (miriang).

Caliak juo

• Masakan Minangkabau
• Nasi Padang
• Nasi Kapau
• Restoran Padang