Urang Cino Padang

Urang Cino Padang atau Tionghoa Padang adolah urang katuruan Cino nan batampek tingga sarato bakaturunan di Kota Padang, Sumatera Barat, Indonesia. Urang Cino Padang marupoan ciek dari babagai etnis nan mauni Padang salain urang Minangkabau, Jao, Batak, Nieh, Malayu, Sunda, jo Mentawai. Urang Cino Padang saindaknyo alah tingga salamo salapan generasi di Padang. Kabanyakan inyo bakarajo sabagai padagang. Parmukiman urang Cino Padang takonsentrasi di daerah Pondok jo sakitarnyo di wilayah Kecamatan Padang Selatan nan tanamo sabagai Kampuang Cino.

Urang Cino Padang
Tionghoa Padang

Kelenteng See Hien Kiong.
Total populasi
9.498 (Sensus 2010)
Kawasan jo populasi nan signifikan
Kecamatan Padang Selatan
Bahaso
Bahaso Minang Pondok
Agamo
Agamo tradisional Cino, Kristen, Islam

Indak ado catatan pasti bilo urang Cino patamo tibo ka Padang. Dipakiroan urang Cino mulai tibo samanjak parusahaan dagang Balando Vereenigde Oostindische Compagnie (VOC) managakkan markasnyo di Padang pado abaik ka-17. Pado tahun 2000, populasi urang Cino Padang parnah masuak tigo paliang banyak sasudah urang Minangkabau jo Jao dengan presentase 1,90% dari populasi kota. Namun, sasudah gampo bumi pado tahun 2009, banyak dari inyo nan maninggaan Padang dan pindah kalua wilayah Sumatera Barat. Manuruik data Badan Pusat Statistik (BPS) pado tahun 2010, presentase urang Cino Padang tingga 1,1% dari populasi kota atau sabanyak 9.498 jiwa, urutan kaampek sasudah Minangkabau, Jao, jo Batak.

Urang Cino Padang mampu baradaptasi jo budaya Minangkabau. Bahkan, generasi urang Cino Padang kini banyak nan indak dapek mangecek dalam rumpun bahaso Cino dek inyo alah baasimilasi jo Urang Minangkabau. Bahaso nan mereka partuturan tanamo sabagai Bahaso Minang Pondok. Namun baitu, mereka indak maninggaan adat jo tradisi inyo. Lewat parkumpulan sosial, budaya, jo kamatian Himpunan Tjinta Teman (HTT) jo Himpunan Bersatu Teguh (HBT) nan alah tagak sajak abaik ka-19, eksistensi adaik jo tradisi Cino di Padang tatok tajago di tangah masyarakaik hinggo kini.

Sijarah mulo

Kadatangan

Takah di daerah lainnyo di Nusantara, kabaradoan urang Cino di Padang indak lapeh dari fenomena diaspora atau kaluanyo urang Cino dari tanah kalahiran inyo untuak tujuan parniagaan. Walaupun indak ado catatan pasti bilo urang Cino bamulo tibo di Padang, urang Cino dipakiroan alah ado di pantai barat Sumatera pado abaik ka-17, sabalum urang Balando jo Inggirih tibo. Inyo tibo dari Banten, nan sangkek itu marupoan pusek niago di Nusantara. Pado tahun 1630-an, dikatahui alah banyak basanda kapa-kapa Cino di sakitar parairan pantai barat Sumatera. Di antaro kota nan rami dikunjungi dek kapa-kapa Cino adolah Piaman. Di daerah iko, urang Cino manggaleh kabutuahan pokoak, utamonyo garam. Namun, kabanyakan inyo hanyolah agen dari padagang Cino nan ado di Banten. Pado tahun 1633, dilaporkan alah ado urang Cino nan manatok di Piaman.

Pado tahun 1664, Balando manjadian Padang sabagai markaih gadangnyo di pantai barat Sumatera nan ditandoi dengan ditagakannyo sabuah benteang. Balando mancubo mangaliahan parniagaan dari Pariaman ka Padang. Mancaliak kondisi iko, urang Cino mulai batadangan jo manatok di Padang untuak dapek ikuik sato dalam parniagaan. Urang Cino di Padang dipakiroan marupoan pindahan dari Pariaman. Pado tahun 1673, ado laporan tantang "Nahkoda Banten" Cino nan punyo rumah surang di Padang basamo babarapo urang Cino lainnyo. Rumah nan inyo punyo labiah rancak dibandiangan jo rumah panduduak satampek. Inyo tingga mangalompoak di salah satu kawasan di sakitar tapian Batang Arau. Inyo dapek mambali tanah dari panguaso satampek nan bagala panglimo rajo. Mulai banyaknyo jumlah urang Cino di Padang manyabokkan pado tahun 1682 diangkek saurang "Letnan Cino" untuak mangatua jo mangontrol sasamo urang Cino.

Manjadi mitra datang Balando

Sajak kadatangan Balando di bawah bendera VOC, Padang samakin bakambang manjadi palabuahan nan rami.

Sairiang wakatu, urang Cino mulai mamacik pangaruah dalam parniagaan di Padang. Inyo manjalin hubuangan karajo samo jo Vereenigde Oostindische Compagnie (VOC), parusahoan dagang Balando. Hubuangan Balando jo Urang Cino Padang kian lamo kian arek dek adonyo kauntuangan nan samo-samo didapek. VOC nan indak punyo banyak pagawai di Padang maagiah hak ka pihak swasta untuak mamunguik pajak impor jo ekspor. Banyak di antaro pihak swasta nan mandapek hak iko adolah urang Cino. Pado tahun 1785, saurang Kapitan Cino banamo Lau Ch'uan-ko mamacik hak mamunguik pajak di Padang. Katiko parniagaan ameh di Minangkabau makin marosot, pamarintah kolonial Balando pado tahun 1790 manyatujui untuak manarimo manggunoan pitih urang Cino sabagai pambayia persentase tatantu (dalam hal panjualan kain) untuak Balando. Samantaro itu, urang Minangkabau masih bagantuang ka ameh sabagai alaik tuka. Ditarimonyo pitih Cino iko sabagai alaik tuka mambuek urang Cino makin diuntuangan.

Pado mulo abaik ka-19, urang Cino di Padang alah malibekkan diri dalam parniagaan lua nagari, tarutamo jo kawasan selat takah Penang, Malaka, jo Singapura. Hal iko didoroang dek kabijakan Gubernur Pantai Barat Sumatera Andreas Victor Michiels nan mandoroang urang asiang supayo labiah banyak tibo ka Padang batujuan untuak maningkekan pasaingan. Babagai kamudahan jo fasilitas diagiah ka para padagang Cino nan dianggok mampu mamajuan parekonomian. Salah satunyo adolah pinjam pitih untuak modal dari Nederlandsche Handel-Maatschappij (NHM), nan manggantian fungsi VOC nan bangkrut pado 1799. Dengan dukuangan modal sarato jariangan regional jo internasional, padagang Cino dapek manjadi agen bagi parniagaan barang-barang impor, sarupo kain jo porselen. Akibaiknyo, banyak padagang Minangkabau bagantuang ka padagang Cino. Pado tahun 1829, tasabuik ado ampek urang pialang Cino nan tanamo, yaitu Lie Heng (atau Lie Gieng), Lie Ma-ch’ao (Lie Matjiaw), Lie Sing, jo Hu A-chiao (Hoi Atjouw). Pado tahun 1833, ado sakitar 700 urang Cino di Padang, kabanyakan urang kayo.

Indak hanyo manguasai parniagaan barang impor nan dibutuhan dek masyarakaik Minangkabau di darek, padagang Cino mulai manggarap parniagaan komoditas ekspor nan barasa dari kawasan darek atau padalaman Minangkabau. Pado 1847, saurang Cino banamo Lie Saay mandapek kontrak pamarintah kolonial Balando untuak maangkuik kopi, komoditas ekspor Minangkabau nan tanamo maso itu. Lie Saay malalui parusahaan ekspedisi nan inyo punyo maangkuik kopi dari Padang Panjang ka Kayu Tanam sarato mangangkuik garam jo barang-barang lainnyo dalam parjalanan pulang. Wakatu itu, sarana transportasi hanyo didukuang dek jalan satapak nan mangubuangan kampuang-kampuang darek ka pasisia barat dan ka sungai-sungai nan mengalir ka timur ka Selat Malaka. Angkutan transportasi nan digunoan Lie Saay hanyo barupo padati nan dielo dek kudo. Dalam parjalanan, Lie Saay didampingi kakaknyo, Lie Maa Toon nan santiang dalam babeladiri kungfu sabagai pangawal. Sasudah transportasi dibangun, Lie Saay pindah ka Padang dan diangkek manjadi Kapitan Cino pado tahun 1860.

Managakkan pamukiman, kelenteang, jo pasa

Kelenteang See Hien Kiong sakitar tahun 1870.

Sairiang tanamonyo Padang sabagai pusek pardagangan VOC untuak pulau Sumatera, parusahaan-parusahaan Balando tumbuah bak cindawan. Hal iko mambuek banso asiang samakin banyak badatangan, tamasuak urang Cino. Dalam Encyclopaedia Britannica edisi ka-9, Padang pado patangahan abaik ka-19 digambaran sabagai kota nan punyo 2.000 rumah dengan panduduak sabanyak 15.000, alah tamasuak di dalamnyo parmukiman urang Cino. Paniliti tantang sijarah urang Cino di Sumatera Barat, Erniwati manulih pantang Cino di Padang samulo tingga mangalompok di salah satu sisi tapian Batang Arau arah ka muaro nan kini banamo Pondok. Baa kok banamo "Pondok" dek banyak urang Cino Padang managakkan rumah jo tampek manggaleh nan babantuak pondok.

Pado tahun 1852, urang Cino di Padang alah bajumlah 1.140 urang. Jumlah iko maningkek manjadi 1.564 pado tahun 1858. Mulai banyaknyo pandatang Cino nan tingga di Padang maakibaikan kabutuhan adonyo kelenteang timbua. Pado awalnyo, urang Cino di Padang indak punyo kelenteang samo sakali. Sakalompok pantadang bainisiatif untuak managakan kelenteang pado partangahan abaik ka-19. Kelenteang iko dinamoan Kelenteang Kwan Im (Kwan Im Teng). Patamo kali tagak, Kwan Im Teng hanyo barupo bangunan kayu baatok atap rumbio. Namun, pado tahun 1861, dek kalalaian pendeta Sae Kong, Kwan Im Teng tabaka hinggo manjadi abu. Samaso Kapitan Cino dipacik dek Lie Goan Hoat pado 1893, didampingi dek Letnan Liem Soen Mo jo Letnan Lie Bian Ek, bamufaakaiklah urang Cino Padang untuak managakan baliak Kelenteang Kwan Im. Kelenteang nan baru tagak dinamoan Kelenteang See Hien Kiong. Pambangunannyo salasai pado tahun 1893.

Urang Cino di Padang indak hanyo manjadian kelenteang sabagai tampek sumbayang atau ibadah, malainkan juo sabagai tampek tingga samantaro bagi pandatang Cino nan indak punyo dunsanak. Dari siko, inyo buliah bakenalan jo urang Cino lainnyo sahinggo manjadi paubuang bagi inyo untuak marintih usaho. Di sakitar kelenteang, inyo managakkan kios-kios dari buluah untuak tampek manggaleh. Sasudah kelenteang mangalami kabakaran pado tahun 1861, kios-kios iko disewaan, nan hasil labonyo digunaan untuak mambayia cicilan pinjaman pambangunan kelenteang. Lamo kalamoan, kios-kios di sakitar kelenteang bakambang manjadi pasa nan kini tanamo sabagai Pasa Tanah Kongsi. Pasa iko manjadi rami sahinggo dalam wakatu nan relatif capek mampu manyaingi Pasa Mudiak nan sabalumnyo alah ado dan lataknyo badakekan.

Akhia pamarintahan kolonial Balando

Kamajuan Padang nan samulo hanyo kampuang nalayan manjadi pusek parniagaan jo pamarentahan di Sumatera manyebabkan daerah iko rami dikunjuangi para pandatang, tamasuak urang Cino.

Pado tahun 1865, jumlah urang Cino di Padang adolah 2.973 urang. Pado tahun 1874, 10% dari populasi panduduak Padang nan sangkek itu bajumlah sakitar 25.000 urang adolah urang Cino. Pado tahun 1878, jumlah urang Cino di Padang adolah 2.640 urang. Jumlah iko mangalami panurunan dibandiangan tahun 1865. Pado tahun 1880, jumlah urang Cino di Padang naik baliak manjadi 3.468 urang.

Mancaliak jumlah urang Cino di Padang nan candaruang maningkek, pamarintah kolonial Balando maambiak kabijakan untuak manato parmukiman di Padang. Panatoan iko mangikuik sasuai kabijakan Besluit No. 758 nan diteken dek Gubernur Pantai Barat Sumatera, tangga 30 Oktober 1884 tantang Panatokkan Kawasan untuak Urang Cino di Kota Padang. Dek populasi urang Cino taruih maningkek, baitu pulo urang asiang lainnyo, paraturan tahun 1884 kudian diparbarui jo Beslit No. 34 tangga 3 Pebruari 1891. Dalam paraturan itu, wilayah urang Cino dipalaweh sampai ka masuak ka daerah Balakang Tangsi. Di siko, saurang padagang Cino banamo Gho Lam San mambukak sabuah pasa basubarangan jo bakeh pasa milik parusahaan urang Minangkabau Badu Ata & Co. nan tabaka pado tahun 1882.

Pado tahun 1900, pamarintahan kolonial Balando malunggaan ijin masuak urang Cino di Hindia Balando. Kabijakan iko bapangaruah tarhadap jumlah urang Cino di Padang. Jumlah urang Cino pado tahun 1905 adolah sabanyak 5.000 urang, kudian naiak manjadi 6.765 pado tahun 1920, dan maningkek manjadi 8.516 urang pado tahun 1930. Paningkatan jumlah urang Cino Padang antaro tahun 1905 sampai 1930 sajalan jo galombang migrasi massal nan dilakuan dek urang Cino.

Sasudah kamerdekaan Indonesia

Parjuangan kamerdekaan Indonesia

Urang Cino Padang mambaok arak-arakan Sipasan dalam parayaan Cap Go Meh pado 4 Januari 1948.

Sasudah Indonesia mamproklamasian kamerdekaannyo pado 17 Agustus 1945, sikap urang Cino Padang tabagi ka dalam tigo kalompok. Ado nan maagih dukungan terhadap Balando, ado nan ikuik sato mambantu parjuangan kamerdekaan Indonesia, dan ado nan basikap netral. Karagaman orientasi urang Cino Padang samaso parjuangan mampartahankan kamerdekaan Indonesia manyebabkan masyarakatik umum sariak mangenali sikap mereka. Walaupun baitu, Johnny Anwar dalam buku Api Perjuangan Kemerdekaan di Kota Padang manulih, banyak urang Cino Padang indak mamasang bandera Merah Putih di rumah jo toko mereka pado maso awal kamardekaan Indonesia, padahal alah ado imbauan dari Pamarentah Kota Padang.

Urang Cino Padang nan bapihak ka Balando nio Balando bakuaso baliak di Indonesia. Di antaro mereka tasabuik namo Nyo Hok Seng. Inyo acok maagih informasi ka Balando tantang parkambangan situasi Padang, tamasuak kabaradoan posisi pajuang kamerdekaan. Ado pulo urang Cino Padang nan bapihak ka Balando untuak mampakayo diri. Mereka mamanfaatkan kamampuan manembus blokade Balando untuak mancari kauntungan. Umumnyo mereka adolah panggaleh bahan makanan.

Ada pulo urang Cino Padang nan bapihak ka pajuang kamerdekaan. Mereka maagih pertolongan dalam bantuak mamasok sanjato untuak kabutuhan pajuang kamerdekaan. Sho Bun Seng adolah di antaro urang Cino di Padang nan dikana jasonyo dalam mamasok sanjato untuak pajuang kamerdekaan. Adopun urang Cino Padang nan netral iyolah mereka nan indak manentukan sikap. Mereka hanyo manunggu parang usai dan kaadaan stabil sahinggo mereka bisa malakuan aktivitas paniagaan takah samulo.

Katiko parang makin basosoh pado pangujung tahun 1945, tajadi pambakaran rumah-rumah urang Cino di Padang. Dek banyaknyo urang Cino nan manjadi kaki tangan Balando, mereka manjadi sasaran panyarangan dek panduduak. Saderetan rumah urang Cino Padang di Blok Eng Djoe Bie di Balai Baru, Kampung Jao disarang. Di siko, ado toko nan manjadi pamasok kabutuhan tentara NICA takah makanan jo obat-obatan. Panyarangan iko mambuek mereka nan tingga di sinan bagabuang ka Kampuang Cino di Pondok. Rumah Ang Eng Hoat, saurang Letnan Cino di Jalan Hiligoo, diobrak-abrik hinggo "tingga dindiangnyo se lai".

Pangakuan kadaulatan Indonesia

Spanduk nan dibaok de Urang Cino Padang nan babunyi Hiduik "Para Pemburu", yakni batalion Balando bagian dari U-Brigade nan malakun operasi militer di Padang pado tahun 1948

Sairing jo pangakuan kadaulatan kamerdekaan Indonesia dek Balando pado tahun 1949, kondisi politik jo kamaanan Padang baransua puliah. Pamarentah mulai manata baliak kahidupan masyarakaik dari babagai aspek, tamasuak parsoalan status kawarganegaraan urang Cino di Indonesia nan alun salasai. Presiden Soekarno maumuman tantang kaharusan urang Cino di Indonesia untuak mamiliah status kawarganegaraan mereka. Mereka diagiah tigo pilihan. Patamo manjadi warga negara Balando, kaduo manjadi warga negara Indonesia, atau katigo manjadi warga negara Republik Rakyat Tiongkok. Di Padang, adonyo pilihan status kawarganegaraan urang Cino mambuek babarapo kaluarga punyo status kawarganegaraan yang babedo hinggo manyebabkan mereka tapisah. Manuruik Erniwati, parbedaan pilihan status kawarganegaraan tajadi akibaik babedonyo orientasi jo kapantiangan di antaro urang Cino Padang.

Salain mangatur parsoalan status kawarganegaraan urang Cino, pamarentah Indonesia maantian masuaknyo imigran dari Cino. Walaupun baitu, masih ado paningkatan jumlah urang Cino di Padang. Paningkatan iko dipakiroan marupoan akibaik kadatangan imigran dari Medan jo Pekanbaru sarato parpindahan urang Cino dari babarapo daerah di Sumatera Barat untuak mancari parlindungan katiko ado peristiwa Pemerintahan Revolusioner Republik Indonesia pado tahun 1958 jo Gerakan 30 September pado tahun 1965.

Sajak 1966 sampai kini

Makam korban gampo 2009 dari urang Cino Padang di Bunguih

Pado tahun 1966, Pamarentah Indonesia mangaluaan Keputusan Presidium Kabinet Nomor 127 Tahun 1966 nan isinyo mangharuskan urang Cino di Indonesia mangganti namo mereka dengan namo Indonesia. Di Padang, hampiang 8.000 urang Cino malakuannyo. Kabijakan untuak urang Cino di Indonesia kudian dibuek pulo dek rezim Orde Baru di bawah Presiden Soeharto nan dikenal dengan kabijakan asimilasi. Pado tahun 1967, Presiden Soeharto mangaluaan Instruksi Presiden Nomor 14 Tahun 1967 nan isinyo mambatasi aktivitas agamo, adat, jo tradisi Cino di muko umum. Urang Cino Padang manuruti kabijakan tersebut. Namun baitu, pamarentah jo masyarakaik Kota Padang maagih kalonggaran tahadok inyo. Inyo tatok dapek malaksanoan kagiatan agamo, adat, jo tradisi mereka di bawah pangalolaan parhimpunan kaluarga (marga) maupun parkumpulan sosial, budayo, jo kamatian.

Sangkek tajadinyo karicuahan Mei 1998, katiko urang Cino di banyak tampek di Indonesia mandapek parlakukan indak elok, indak pernah dilaporan adonyo tindak kekerasan jo kriminal nan manjadian urang Cino sabagai sasaran di Padang. Pado tahun 2000, Presiden Abdurrahman Wahid mangaluaan Keputusan Presiden Nomor 6 Tahun 2000 untuak mancabuik Instruksi Presiden Nomor 14 Tahun 1967. Sajak itu, urang Cino Padang dapek bebas malaksanoan kagiatan agamo, adaik, jo tradisinyo.

Sasudah tajadinyo gampo bumi nan maoyak Sumatera Barat pado 30 September 2009, banyak urang Cino Padang nan mamiliah pai mangungsi kalua kota. Akibaiknyo, jumlah urang Cino Padang agak manurun dibandiangan pariode sabalunnyo. Hinggo kini, alun sadoalah urang Cino nan maninggaan Padang baliak, walaupun kondisi kota alah puliah. Dek Padang rawan kanai tsunami, apolai kawasan urang Cino talatak di tapi pantai, manyabokkan urang Cino banyak nan pindah kalua kota, utamonyo takah Pekanbaru, Medan, jo Jambi. Katiko dilakuan Sensus Penduduk pado tahun 2010, presentasi urang Cino Padang hanyo tingga 1,1% dari populasi kota atau bajumlah 9.498 jiwa.

Dampak paliang taraso dari gampo bumi 2009 adolah runtuahnyo Kelenteang Se Hien Kiong. Akibaiknyo, aktivitas kaagamoan urang Cino Padang manjadi taambek. Salamo babarapo wakatu, urang Cino Padang manyalanggaroan ibadahnyo di bangunan sadarano nan basipaik samantaro di muko bangunan kelenteang. Pado Desember 2010, para urang Cino Padang supakaik untuak managakan kelenteang baru. Mode bangunannyo indak jauah beda jo kelenteang lamo, tapi lataknya dipindahan ka lokasi baru. Kelenteang diresmian pado Maret 2013. Pambangunannyo mamakan dana sakitar Rp5 miliar.

Sosial jo kakarabatan

Bangunan Kelenteang See Hien Kiong nan baru dibangun, sasudah hancua dek gampo bumi 2009.

Urang Cino Padang barasa dari babagai marga. Sistem marga dalam kaluarga etnis Cino didasakan pado asa katurunan dari leluhur nan samo. Kabaradoan ciek marga biasonyo ditandoi jo rumah marga. Aktivitas utamo rumah marga adolah manyalanggaroan sumbayang tahadok laluhua jo dewa-dewa nan diyakini. Salain itu, anggota rumah marga saliang manoloang jo mamparatian antaro ciek jo nan lain. Namun, dek babarapo marga jumlahnyo indak banyak, hanyo ado tujuah marga di Padang nan punyo rumah marga surang, yaitu marga Tan, marga Oei, marga Ong, marga Choa, marga Lie & Kwee, marga Gho, jo marga Lim.

Selain rumah marga, urang Cino Padang bagabaung ka dalam parkumpulan sosial, budaya, jo kamatian nan basipaik heterogen, yaitu Himpunan Tjinta Teman (HTT) jo Himpunan Bersatu Teguh (HBT). HTT ditagakkan sajak tahun 1863 dengan toako patamo Lee Po Keng, samantaro Heng Beng Tong (HBT) ditagakkan sajak tahun 1873 dengan toako patamo Oei A King. Meskipun alah tagak sajak lamo, kaduo parkumpulan iko sacaro administrasi baru resmi tardaptar sajak tahun 1895. Parkumpulan HTT jo HBT utamonyo fokus maagih bantuan palaksanaan upacara kamatian sasuai adat jo tradisi leluhur. Gadangnyo biayo sarato banyaknyo tanago yang diparaluan salamo prosesi pamakaman mambuek urang Cino Padang bagantuang pado parkumpulan. Namun, manuruik Erniwati, kabaradoan kaduo parkumpulan iko saakan-akan mambagi urang Cino Padang dalam duo kelompok. Mereka berkompetisi menarik pangaruah jo mampartahankan citra positif di mato urang Cino di Padang. Dalam panampilan, upacara, maupun acara ritual jo formal, HTT jo HBT bausaho untuak manonjolkan identitas surang-surang. Upayo untuak mandapekan prestise jo panghargaan acok manjadi pamicu munculnyo konflik. Walaupun baitu, konflik terbuka antaro HTT jo HBT indak pernah tajadi dek dapek langsuang diredam oleh para pamimpinnyo.

Budayo

Arakan Sipasan pado maso pamarentahan kolonial Balando.

Urang Cino Padang alah baradaptasi dengan masyarakat lokal tampek mereka barado. Hal iko ditandoi jo digunoannyo bahaso Minangkabau dek urang Cino Padang sabagai bahaso sahari-hari. Hal iko babedo jo, sabagai contoh, urang Cino di pantai Timur Sumatra. Bahkan, mayoritas urang Cino Padang alah indak dapek mangecek jo bahaso asa mereka. Bahaso Minang nan dipartuturan dek urang Cino Padang tanamo sabagai bahaso Pondok atau bahaso Minang dialek Pondok, hasil pancampuran antaro bahaso Indonesia dengan bahaso Minang tapi mamakai logat Mandarin. Bahaso iko mambuek mereka bisa labiah berbaur jo masyarakat Minangkabau.

Sipasan adolah salah satu budayo Cino Padang nan indak basarobok di kota lainnyo di Indonesia. Indak jaleh dari ma asa mulo tradisi Sipasan. Namun, samaso pamarentah kolonial Balando, tradisi iko alah balangsuang. Sipasan marupoan arak-arakan tandu babantuak kursi nan tabuek dari kayu dan disusun sapanjang kamampuan anggota parhimpunan kamatian nan manjadi si pangka maangkuiknyo. Di ateh kursi nan bajejer panjang, duduak anak-anak nan manggunoan pakaian dari babagai daerah. Pado umumnyo anak-anak itu manggunoan pakaian tradisional, utamonyo pakaian Cino. Dengan kompak, anggota parhimpunan maangkuik kursi sahinggo mambantuk sipasan nan dibaok bakaliliang Kampuang Cino. Di bagian muko, ado hiasan nan bantuaknyo saroman kapalo nago. Tradisi iko dilaksanoan satiok parayoan Tahun Baru Cino (Imlek).

Urang Cino Padang mancubo pulo untuak manjago adat jo tradisi mereka di tangah parubahan zaman lewat parkumpulan sosial, budaya, jo kamatian nan banamo Himpunan Tjinta Teman (HTT) jo Himpunan Bersatu Teguh (HBT). Kaduo parkumpulan iko maagiah bantuan dalam panyalanggaraan upacara kamatian sarato parkawinan sasuai adat jo tradisi luluhur Cino. Kabaradoan HTT jo HBT mambuek eksistensi adat jo tradisi Cino di Padang tetap tajago.

Kampuang Cino

Kampuang Cino Padang pado maso pamarentahan kolonial Balando.

Sabuah ruko balenggek di Kampuang Cino Padang maso saisuak

Urang Cino di Padang tingga mangalompok dan mambantuak parmukiman nan tanamo sabagai Kampuang Cino. Latak kawasan iko barado di sisi utara tapian Batang Arau arah ka muaro di di Kecamatan Padang Selatan. Urang Cino saisuak mamiliah tingga di dakek muaro dengan tujuan supayo dakek jo akses transportasi aia nan sangkek itu marupoan sarana utamo dalam parniagaan ekspor jo impor. Mangolompoknyo tampek tingga urang Cino indak lapeh pulo dari adonyo paraturan nan dikaluaan dek pamarentah kolonial Balando, yaitu sistem sentralisasi parmukiman pado ciek tampek bagi panduduak pandatang. Dek Balando, parmukiman urang Cino Padang dikonsentrasikan pado ciek kawasan, yakni di daerah Pondok jo sakitarnyo sahinggo lamo-kalamoan daerah itu manjadi permanen sabagi parmukiman urang Cino Padang sampai kini.

Takah Kampuang Cino atau pecinan pado umumnyo, bantuak bangunan tampek tingga urang Cino di Padang adolah barupo bangunan balenggek duo atau tigo baatok pelana kudo nan dibuek baleret mamanjang maikuik alua jalan. Antaro ciek bangunan jo bangunan nan basubalahan indiangnyo saliang baimpikan. Baa kok dibuek balenggek duo atau tigo supayo dapek dijadian toko tampek manggaleh di lenggek bawahnyo dan tampek tingga di lenggek atehnyo. Konsep bangunan takah iko kini lazim disabuik ruko dan banyak basobok di kota-kota gadang Indonesia nan banyak dihuni dek urang Cino.

Aktivitas ibadah urang Cino Padang dipusekan di kelenteang nan banamo Kelenteang See Hien Kiong. Lataknyo barado dakek tapi Batang Arau, maadok ka Bukiik Gado-Gado di Subarang Palinggam. Kapan tahun pambangunannyo indak diketahui pasti. Dipakiroan kelenteang iko ditagakan sakitar partangahan abaik ka-19, badasaran tinggalan barupo lonceng (genta) nan ado Kelenteang See Hien Kiong nan batarikh tahun 1841. Kelenteang See Hien Kiong manjadi tampek sumbayang urang Cino tarhadap dewa atau leluhur nan mereka sembah. Paruntuakan kelenteang iko adolah untuak urang Cino di Padang pado umumnyo. Kabaradoan kelenteang di Kampuang Cino nan hanyo ciek manunjuakan bahasonyo mayoritas urang Cino Padang mampunyoi leluhur nan samo. Hal iko mambueknyo babeda jo urang Cino nan tingga di babarapo kota di Indonesia, misalnyo urang Cino di Jakarta jo Semarang nan punyo banyak kelenteang surang-surang bagantuang leluhur mereka. Kelenteang See Hien Kiong bahkan manjadi kelenteang satu-satunyo di Sumatera Barat.

Di sakitar kelenteang, tagak rumah-rumah marga. Di subalah timur kelenteang, ado rumah marga Tan, rumah marga Oei, rumah marga Ong, jo rumah marga Choa. Adapun di subalah barat kelenteang, ado rumah marga Lie & Kwee. Rumah marga Gho jo rumah marga Lim talatak di sekitar daerah Pulau Karam.

Sabagai parmukiman, Kampuang Cino dilengkapi pulo jo pasa nan banamo Pasa Tanah Kongsi. Pasa iko lataknyo barado di tangah-tangah Kampuang Cino. Walaupun manuruik samulo marupoan tampek manggalehnyo urang Cino, padagang Minangkabau ikuik pulo manggaleh di pasa iko. Padagang Minangkabau di Pasa Tanah Kongsi sabagian gadang marupoan patani jo nalayan nan langsuang mambaok barang dagangannyo barupo sayua, talua, buah, jo kabutuhan pokok lainnyo dari daerah pasisia. Pasa iko rami dikunjungi dek pambali sajak Subuah sampai siang hari.

Hubungan antaretnis

Partunjukan barongsai (atau kudo-kudo api) di Padang.

Kabaradoan Padang sabagai pusek parniagaan jo pamarentahan di Sumatera pado maso pamarentahan kolonial Balando diiringi jo partumbuhan penduduk jo pandatang dari babagai etnis. Pado pangujuang abaik ka-19, Padang alah manjadi kota majemuk nan panduduaknyo terdiri dari babagai etnis. Salain Minangkabau nan marupoan etnis mayoritas, Padang dihuni dek urang Cino, Nieh, Jawa, Aceh, jo Tamil. Hal iko taruih balanjuik hinggo maso-maso sasudah kamerdekaan. Khusus antaro urang Minangkabau jo urang Cino, hubungan di antaro duo entis iko relatif aman dari konflik, walaupun dalam bidang parniagaan diwarnai jo adonyo parsaingan jo kompetisi. Sampai kini, indak parnah ado konflik nan malibatkan tindak kekerasan antaro urang Minangkabau jo urang Cino di Kota Padang, baitu pulo antaretnis lainnyo.

Manuruik Erniwati, areknyo hubungan antaro urang Minangkabau dengan urang Cino Padang sabagai kakuatan ekonomi jo sosial nan dominan di Kota Padang maakibaikan kabijakan represif rezim Orde Baru tarhadap urang Cino di Indonesia indak baitu dirasoan dek urang Cino Padang. Di Padang, urang Cino mandapek parlakuan nan samo jo etnis lainnyo. Pamarentah Kota Padang indak maagih pambatasan maupun palarangan bagi urang Cino Padang untuak malaksanakan sarato malestarian adat jo tradisi mereka. Sampai kini, Pamarentah Kota Padang taruih malibatkan urang Cino Padang untuak ikuik sato satiok parayaan ulang tahun kota. Bahkan, atraksi nan ditampilkan dek urang Cino takah barongsai jo sipasan dijadiaan sabagai dayo tarik wisata di Kota Padang.

Pamarentah Kota Padang sacaro rutin mandukuang kagiatan nan manampilkan budaya Cino Padang jo pembaurannya. Dalam satiok parayaan Imlek, ditampilkan atraksi seni jo budaya nan ado dari babagai etnis nan mauni Kota Padang. Di antaro acara nan ditampilan dek urang Cino Padang adolah Festival Bazar Merah Putih HTT padang yang menampilkan atraksi barongsai, arak-arakan kio, jo sipasan. Pado 2013, atraksi sipasan nan ditampilan dek parkumpulan HTT mancatat rekor dunia di Guinness World Records sabagai atraksi maarak tandu paliang panjang, yakni panjang arak-arakan 243 meter jo jarak tampuah 1,9 km. Pancapaian iko mangalahan rekor sabalunnyo untuak atraksi sarupo nan tacatat di Kinmen, Taiwan. Sajak 2018, parayaan Imlek alah masuak manjadi kalender wisata Kota Padang nan dikemas dalam Festival Multikultural. Pado 2019, untuak kali patamo diadoan Festival Bakcang Ayam dan Lamang Baluo. Pado alek iko, dibagian sabanyak 10.000 bakcang ayam jo lamang baluo sacaro perai. Kaduonyo marupoan kuliner babahan utamo katan, mamiliki isian, jo dibungkuih daun. Salain pambagian makanan, festival iko diramaian pulo jo babagai partunjukan seni jo budaya urang Cino Padang jo Minang.

Catatan kaki

Daftar pustaka

Buku

• Christine Dobbin (2016). Islamic Revivalism in a Changing Peasant Economy: Central Sumatra, 1784–1847. London: Routledge. https://books.google.co.id/books?id=JzR6DQAAQBAJ&printsec=frontcover&source=gbs_ge_summary_r&cad=0#v=onepage&q&f=false. Diakses pado 1 April 2020. 
• Freek Colombijn (1994). Patches of Padang: The History of an Indonesian Town in the Twentieth Century and the Use of Urban Space. Balando: Research School CNWS. https://books.google.co.id/books/about/Patches_of_Padang.html?id=8bfZAAAAMAAJ&redir_esc=y. Diakses pado 1 April 2020. 
• Erniwati (2007). Asap Hio di Ranah Minang: Komunitas Tionghoa di Sumatera Barat. Yogyakarta: Ombak. https://books.google.co.id/books?id=Ey97JAAACAAJ&dq=Asap+Hio+di+Ranah+Minang:+Komunitas+Tionghoa+di+Sumatera+Barat&hl=en&sa=X&ved=0ahUKEwjS6Me737zoAhUIWCsKHRefAdIQ6AEIKzAA. Diakses pado 1 April 2020. 
• Elizabeth E. Graves (2007). Asal-Usul Elite Minangkabau Modern: Respons Terhadap Kolonial Belanda Abad XIX/XX. Yayasan Obor Indonesia. https://books.google.co.id/books?id=OuthL0q-9P0C&pg=PA107&dq=%22Asal-usul+elite+Minangkabau%22+5.985&hl=en&sa=X&ved=0ahUKEwiYiv3dhL_oAhUbXSsKHfZpCxsQ6AEIKDAA#v=onepage&q=%22Asal-usul%20elite%20Minangkabau%22%205.985&f=false. Diakses pado 1 April 2020. 
• Audrey Kahin (2005). Dari Pemberontakan ke Integrasi: Sumatra Barat dan Politik Indonesia, 1926–1998. Jakarta: Yayasan Obor Indonesia. http://books.google.co.id/books/about/Dari_pemberontakan_ke_integrasi.html?hl=id&id=v0y4-dp9uEEC. 
• Rusli Amran (1988). Padang Riwayatmu Dulu. Jakarta: Yasaguna. https://books.google.co.id/books?id=3mseAAAAMAAJ&q=Padang+Riwayatmu+Dulu&dq=Padang+Riwayatmu+Dulu&hl=en&sa=X&ved=0ahUKEwjQ16vssr_oAhVDjOYKHas3DWYQ6AEIKDAA. Diakses pado 1 April 2020. 
• Mardanas Safwan (1987). Sejarah Kota Padang. Jakarta: Direktorat Jenderal Kebudayaan Kementerian Pendidikan dan Kebudayaan Republik Indonesia. http://repositori.kemdikbud.go.id/7522/1/SEJARAH%20KOTA%20PADANG.pdf. Diakses pado 1 April 2020. 
• Riniwaty Makmur (2018). Orang Padang Tionghoa – Dima Bumi Dipijak, Disinan Langik Dijunjuang. Jakarta: Kompas. https://books.google.co.id/books?id=IjrcvQEACAAJ&dq=Orang+Padang+Tionghoa:+dima+bumi+dipijak,+disinan+langik+dijunjuang+Riniwaty+Makmur&hl=en&sa=X&ved=0ahUKEwiS0peI1MHoAhUDYysKHRpqBIcQ6AEIKDAA. Diakses pado 1 April 2020. 
• Steven Adriaan Buddingh (1861). Neerlands Oost-Indië Reizen (1852–1857). Rotterdam: M. Wijt & Zonen. 
• Jeffrey Hadler (2010). Sengketa Tiada Putus: Matriarkat, Reformisme Agama, dan Kolonialisme di Minangkabau. Freedom Institute. ISBN 978-979-19466-5-0. OCLC 971526815. http://worldcat.org/oclc/971526815. 
• (dalam bahaso id) Sejarah Gereja Katolik Indonesia. Kantor Waligereja Indonesia. 26 Oktober 1974. https://books.google.co.uk/books?id=B5YEAQAAIAAJ&newbks=0&printsec=frontcover&dq=%22kalangan+orang+Tionghoa+,+maka+penduduk+Tionghoa+di+pantai+*%22&q=%22kalangan+orang+Tionghoa+,+maka+penduduk+Tionghoa+di+pantai+*%22&hl=en&redir_esc=y. 

Ensiklopedia

• Gusti Asnan (2003). Kamus Sejarah Minangkabau. Padang: Pusat Pengkajian Islam dan Minangkabau. https://books.google.co.id/books/about/Kamus_sejarah_Minangkabau.html?id=ndZwAAAAMAAJ&redir_esc=y. Diakses pado 1 April 2020. 
• Thomas Spencer Baynes, ed (1887). Encyclopædia Britannica. 22 (edisi ke-9). New York: Werner Co.. 
• Henricus Christiaan Millies (1850). De Chinezen in Nederlandsch Oost-Indië en het Christendom: Eene Schets. https://books.google.co.id/books?id=1nNNAAAAcAAJ&dq=PADANG+ONGEVEer+700+chinezen&source=gbs_navlinks_s. 

Disertasi

• Erniwati (2011). "Cina Padang dalam Dinamika Masyarakat Minangkabau: Dari Revolusi sampai Reformasi". Jakarta: Jurusan Sejarah Universitas Indonesia. Diakses tanggal 1 April 2020. 

Jurnal

• Rahmi Surya Dewi (2018). "Hidup di Dunia Multikultural: Potret Sosial Budaya Kerukunan Etnis Minang dan Tionghoa di Kota Padang". Jurnal Lugas. Jurusan Ilmu Komunikasi Universitas Andalas. 2 (1). Diakses tanggal 1 April 2020. 
• Laila Kholid Alfirdaus; Eric Hiariej; Farsijana Adeney Risakotta (2014). "Politik Relasi Etnik: Matrilinealitas dan Etnik Minoritas Cina di Padang, Sumatra Barat". Jurnal Komunitas. Jurusan Sosiologi dan Antropologi Universitas Negeri Semarang. 6 (1). Diakses tanggal 1 April 2020. 
• Erniwati (2019). "Identitas Etnis Tionghoa Padang Masa Pemerintah Hindia Belanda". Jurnal Patanjala. Kementerian Pendidikan dan Kebudayaan Republik Indonesia. 11 (2). Diarsipkan dari versi asli tanggal 28 March 2020. Diakses tanggal 1 April 2020. 
• Nafriandi (2016). "Multikultural Ranah Minang: Interaksi Sosial dan Eksistensi Etnis Cina Padang". Jurnal Turãst. Institut Agama Islam Negeri Batusangkar. 4 (2). Diarsipkan dari versi asli tanggal 28 March 2020. Diakses tanggal 1 April 2020. 
• Nerosti (2002). "Pertunjukan Barongsai dalam Etnis Tionghoa di Kota Padang" (PDF). Jurnal Humanuis. Fakultas Bahasa dan Seni Universitas Negeri Padang. 5 (1). Diakses tanggal 1 April 2020. 
• Riniwaty Makmur; Engkus Kuswarno; Evi Novianti; Nuryah Asri Syafirah (2018). "Bahasa Minang Pondok dalam Komunikasi Antarbudaya Masyarakat Tionghoa Kota Padang". Jurnal Kajian Komunikasi. Fakultas Ilmu Komunikasi Universitas Padjadjaran. 6 (2). Diarsipkan dari versi asli tanggal 7 April 2020. Diakses tanggal 1 April 2020. 

Situs web

• Rahmat Irfan Denas (11 Februari 2021). "Jejak Panjang Tionghoa Padang: Sejak Abad ke-17 Berasimilasi hingga Sekarang Tetap Harmonis". Padangkita.com. Diakses tanggal 12 Februari 2021. 
• Balai Pelestarian Cagar Budaya Sumatra Barat (8 Juni 2017). "Klenteng See Hien Kiong". Direktorat Jenderal Kebudayaan Kementerian Pendidikan dan Kebudayaan Republik Indonesia. Diarsipkan dari versi asli tanggal 29 March 2020. Diakses tanggal 1 April 2020. 
• Balai Pelestarian Cagar Budaya Sumatra Barat (2018). "Deskripsi Cagar Budaya Tidak Bergerak Kota Padang Provinsi Sumatera Barat" (PDF). Direktorat Jenderal Kebudayaan Kementerian Pendidikan dan Kebudayaan Republik Indonesia. Diarsipkan dari versi asli (PDF) tanggal 21 February 2019. Diakses tanggal 1 April 2020. 
• "Sejarah Kedatangan Orang Cina di Kota Padang (2)". Padangkita.com. 23-10-2017. Diakses tanggal 1 April 2020. 
• "Pesona Kelenteng See Hin Kiong Padang". Padang.go.id. Diskominfo Kota Padang. 23-09-2018. Diakses tanggal 1 April 2020. 
• "Imlek, Prosesi Pernikahan China Peranakan Hanya Bertahan di Tiga Kota". Kompas.com. 5 Februari 2008. Diakses tanggal 1 April 2020. 
• Yola Sastra (8 Juni 2019). "Bakcang Ayam dan Lamang Baluo Yang Mempersatukan". Kompas.id. Diakses tanggal 1 April 2020. 
• Ismail Zakaria (5 Pebruari 2019). "Pesan Damai Imlek dari Padang". Kompas.id. Diakses tanggal 1 April 2020. 
• "Ada "Lipan" Terpanjang di Perayaan Cap Go Meh". Kompas.com. 10-02-2009. Diakses tanggal 1 April 2020. 
• Novia Harlina (4 Pebruari 2020). "Padang Siap Gelar Perayaan Cap Go Meh Paling Meriah Se-Indonesia". Liputan6.com. Diakses tanggal 1 April 2020. 
• "Digelar 19 Pebruari 2019, Cap Go Meh Bakal Dihadiri Menteri Pariwisata". Posmetro Padang. 7-02-2019. Diarsipkan dari versi asli tanggal 29 March 2022. Diakses tanggal 1 April 2020. 
• "Cap Go Meh 2020 Sukses, Perayaan Multi Etnik harus Berlanjut". Harian Haluan. 10-02-2020. Diakses tanggal 1 April 2020. 
• "Pawai Budaya Multikultur di Padang". Tempo.co. 25-08-2013. Diakses tanggal 1 April 2020. 
• "Kinmen Sets Guinness World Record for Pedestal Carrying". Taiwan Today. 16-05-2011. Diakses tanggal 1 April 2020. 
• "Pasar Malam Sincia, Potret Keberagaman dan Toleransi Padang". Republika.co.id. 10-01-2020. Diakses tanggal 1 April 2020. 
• Ikhwan Wahyudi (6-06-2019). "Bakcang dan Lamang Baluo Satukan Minang dan Tionghoa". LKBN Antara. Diakses tanggal 1 April 2020.