Lareh Koto Piliang

Lareh Koto Piliang adalah salah satu sistem adaik Minangkabau nan batumpu pado sistem aristokratis. Sistem adaik ko dikambangkan dek Datuak Katumanggungan, dan balaku di ampia sadoalah wilayah budayo Minangkabau, utamonyo Luhak Tanah Data, Luhak Limopuluah, jo Pasisia Selatan.

Istano Silinduang Bulan, marupakan contoh rumah gadang balareh Koto Piliang nan baanjuang di suok jo kidanyo.

Sistem adaik

Lareh Koto Piliang adolah sistem adaik Minangkabau nan dikambangkan dek Datuak Katumanggungan. Sistem adaik ko labiah otokratis, konservatif, jo condong pado agamo dibandiang Lareh Bodi Caniago sainggo muncua papatah nan manyabuik Koto Piliang jatuah pado agamo, sia nan mambunuah-sia dibunuah; Bodi Caniago jatuah ka adaik, ilang dicari, lapuak diganti.

Pado zaman saisuak, satiok lareh mampunyoi daerah surang-surang dek kaduo lareh mampunyoi prinsip nan babeda sainggo acok basalisiah dan punyo daerah surang. Satiok nagari bahkan mambuek benteng jo paga untuak maantisipasi parang di antaro lareh babeda. Bahkan, sampai ado teori nan manyabuikan baso Datuak Katumanggungan labiah mamiliah bakuaso di daerah pasisia (rantau) sadangkan Datuak Parpatih nan Sabatang bakuaso di darek untuak mailakan pasalisiahan. Dulunyo Lareh Koto Piliang bakambang di Luhak Limopuluah jo sabagian Luhak Tanah Data.

Pado nagari balareh Koto Piliang, pangulu-pangulunyo duduak indak samo tinggi sainggo rumah gadang inggo balai adaiknyo dibuek baanjuang. Dalan pawarisan gala adat diturunkan dari ayah ka anak. Sagalo putusan adaik jo paradilan disarahkan pado pangulu. Katiko ado sangketo adaik nan pantiang jo indak anyo soal salingkuang nagari, mangko dirundiangkan dalam rapek salareh. Kok indak tasalasaian mangko dibaok ka rapek saluhak. Kok alun juo baru kudian dibaok ka Bandaro atau Rajo Adaik. Baru sudah tu dibaok ka Rajo Alam kok alun juo salasai.

Sistem nan dipakai dalam pamarintahan Karajaan Minangkabau (Pagaruyuang) pun mamakai sistem Lareh Koto Piliang. Rajo nan Tigo Selo maupun Basa Ampek Balai nan ditunjuak umumnyo barasa dari Koto Piliang sainggo dalam urusan jo rajo pun mamakai aturan lareh Koto Piliang. Hanyo pimpinan tatantu nan buliah maambiak sikap biaso di muko rajo di antaronyo Datuak Bandaro nan Kuniang, pangulu Limo Kaum nan marupokan pimpinan Bodi Caniago nan alah bakadudukan tinggi.

Pangulu dari Koto Piliang jo Bodi Caniago dapek barundiang basamo. Katiko ado masalah nan malibaikan kaduo lareh ko, mangko dibaok ka Balai nan Panjang di Nagari Pariangan. Nagari ko salain sabagai nagari paliang tuo, dianggap pulo sabagai nagari nan indak mamihak ka salah satu lareh, sainggo disabuik pulo jo istilah Lareh nan Panjang. Kini kaduo lareh ko alah payah untuak dibedaan karena sifaik dari adaik Minangkabau nan demokratis nan dapek barubah sasuai kaadaan. Sainggo dalam ciek nagari bisa sajo kaduo lareh ko sairiang sajalan.

Ciri-ciri

• Dalam maabiak putusan manuruik arahan pimpinan (pangulu/rajo). Titiak dari ateh, turun dari tanggo. Tabujua lalu tabalintang patah, kato surang gadang sagalo iyo, ikan gadang dalam lauik, ikan ketek makannyo, nan mailia dipalik, nan manitiak ditampuang.
• Kadudukan pangulu batingkek-tingkek, yaitu pangulu andiko, pangulu suku, jo pangulu pucuak. Pangulu pucuak disabuik juo sabagai pucuak nagari. Bapucuak bulek, baurek tunggang
• Corak rumah gadangnyo mampunyoi anjuang kida jo suok, ado pulo nan balabuah gajah di tangah-tangahnyo. Anjuang kida jo suok adolah tampek nan ditinggikan, untuak manampekan pangulu-pangulu sasuai jo fungsi atau tingkatannyo. Bajanjang naiak, batanggo turun
• Gala pusako (pangulu) indak bisa digantikan, sabalun panyandang gala maningga.

Malaysia

Di Malaysia, adaik ko tanamo jo Adat Temenggong, jo sistem warih nan maikuik garih ayah. Sistem iko disebarkan dek parantau Minangkabau pado abaik ka-15 di Karajaan Malaka dan kudian dipakai di wilayah lainnyo. Adat Temenggung balaku di sadoalah nagara bagian samananjuang Malaysia, kacuali Nagari Sambilan.

Suku-suku

• Suku Koto
• Suku Piliang

Daftar pustaka

• Sangguno Diradjo, Dahler Abdul Madjid, Radjo Mangkuto (Datuk); Mustika Adat Alam Minangkabau‎; Proyek Penerbitan Buku Bacaan dan Sastra Indonesia dan Daerah, 1979
• Amran, Rusli (1981). Sumatera Barat hingga Plakat Panjang. I. Jakarta: Sinar Harapan. 

Pautan lua

• http://mozaikminang.wordpress.com/2009/10/25/perbedaan-adat-koto-piliang-dengan-bodi-caniago/
• http://pelaminanminang.com/adat-minangkabau/lareh-sistem-politik-masyarakat-minangkabau.html Archived 2020-08-04 di Wayback Machine.