Buka menu utama

Rumah Gadang

rumah adaik di Minangkabau
Rumah gadang nan ado di Nagari Pandai Sikek jo duo buah Rangkiang di mukonyo

Rumah Gadang atau Rumah Godang adolah namo untuak rumah adaik Minangkabau nan banyak dijumpoi di propinsi Sumatera Barat, Indonesia. Rumah iko bafungsi sabagai tampek tingga basamo jo tampek diadoannyo acara-acara adaik di Minangkabau.[1]. Namo lain untuak rumah ko iolah Rumah Bagonjong, dek adonyo atok malangkuang tajam nan disabuik gonjong. Ado pulo nan manyabuiknyo sabagai Rumah Baanjuang, dek adonyo anjuang di sisi kida atau suok pado Rumah Gadang tipe Lareh Koto Piliang.[2]

Ado aturan adaik dalam pandirian sabuah Rumah Gadang sainggo indak sadoalah wilayah Minangkabau buliah mandirian rumah adaik iko. Rumah Gadang anyo buliah didirian di wilayah darek nan alah bastatus sabagai nagari sajo, baitu pulo di rantau. Salain di Sumatra Barat, rumah gadang dapek pulo dijumpoi di Nagari Sambilan, Malaysia nan biaso disabuik Rumah Tradisional Nagari Sambilan.[3]

Daftar isi

FungsiSuntiang

 
Rumah gadang model kini nan ado di Nagari Padang Laweh

Rumah Gadang bafungsi sabagai tampek tingga basamo, nan mampunyoi aturan-aturan jo tata krama. Jumlah biliak tagantuang jo jumlah padusi nan tingga di dalamnyo. Satiok padusi dalam kaum nan alah balaki mandapekan ciek biliak. Samantaro itu padusi nan alah gaek jo anak-anak mandapekan biliak di dakek dapua. Sadangkan gadih remaja mandapekan biliak basamo di ujuang Rumah Gadang.

Sadoalah bagian dalam Rumah Gadang marupoan ruangan lapeh kacuali tampek lalok. Bagian dalam tabagi dari lanjar jo ruang nan ditandoi dek tiang-tiang. Tiang nan babanjar dari muko ka lakang manandoi lanjar, sadangkan tiang nan babanjar dari kiri ka kanan manandoi ruang. Biasonyo ado duo atau tigo lanjar di Rumah Gadang, tagantuang jo gadang rumah. Manuruik adaik, jumlah ruangnyo paliang indak ado limo, idealnyo sambilan.

Rumah Gadang biasonyo dibangun di ateh tanah milik kaluarga induak dalam kaum sacaro turun tamurun [4], nan hanyo diwarihan dari padusi ka padusi dalam kaum [5]. Dilaman mukonyo, biasonya ado duo buah Rangkiang, nan digunoan untuak manyimpan padi. Ruang nan ado pado ujuang kanan jo ujuang kiri Rumah Gadang disabuik anjuang, nan bafungsi sabagai tampek anak daro jo marapulai sarato tampek barubek pangulu. Indak jauah dari tampek Rumah Gadang didirian, biasonyo dibangun ciek buah surau kaum, nan bafungsi sabagai tampek ibadah, tampek pandidikan jo tampek tingga laki-laki dalam kaum nan alah gadang jo nan alun manikah.

ArsitekturSuntiang

Arsitektur pado Rumah Gadang mampunyoi ciri khas nan babeda jo rumah adaik lain nan ado di Indonesia, tautamo bantuak puncak atoknyo nan runciang manyarupoi tanduak kabau. Dahulunyo atok Rumah Gadang dibuek dari bahan ijuak nan dapek tahan hinggo puluahan taun [5]. Rumah Gadang babantuak ampek persegi panjang nan tadiri dari bagian muko jo bagian lakang. Bagian muko Rumah Gadang biasonya panuah jo ukiran nan umumnyo bamotif aka, bungo, daun jo bidang geometri [6]. Sadangkan bagian lakangnyo nan di lua dilapihi jo bambu.

Bangunan Rumah Gadang iko dibuek gadang ka ateh, namun indak mudah rabah dek guncangan [6]. Salain itu, satiok elemen dari Rumah Gadang mampunyoi makna surang nan dilatari dek tambo nan ado dalam adaik jo budayo masyarakaik Minangkabau. Pado umumnyo Rumah Gadang mampunyoi ciek janjang nan talatak pado bagian muko. Samantaro itu, dapuanyo dibuek tapisah pado bagian lakang rumah nan baimpikan jo dindiang.

Elemen arsitekturSuntiang

Satiok elemen Rumah Gadang mampunyoi maknanyo surang, nan marujuak pado mamangan adaik Minangkabau. Elemen atau unsua nan tamasuak di antaronyo:

 
Interior Istano Basa Pagaruyuang, nampak area mamanjang nan umum pado rumah gadang. Lantai duo tingkek manunjuakan kakhususan untuak istano.
  • gonjong, struktur atok nan co tanduak kabau
  • singok, dindiang segitiga nan di baruah ujuang gonjong
  • pereng, papan rak nan di baruah singkok
  • anjuang, lantai nan maninggi di ujuang pado salah satu jinih rumah gadang
  • dindiang ari, dindiang nan di katinggian sampiang
  • dindiang tapi, dindiang nan di katinggian muko jo balakang
  • papan banyak, papan di fasad muko
  • papan sakapiang, papan nan baderet pado pinggiran rumah
  • salangko, dindiang untuak manutuik ruang bawah rumah nan dibangun sacaro pangguang

Babarapo simbolisme pado bagian rumah, misanyo, gonjong barubuangan jo manjangkau tuhan sarato dindiang tapi, nan sacaro tradisi tabuek dari anyaman bambu, malabangkan kakuatan jo kagunoan kaum nan tabantuak katiko saurang Minangkabau manjadi bagian dari kaum nan labiah gadang pado inyo tagak surang sajo.

Rangkiang idealnyo ado di muko rumah gadang, nan mampunyoi namo jo fungsi nan babeda-beda. Rangkiang sitinjau lauik, barisi bareh untuak kaluarga, khususnyo untuak acara adaik. Rangkiang sitangka lapa barisi bareh untuak disumbangkan ka urang nan indak mampu atau tajadi kalaparan di kampuang. Rangkiang sibayau-bayau barisi bareh untuak kabutuahan sahari-hari kaluarga.

Jinih-jinih rumah gadangSuntiang

Sacaro umum, ado duo jinih rumah gadang manuruik lareh nan dianuik suku atau nagari dima rumah gadang didirian, yaitu[7]:

  • Rumah Gadang Lareh Koto Piliang
  • Rumah Gadang Lareh Bodi Caniago

Rumah gadang lareh Koto Piliang mamiliki anjuang di sisi kiri jo/atau kanan rumah gadang, sainggo disabuik Rumah Baanjuang. Anjuang marupokan bagian rumah gadang nan lantainyo labiah tinggi pado bagian lain rumah. Hal iko dikaranokan kapamimpinan dalam Lareh Koto Piliang nan otokrasi (batingkek-tingkek). Rumah gadang tipe ko banyak dibangun di Luhak Tanah Data.[7]

Babeda jo lareh Koto Piliang, rumah gadang lareh Bodi Caniago indak mampunyoi anjuang. Sainggo lantai pado rumah gadang jinih ko nampak samo tinggi. Hal iko dikaranokan kapamimpinan dalam Lareh Bodi Caniago nan demokrasi. Rumah gadang jinih ko banyak basobok di Luhak Agam jo Luhak Limopuluah Koto. Walaupun baitu, pambagian ruang di dalamnyo sacaro umum samo antaro kaduo lareh ko.[7]

Salain manuruik anjuang nan ado pado rumah gadang, ado banyak tipe lain dari rumah gadang. Pabedaan di antaro tipe-tipe rumah gadang bisa dari bantuak, dindiang, jumlah ruang, tonggak, surambi, bahkan gonjong.

Rumah Gadang di darekSuntiang

Rumah gadang di darek mampunyoi pabedaan jo rumah gadang nan ado di kawasan rantau, baiak nan di pasisia timur maupun pasisia barat. Pabedaan nan mancolok yaitu bantuak atoknyo nan bagonjong, sainggo rumah gadang nan ado di darek biaso disabuik jo rumah bagonjong. Pandirian rumah gadang bagonjong di darek ado aturan adatnyo surang. Rumah bagonjong anyo buliah dibangun di daerah nan alah bastatus nagari.

Rumah Gadang Gajah MaharamSuntiang

Rumah Gadang Sitinjau LauikSuntiang

Rumah Gadang Surambi PapekSuntiang

Rumah Gadang Rajo BabandiangSuntiang

Rumah Gadang Surambi AcehSuntiang

 
Rumah Gadang Surambi Aceh Bagonjong Ciek

Rumah Gadang Surambi Aceh marupokan jinih rumah gadang nan paliang banyak taseba di Kabupaten Solok jo Solok Selatan. Sasuai namonyo, ciri khas rumah gadang ko nampak dari adonyo surambi pado bagian muko rumah, sakaligus manjadi pintu masuak rumah. Hal iko tapangaruah jo arsitektur Aceh samaso wilayah kakuasoan Kasutanan Aceh alah mambantang inggo pasisia barat Sumatera Barat. Pado maso tu, tujuan adonyo surambi adolah subagai tampek manarimo tamu, khususnyo tamu nan urang kolonial.[8]

Manuruik jumlah gonjong nan ado pado surambinyo, Rumah Gadang Surambi Aceh tabagi duo jinih yaitu:[8]

  • Rumah Gadang Surambi Aceh Bagonjong Ciek
  • Rumah Gadang Surambi Aceh Bagonjong Duo

Rumah Gadang Surambi Aceh kini masih banyak basobok di kawasan pagunuangan di Sumatera Barat, khususnyo di Solok jo Solok Selatan. Salain itu, di Kawasan Saribu Rumah Gadang, Nagari Sungai Pagu, Solok Selatan, jinih ko masih banyak dipakai. Pado bangunan modern, rumah gadang ko lah diadopsi pado Hotel Bumiminang, hal itu nampak pado bagian pintu utamonyo nan saakan-akan mambantuak Surambi Bagonjong Duo.

Rumah Gadang di RantauSuntiang

Rumah gadang di rantau, baiak nan di pasisia barat ataupun timur, dibangun indak jo atok gonjong. Atok nan bangun kadang dibuek agak malangkuang sarupo Rumah Lontiok, atau bahkan indak malangkuang samo sakali sarupo Rumah Tungkuih Nasi. Dek kareno indak ado gonjongnyo ko lah, masyarakaik acok salah manganggapnyo bukan rumah gadang.

Rumah di daerah rantau biasonyo tapangaruah arsitektur lua sarupo Aceh, Malayu,[9] Nieh, bahkan Ulando.[10] Walaupun baitu, pambangunan bangunan rumah gadang ko masih tetap bakaitan jo aturan adat Minangkabau nan materilineal.

Kajang PadatiSuntiang

 
Balai Kota Padang nan baru siap dibangun di Aia Pacah, Padang, manggantian balai kota lamo di dakek Pasaraya Padang.

Rumah Gadang Kajang Padati marupokan jinih rumah gadang nan ado di kawasan rantau pasisia barat, khususnyo di Kota Padang, Sumatera Barat.[11] Dinamokan kajang padati dek karano bantuaknyo sarupo jo panutuik padati (kajang padati). Rumah gadang jinih ko babeda sangaik jo nan ado di darek. Pabedaan nan paliang jaleh yaitu pado atoknnyo nan bukan bagonjong, namun agak malangkuang saketek di atehnyo. Hal ko dek karano Padang marupokan kawasan rantau. Bantuak rumah gadang ko dipangaruahi dek arsitektur kolonial nan panah manguasoi Padang dahulu, sarupo Aceh. Pangaruah Aceh di antaronyo buliah nampak pado bantuak janjang sarato ukiran-ukiran nan ado.[11] [12]

Rumah gadang ko biasonyo tabuek dari kayu laban, banio, kalek, jo rasak. Dalam pambangunannyo, rumah ko dibangun jo orientasi maadok ka batang aia. Kini rumah gadang Kajang Padati lah mulai jarang dibangun. Namun, masih banyak di sakitar Kuranji jo Pauah.[11] Subagai upayo palastariannyo, Rumah Gadang Kajang Padati pun lah mulai diadaptasi dalam bangunan-bangunan miliak pamarintah Kota Padang, salah satunyo pado Balaikota Padang.

Tungkuih NasiSuntiang

Rumah Gadang Tungkuih Nasi marupokan salah satu jinih rumah gadang nan biaso tasuo di kawasan rantau pasisia barat Sumatera,[10] sarupo di Pariaman, Padang, jo Pasisia Selatan. Sarupo jo Rumah Gadang Kajang Padati, Rumah Gadang Tungkuih Nasi indak mamakai gonjong pado atoknyo. Sasuai namonyo, bantuak atoknyo saakan-akan manyarupoi tungkuih atau pambungkuih nasi.[12]

Rumah Godang Kuantan SingingiSuntiang

Rumah Gadang dalam dialek Kuantan Singingi disabuik Rumah Godang. Kuantan Singingi, Riau, nan tamasuak wilayah rantau Minangkabau mampunyai bantuak rumah godangnyo surang. Rumah Godang Kuantan Singingi ko mampunyoi bantuak nan ampiang sarupo jo Rumah Lontiok nan ado di Kampar, Riau,[13] di mano babantuak rumah pangguang nan baratok malangkuang lantiak (lontiok).[14] Namun, bantuak atok nan batingkek mambueknyo babeda jo jinih rumah gadang lainnyo. Salah satu Rumah Godang Kuantan Singingi nan tanamo yaitu Rumah Godang Datuak Bisai di Kecamatan Kuantan Tangah, Kabupaten Kuantan Singingi, Riau.[15]

 
Rumah Lontiok nan ado di Anjungan Riau, TMII, Jakarta.

Rumah LontiokSuntiang

Rumah Lontiok marupokan evolusi dari rumah gadang di Kabupaten Kampar, Riau.[9] Ciri khasnyo nampak dari bantuak atoknyo nan malangkuang lantiak, dek itu rumah ko dinamoan Rumah Lontiok (lantiak). Bantuak atoknyo babeda jo rumah gadang di wilayah darek nan mamakai gonjong nan malangkuang tajam.[16]

Rumah Tradisional Nagari SambilanSuntiang

 
Istano Ampang Tinggi, Seremban, Nagari Sambilan, Malaysia

Rumah Tradisional Nagari Sambilan marupokan bantuak evolusi dari rumah gadang di Nagari Sambilan, Malaysia. Rumah ko dibangun dek urang Minangkabau nan marantau ka Nagari Sambilan lalu barasimilasi jo Urang Asali Semenanjung Malaysia.[17] Dek karano itu, rumah ko ado tapangaruah unsua arsitektur satampek. Salah satu kakhasan dari rumah ko iolah pado atoknyo nan malangkuang lantiak jo panjang sainggo rumah ko disabuik juo jo Rumah Bumbung Panjang Negeri Sembilan (Rumah Baratok Panjang Nagari Sambilan).[18]

Rumah ko masih banyak ditamukan di Nagari Sambilan, Malaysia. Di antaro Rumah Nagari Sambilan nan tanamo yaitu, Istano Ampang Tinggi jo Istano Sori Monanti di Seremban, Nagari Sambilan.

Proses pambangunanSuntiang

Manuruik tradisinyo, tiang utamo Rumah Gadang nan disabuik tonggak tuo ko bajumlah ampek buah/batang nan diambiak dari hutan sacaro bagotong royong dek anak nagari, tarutamo kaum kirabaik, sarato malibaikan puluahan urang. Batang kayu nan ditabang biasonyo adolah pohon jua nan alah tuo jo luruih sarato badiameter antaro 40 cm inggo 60 cm. Pohon jua tanamo dek kareh jo kuek. Sasudah dibaok ka dalam nagari, pohon tu indak langsuang dipakai, namun dirandam daulu di tabek miliak kaum salamo batahun-tahun.

Sasudah cukuik wakatu, batang kayu tu diangkek atau dibangkik untuak dipakai sabagai tonggak tuo. Prosesi mangangkek/mambangkik kayu tu disabuik juo subagai mambangkik batang tarandam, kudian proses pambangunan Rumah Gadang balanjuik ka prosesi barikuiknyo, managakan tonggak tuo atau tiang utamo sabanyak ampek buah, nan dipandang sabagai managakan basa.

Batang pohon nan alah dirandam salamo batahun-tahun tu kudian manjadi kareh bana jo indak bisa dimakan anai-anai, sainggo bisa batahan sabagai tonggak tuo salamo ratusan tahun. Parandaman batang pohon nan ka dijadian tonggak tuo salamo batahun-tahun tu marupokan salah satu kunci nan mambuek Rumah Gadang tradisional mampu batahan malintasi zaman.

UkiranSuntiang

Pado bagian dindiang Rumah Gadang dibuek dari papan, sadangkan bagian lakangnyo dibuek dari bambu. Papan dindiang dipasang vertikal, samantaro itu sadoalah papan nan manjadi dindiang jo manjadi bingkai diagiah ukiran, sahinggo saluruah dindiang manjadi panuah dek ukiran.

Pado dasanyo ukiran pado Rumah Gadang marupoan ragam hias pangisi bidang dalam bantuak garih malingka atau persegi. Sacaro umum, motifnyo adolah tumbuhan marambek, aka nan badaun, babungo jo babuah. Pola aka biasonyo babantuak lingkaran, aka baririk, bahimpikan, bajalinan jo sambuang manyambuang. Salain itu, cabang atau rantiang akanyo bakaluak ka lua, ka dalam, ka ateh jo ka bawah.

AdopsiSuntiang

Paviliun Malaysia di World Shanghai Expo 2010 nan mangadopsi desain Rumah Gadang Negeri Sembilan.

Kaunikan bantuak atok Rumah Gadang nan malangkuang tajam, alah manginspirasi babarapo arsitek di balahan nagari lain, sarupo Ton van de Ven di Balando nan mangadopsi desain Rumah Gadang pado bangunan The House of the Five Senses. Bangunan nan dioperasikan sajak tahun 1996 itu digunokan sabagai pintu masuak utamo dari Taman Hiburan Efteling.[19] Bangunan satinggi 52 meter jo laweh atok 4500 meter persegi itu marupokan bangunan bakonstruksi kayu jo atok jirami nan tagadang di dunia manuruik Guinness Book of Records.

Desain Rumah Gadang nan banyak ado di Negeri Sembilan diadopsi pulo pado bangunan paviliun Malaysia di World Shanghai Expo 2010 nan taselenggara di Shanghai, RRT pado tahun 2010.[20]

SimbolSuntiang

Gonjong (bagian atok nan malangkuang tajam) Rumah Gadang manjadi simbol atau ikon bagi urang Minangkabau, basamo jo ikon lainnyo sarupo rono hitam-sirah-kuniang ameh, randang, dan lainnyo. Hampia sadoalah kantua pamarintahan di Sumatera Barat mamakai desain Rumah Gadang jo atok gonjongnyo, walaupun dibagun sacaro permanen jo simin sarato batu. Ikon gonjong dipakai pulo di bagian muko rumah makan Padang nan ado di babagai wilayah di lua Sumatera Barat. Logo-logo limbago atau pakumpulan urang Minangkabau pun banyak nan mamakai ikon gonjong jo sagalo variasinyo.

GaleriSuntiang

Rumah Gadang saisuak nan baatok ijuak

Rumah Gadang kini

Bangunan nan mangadopsi desain Rumah Gadang

Caliak puloSuntiang

RujuakanSuntiang

  1. Rumah Gadang Sumatera Barat Serba Unik Pado 11 Juli 2011.
  2. Navis, A.A., Cerita Rakyat dari Sumatera Barat 3, Grasindo, ISBN 979-759-551-X.
  3. Ismail, N. H., Yunus, S. K., & Surat, M. (2016). Reka Bentuk Rumah Tradisional Negeri Sembilan Dipengaruhi oleh Adat dan Kedaerahan. Wacana Seni Journal of Arts Discourse, 15.
  4. Graves, Elizabeth E., (2007), Asal-usul elite Minangkabau modern: respons terhadap kolonial Belanda abad XIX/XX, Jakarta:Yayasan Obor Indonesia, ISBN 978-979-461-661-1.
  5. a b Dawson, Barry; Gillow, John (1994), The Traditional Architecture of Indonesia, London: Thames and Hudson, ISBN 0-500-34132-X.
  6. a b Navis, A.A., Cerita Rakyat dari Sumatera Barat 3, Grasindo, ISBN 979-759-551-X.
  7. a b c Bahauddin, A., Hardono, S., Abdullah, A., & Maliki, N. Z. (2013). The Minangkabau House–A Vision Of Sustainable Culture And Architecture. International Journal of Design & Nature and Ecodynamics, 8(4), 311-324
  8. a b Abdullah, M., Antariksa, A., & Suryasari, N. (2015). Pola Ruang Dalam Bangunan Rumah Gadang Di Kawasan Alam Surambi Sungai Pagu–Sumatera Barat. Jurnal Mahasiswa Jurusan Arsitektur, 3(1).
  9. a b Yunus, Shahrul Kamil; Shahminan, Raja Nafida Raja; Surat, Mastor (2014). "IDENTITI RUMAH TRADISIONAL NEGERI SEMBILAN MELALUI EVOLUSI REKA BENTUK". Journal of Design + Built 7. ISSN 1985-6881. http://spaj.ukm.my/jsb/index.php/jdb/article/view/145. 
  10. a b Susilo, W. H. (2014). Budaya masyarakat dalam membangun rumah vernakular di Pesisir Pantai. Masyarakat, Kebudayaan dan Politik, 27(1), 55-64.
  11. a b c Aryanti, D. (2009). Tipologi Rumah Tradisional Padang (Studi Kasus: Kecamatan Kuranji/Nagari Pauh IX). Jurnal Universitas Bung Hatta, Padang.
  12. a b Setijanti, P., Silas, J., & Firmaningtyas, S. (2012). Eksistensi Rumah Tradisional Padang dalam Menghadapi Perubahan Iklim dan Tantangan Jaman. Simposium Nasional RAPI XI FT UMS. ISSN : 1412-9612
  13. Gushendri, G., Hidayat, W., & Rijal, M. (2015). Transformasi Bentuk Arsitektur Rumah Godang Pada Perancangan Museum Jalur Kuantan Singingi. Jurnal Online Mahasiswa (JOM) Bidang Teknik dan Sains, 2(1), 1-15.
  14. Paradita, D. S. (2016). Makna Ruang Rumah Godang Di Kenegerian Sentajo, Kuantan Singingi, Riau (Doctoral dissertation, Institut Seni Indonesia Yogyakarta).
  15. BPCB Sumbar. (2017, 19 Desember). Rumah Gadang Datuk Bisai. Diperoleh 12 Februari 2019, dari https://kebudayaan.kemdikbud.go.id/bpcbsumbar/rumah-gadang-datuk-bisai/
  16. Hardianti, Siti (2017) (dalam bahaso id). Fungsi Dan Makna Ornamen Rumah Lontiok di Bangkinang Kabupaten Kampar : Kajian Semiotik. http://repository.usu.ac.id/handle/123456789/68226. 
  17. Ismail, N. H., Yunus, S. K., & Surat, M. (2016). Reka Bentuk Rumah Tradisional Negeri Sembilan Dipengaruhi oleh Adat dan Kedaerahan. Wacana Seni Journal of Arts Discourse, 15.
  18. Ismail, N. H., Yunus, S. K., & Surat, M. (2016). Reka Bentuk Rumah Tradisional Negeri Sembilan Dipengaruhi oleh Adat dan Kedaerahan. Wacana Seni Journal of Arts Discourse, 15.
  19. "Wow, Bangunan Asli Indonesia Ini Dijiblak Negara Lain" Liputan6.com, 25 Maret 2015. Diakses 16 Agustus 2015.
  20. "Rumah Gadang Digunakan Malaysia di Forum Dunia" JPNN.com, 07 Mei 2010. Diakses 09 Agustus 2015.