Pangulu

Pangulu atau Panghulu dalam bahaso Melayu Kuno, samo jo pa'hulu, marupokan urang nan punyo kadudukan di mayarakaik nan satara jo rajo atau samo juo jo datuak.

Iriang-iriangan batagak pangulu

Sasudah masuaknyo Islam, sebutan pangulu juo dipakai untuak salah surang nan batugas atau bawenang dalam legalitas suatu panikahan dalam agamo Islam atau Panghulu Nikah (sabutan lainnyo Tuan Kadhi)

Pangulu di Minang

Pado mulonyo istilah pangulu, dipakai dalam susunan struktur pamarintahan nagari di wilayah Minangkabau, dimano surang pangulu juo marupokan pamangku adaik sarato bagala datuak. Salanjuiknyo dalam susunan sabuah nagari ado struktur kakuasoan nan dimuloi dari pangulu, malin, manti, jo dubalang. Dari stuktur itu, kudian disatuan jo istilah Urang Ampek Jinih (ampek urang jo fungsinyo surang).

Dalam suatu nagari, malin atau kadangkalo disabuik juo jo imam, batugeh dalam untuak urusan agamo di dalam suatu suku sarato batangguang jawek dalam pamasalahan adaik nan takaik jo agamo (Islam). Manti barubuangan jo fungsi adaik, di antaronyo manangani kaluahan warga ateh palanggaran adaik, batindak dalam urusan pangadilan sarato manjadi juru tulis. Dubalang bafungsi samo jo fungsi polisi, batuges manangani masalah kaamanan atau mangamankan nagari dari sarangan lua ataupun konflik intern nan tajadi antar kaum-kirabaik di dalam sabuah nagari.

Saurang pangulu dalam suku tatantu, disabuik jo pangulu suku, tapi biasonyo diimbau jo pangulu sajo. Inyo diagiah gala kahormatan datuak (disingkek Dt.). Inyo barado pado puncak hierarki adaik mawakili sukunyo. Dek co itu, inyo diagiah tangguang jawek untuak managakan asas adaik nan ka bapagaruah ka sukunyo jo maatua hubuangan antaro sukunyo jo suko nan lain, sukunyo jo nagari, sukunyo jo lingkungan nan labiah gadang. Pangulu mawakili saran-saran dari anggota sukunyo dalam pamarintahan nagari. Tugas nan paliang pantiang adolah pambagian lahan-lahan nan dianggap tanah ulayaik, tugas-tugas manjago rimbo jo kapamilikan kaum lainnyo.

Satiok suku-suku di Minang mampunyoi struktur pangulu jo galanyo surang-surang. Tinggi randahnyo kadudukan pangulu dalam adaik Minang amaik dipangaruahi jo kaumnyo dan hal iko mamangaruahi status surang pangulu untuak dapek mangatua sarato mangalola sabuah nagari kudiannyo. Umumnyo pado sabuah nagari, suku-suku awa pado nagari tu mampunyoi dominasi ateh suku-suku nan datang kudian. Salain mampunyoi tanah atau sawah nan laweh, pangulu-pangulu dari suku-suku awa ko juo ditampekan pado posisi tahoromaik dibandiang pangulu dari suku-suku nan jolong tingga.

Patamuan pangulu sa-Minangkabau, kiro-kiro taun 1911.

Jabatan pangulu dalam sistem matrilineal Minangkabau tadiri dari tingkatan sabagai barikuik.

• Pangulu suku, pangulu nan manjadi pamimpin suku sarato marupokan pangulu andiko (utamo), nan dapek pulo disabuik pangulu pucuak (Koto-Piliang) jo pangulu tuo (Bodi-Caniago).
• Pangulu payuang, pangulu nan manjadi pamimpin warga suku nan alah mamisahan diri dari kaum sukunyo dek pakambangan jumlah warga suku tasabuik.
• Pangulu induak (turunan), pangulu nan manjadi pamimpin warga suku nan alah mamisahan diri dari kaum sapayuangnyo.

Syaraik pangulu

Sasuai jo papatah Minangkabau: dari niniak ka mamak, dari mamak ka kamanakan, jabatan pangulu diwarihan sasuai jo garih matrilineal. Sadoalah laki-laki di Minangkabau dapek manjadi pangulu manuruik hubuangan patalian kamanakan. Ado ampek jinih kamanakan dalam struktur kabudayaan Minangkabau.

• Kamanakan di bawah daguak, marupokan kamanakan nan ado hubuangan patalian darah.
• Kamanakan di bawah dado, marupokan kamanakan nan ado hubuangan dek sukunyo samo, walaupun pangulunyo babeda.
• Kamanakan di bawah pusek, marupokan kamanakan nan ado hubuangan dek sukunyo samao tapi nagarinyo babeda.
• Kamanakan di bawah lutuik, marupokan kamanakan nan sabalunnyo babeda suku jo nagari tapi alah mamintak palinduangan sarato manjadi warga suku tasabuik.

Mekanisme diangkeknyo pangulu

Dalam budayo Minangkabau pandirian pangulu baru disabuik Batagak Pangulu. Babarapo macam mekanisme di antaronyo

• Mati batungkek budi, managakan pangulu baru dek pangulu nan lamo maningga dunia.
• Mambangkik batang tarandam, managakan pangulu baru sasudah batahun-tahun indak dapek dilaksanokan dek alun adonyo biaya nan cukuik untuak mangadoan Malewa Gala.
• Mangambangkan nan talipek, managakan pangulu baru dek sabalunnyo alun ado kato supakaik dalam kaum.
• Manurunkan nan tagantuang, managakan pangulu baru dek calon sabalunnyo alun cukuik umua.
• Baju sahalai dibagi duo, managakan pangulu baru dek pakambangan warganyo sainggo paralu pangulu lain salain pangulu nan lah ado.
• Mangguntiang siba baju, managakan pangulu baru dek sangketo dalam suku sainggo suku tasabuik dibalah dan mampunyoi pangulunyo surang-surang.
• Gadang manyimpang, mangakan pangulu baru dek kaum nan nio mamisahan diri dari pimpinan pangulu nan lah ado.
• Bungo bakarang, pambarian status pangulu nan mambaok gala datuak ka bakeh salah surang nan dek kato sapakaik pangulu nan ado di nagari tampeknyo tingga. Gala ko indak dapek diwarihan dek gala ko samacam gala kahormatan bakeh urang nan basangkutan sajo.

Pangulu di Malaysia

Pangulu di Malaysia digunokan untuak sebutan katua tatinggi dari kawasan mukim, dimano dalam sabuah mukim ado babarapo kampuang, dan kampuan ka dipimpin pulo dek katua kampuang. Pangulu dilantiak jo batangguang jawek ka bakeh karajaan nagari.

Rujuakan

Daftar pustaka

• Kozok, Uli (2006). Kitab Undang-Undang Tanjung Tanah: Naskah Melayu nan Tertua. Jakarta: Yayasan Obor Indonesia. ISBN 979-461-603-6. 
• Claire, Holt (2007). Culture and Politics in Indonesia Modernization in the Minangkabau World by Taufik Abdullah. Jakarta: Equinox Publishing. ISBN 978-979-3780-57-3. 
• A. Dt, Madjoindo (1959). Tambo Minangkabau dan Adatnya. Jakarta: Balai Pustaka. ISBN 978-979-461-661-1. 
• Graves, Elizabeth (2007). Asal Usul Elite Minangkabau Modern. Jakarta: Yayasan Obor Indonesia. ISBN 978-979-461-661-1. 
• Westenenk, L. C. (1918). De Minangkabausche Nagari. Weltevreden: Visser. p. 59. 
• Navis, A. A. (1984). Alam Terkembang Jadi Guru. Jakarta: PT.Grafiti Pers.