Silek

Silek Minang (Jawi: سيليق مينڠ) marupoan suatu seni bela diri tradisional khas anak nagari di Minang nan alah bakambang sajak lamo. Silek nan sabana asli dari Minang manuruik urang tuo-tuo disabuik jo namo Silek Tuo, disampiang iko ado juo aliran silek nan alah lamo tanamo di nagari-nagari tatentu, contoh Sitaralak, Kumango, Lintau, Luncua, Pauah, Gulo Tareh, Harimau, jo lain-lainnyo.

Silek Minang (1929).

Umumnyo, ado persyaratan nan haruih dipanuhi sabalun murid baraja silek. Murid haruih manyadioan bareh, pinjaik, pisau, jo kain kafan, nan mano adolah simbol dari sifat urang pandeka Minang: musuah indak dicari, kok basuo pantang diilakkan.

Ado babarapo macam bantuak silek:

1. Silek pancak nan labiah mangatangahan seni pementasan/randai
2. Silek prestasi barupo ulahrago nan manuruik aturan-aturan IPSI
3. Silek tradisi, silek nan sabana silek untuak awak panjago diri

Wakatu nan ditantuan untuak baraja silek tradisi ko kadang malam hari bagai, umumnyo sasudah sumbayang Isya. Murid-murid nan baraja biasonyo tagak baputa mangaliliangi gelanggang tampek baraja silek, dima guru malatiah jo manjago keselamatan murid-murid sadonyo.

Filosofi jo tujuan

Randai, tarian Minangkabau nan mangadopsi garakan silek.

Wilayah Minangkabau di bagian tangah Sumatra sabagaimano daerah di kawasan Nusantara lainnyo adolah daerah nan subur jo panghasia rampah-rampah sajak abad partama Masehi. Dek karano itu, tantu sajo ancaman-ancaman kaamanan bisa sajo datang dari pihak pandatang ka kawasan Nusantara ko. Jadi sacaro fungsinya silek dapat dibedakan manjadi duo yakni sabagai panjago diri jo parik paga dalam nagari atau sistem patahanan nagari.

Untuk duo alasan ko, makonyo masarakaik Minangkabau pado tempo dulunyo paralu mamiliki sistem patahanan nan ancak untuak mampartahankan diri jo nagarinyo dari ancaman musuah pabilo sajo. Silek indak sajo sabagai alat untuak beladiri, tapi juo mangilhami atau manjadi dasar garakan babagai tarian jo randai dalam Minangkabau . Emral Djamal Dt Rajo Mudo (2007) parnah manjalehan bahsonyo pangambangan garakan silek manjadi seni adolah strategi dari niniak moyang Minangkabau supayo silek salalu diulang-ulang di dalam maso damai jo sakaligus untuak panyaluran "energi" silek nan cindaruang angek jo kareh untuak manjadi lambuik jo tanang. Samantaro itu, jikok dicaliak dari sisi istilah, kato pencak silek di dalam pangaratian para tuo silek adolah mancak jo silek. Pabedaan dari kato itu adolah:

• Kato mancak atau dikatokan juo sabagai bungo silek adolah barupo garakan-garakan tarian silek nan dipamerkan di dalam acara-acara adaik atau acara-acara resmi lainnyo. Garakan-garakan untuak mancak diupayokan sacarancak mungkin dek karano untuak patunjuakan.
• Kato silek itu surang bukanlah untuak tari-tarian, malainkan suatu seni partampuran nan dipagunokan untuak mampatahankan diri dari sarangan musuah, sahinggo garakan-garakan diupayokan seketek bana, capek, tapek, jo malumpuahkan lawan.

Para tuo silek mangatokan juo jiko mamancak di galanggang, kalau basilek dimuko musuah nan aratinyo jikok malakuan tarian pancak di galanggang rami, sadangkan jikok basilek untuak manghadapi musuah. Dek karano itu para tuo silek jarang ado nan nio mampatontonkan kaahlian mereka di muko umum bagaimana langkah-langkah mereka dalam malumpuahkan musuah. Dek karano itu, katiko acara festival silek tradisi Minangkabau, panonton akan kacewa jikok mangharapkan duo guru gadang (tuo silek) turun ka galanggang mancaliakkan bagaimano mereka saliang sarang jo saliang mampatahankan diri jo garakan nan mamatian. Kadua tuo silek itu hanyo malakukan mancak sarato barupayo untuak indak saliang manyakiti lawan main mereka. Karano manjatuahkan tuo silek lain di dalam acara bisa mamiliki dampak indak ancak untuak tuo silek nan "kalah". Dalam kagiatan sahari-hari, jikok saurang guru silek ditanyo apokah mereka bisa basilek, mereka biasonyo manjawab sacaro haluih jo mangatokan bahsonyo mereka hanyo bisa mancak, padahal sabananyo mereka itu mangajarkan silek. Ikolah sifaik randah hati ala masarakaik Nusantara, mereka mangatoka indak maninggikan diri surang, bialah kanyataan sajo nan manampakkan. Jadi kato pencak jo silek akhianyo susah dibedakan. Saat iko sasudah silek Minangkabau itu dipalajari dek urang lua, mereka mancaliakkan kapado kito bagaimano sarangan-sarangan mamatikan itu mereka lakukan. Kangganan tuo silek ko dapek dipahami karano Indonesia alah dijajah dek bangso Balando salamo ratusan tahun, jo mampaliekkan kamampuan batampua tantu sajo indak ka bisa ditarimo dek bangso panjajah pado maso dahulu, jalek iko mambahayokan untuak posisi mereka.

Urang nan mahia bamain silek dinamokan pandeka. Gala Pandeka iko pado zaman dahulunyo dilewakan sacaro adaik dek niniak mamak dari nagari nan basangkutan. Namun pado zaman panjajahan gala ko dibakukan dek pamarintah Balando. Sasudah labiah dari saratuih tahun dibakukan, masarakaik adaik Koto Tangah, Kota Padang akhianyo mangukuhkan kambali gala Pandeka pado tahun 2000-an. Pandeka ko mamiliki paranan sabagai parik paga dalam nagari (panjago kaamanan nagari), sahinggo mereka dibutuahkan dalam manciptakan nagari nan aman jo tentram. Pado 7 Januari 2009, Wali kota Padang, H. Fauzi Bahar diagiah gala Pandeka Rajo Nan Sati dek Niniak Mamak Koto Tangah, Kota Padang. Gala ko diagiah sabagai panghormatan dek upayo inyo manggiatkan kambali aktivitas silek tradisional di kawasan Kota Padang jo mamang inyo adolah pesilat juo pado maso mudonyo. Sahinggo gala itu layak dibarikan.

Sijarah

Silek, 2020

Kajian sijarah silek mamang rumik karano ditarimo dari muluik ka muluik, parnah saurang guru diwawancarai bahsonyo inyo samo sakali indak tahu siapo buyuik gurunyo. Bukti tatulih kabanyakan indak ado. Saurang Tuo Silek dari Pauah, Kota Padang, cuma mangatokan bahso dahulunyo silek ko diwarihkan dari saurang kusia bendi dari Limau Kapeh, Kabupaten Pasisia Selatan, Sumatra Barat. Saurang guru silek dari Sijunjuang, Sumatra Barat mangatokan bahso ilimu silek nan inyo dapekkan barasa dari Lintau. Ado lo Tuo Silek nan tanamo jo namo Angku Budua mangatokan bahso silek iko inyo paroleh dari Koto Anau, Kabupaten Solok. Daerah Koto Anau di Kabupaten Solok, Bayang jo Banda Sapuluah di Kabupaten Pesisir Selatan, Pauah di Kota Padang atau Lintau di Kabupaten Tanah Datar pado masa lalunyo adolah daerah pantiang di wilayah Minangkabau. Daerah Solok misalnyo adolah daerah patahanan karajaan Minangkabau mahadoki sarangan musuah dari darek, sadangkan daerah Pasisia adolah daerah partahanan manghadapi sarangan musuah dari lauik. Indak talalu banyak guru-guru silek nan bisa manyabuikkan ranji guru-guru mereka sacaro langkok.

Pado maso Datuak Suri Dirajo ikolah silek Minangkabau partamo sakali diramu sarato gerakan-gerakan beladiri dari pangawal nan ampek urang tu turuik mawarnai silek itu surang. Namo-namo mereka memang takah namo hewan (Kambiang, Harimau, Kuciang jo Anjiang), namun tantu sajo urang-urang tu adolah manusia, indak hewan manuruik sangko babarapo urang. Asa muasal Kambiang jo Hutan jo Anjiang Mualim mamang sampai kini mambutuahkan kajian labiah dalam dari mano sabananyo mereka barasa karano namo mereka indak manunjuakkan tampek sacaro khas. Mangingek hubungan padagangan nan baumua ratusan sampai ribuan tahun antaro pasisia pantai barat kawasan Minangkabau (Tiku, Pariaman, Aia Bangih, Banda Sapuluah dan Karajaan Indopuro) jo Gujarat (India), Persia (Iran jo sakitarannyo), Hadhramaut (Yaman), Mesir, Campa (Vietnam kini) jo bahkan sampai ka Madagaskar pado maso lalu, bukan indak mungkin silek Minangkabau mamiliki pangaruah dari beladiri nan mereka miliki. Samantaro itu, dari pantai timur Sumatra malalui sungai dari Provinsi Riau nan mamiliki hulu ka wilayah Sumatra Barat, makonyo hubungan beladiri Minangkabau jo beladiri dari Cino, Siam jo Champa bisa tajadi karano jalua padagangan, agamo, ekonomi, jo politik. Beladiri adolah produk budaya nan taruih bakambang badasarkan kabutuhan pado maso itu. Papaduan jo pambauran antar beladiri sangek mungkin tajadi. Bagaimano papaduan ini tajadi mambutuahkan kajian labiah jauah. Awal dari panalitian itu bisa sajo diawali dari hubungan genetik antaro masarakaik di Minangkabau jo bangsa-bangsa nan disabuikkan.

Caliak pulo

• Silek Harimau
• Silek Sungai Patai
• Silek Lanyah
• Silek tuo
• Silek singo barantai