Adam B.B.

Syekh Haji Adam B.B. atau Syekh Adam Balai-Balai (lahia di Nagari Balai-balai, Padang Panjang, Sumatera Barat, 31 Agustus 1889 – maningga 15 Juli 1953 pado umua 63 taun) adolah saurang Ulama Minangkabau tanamo nan tacataik sampai patangahan abaik ka-20. Adam B.B. mulonyo iolah saurang pandeka jo parewa nan kudian dikenal sabagai ulama jo guru. Adam adolah pandiri Surau Pasar Baru (SPB) di Padang Panjang nan kini banamo Madrasah Irsyadin Naas (MIN).

Adam Balai-Balai

Syekh Haji Adam B.B.
Namo	Adam
Asa	Balai-balai
Kebangsaan	Indonesia
Kabar nan	Ulama, guru
Turunannyo	Huriah Adam

Riwayaik

Kahidupan

Adam lahia pado 31 Agustus 1889, anak dari Sami'un Datuak Bagindo, saurang pangulu pucuak nan disagani sarato pamutuih kato katiko ninik mamak atau pamangku adat barundiang di wilayah Padang Panjang. Adam mudo tubuahnyo tinggi tagok, temperamennyo tinggi, wataknyo kareh, jo pantang balangkahan. Adam barasia lulus di sikolah Gouvernement jo nilai nan baiak. Kasampatan inyo untuak manjangkau pandidikan labiah tinggi tabukak bana untuak inyo. Namun, katiko apaknyo manyaranan untuak lanjuik Sekolah raja di Bukittingi inyo manulak indak suko babaju pantalon. Inyo labiah suko mandalaman ilimu silek nan alah inyo jalani sajak ketek.

Inyo surang mampunyoi paratian nan gadang bana pado silek, sainggo kiro-kiro sapuluah taun sampai di umuanyo nan 25 tahun, inyo alah mandapek ilimu silek dari sapuluah guru silek dari baragam aliran. Dari ilimu silek itu, inyo bahkan dapek manakuak harimau samaso basarobok di hutan di wilayah Agam. Kajadian harimau itu mambuek banyak urang takuik bana malawan inyo sainggo tasabuiklah sabagai urang parewa gadang. Tapi, di baliak garangnyo itu, Adam suko pulo bamain bola jo alaik musik.

Sasudah gadang, Adam mulai marantau ka dakek daerah tambang batubaro di Sawahlunto. Di situ inyo manjadi mandor nan manjago urang rantai, urang nan bakarajo di tambang nan ditangkok dek lari dari karajo. Sasudah bakarajo babarapo bulan, inyo baliak ka kampuang halaman dan mambaok pitih untuak mandehnyo. Apodayo, mandehnyo mancampakkan pitihnyo sambia bakato baso indak itu nan diharokkan dari Adam. Kajadian itu manjadi titiak baliak Adam untuak baraliah dari saurang parewa manjadi urang cadiak pandai.

Baraja jo mandirian surau

Adam kudian baraja mangaji di Surau Jambatan Basi, basis ulama Kaum Mudo Minangkabau pado mulo abaik ka-20. Di situ inyo baguru ka Syekh Daud Rasyidi nan baru pulang dari Makah dan mangawanan gurunyo dakwah kaliliang, dek suraunyo hancua diampeh galodo. Sipaik parewanyo indak tingga dan kadang talonsong, tapi gurunyolah nan mamintak maaf. Suatu hari, Adam sadar jo kalakuannyo itu, sainggo mamintak maaf ka gurunyo. Pintonyo dibaleh Daud jo tampeleang sambia bakato "Tahu salah indak mangaku dari awal", dek areknyo ubuangan Adam jo Daud Rasjidi.

Salain itu, inyo manjadi murid Syekh Abdul Karim Amrullah. Adam nan kareh basarobok guru nan kareh pulo. Suatu ari kaji indak dipahami dek inyo, gurunyo maariaknyo, "sagaek ko lambek lo mangarati." Adam pun talacuik, "Jan panggia ambo Adam kok indak dapek kaji!" Di tangah-tangah barajanyo itu, Haji Rasul mangubah sistem mangajanyo manjadi sakolah modern Perguruan Thawalib. Adam indak suko caro baraja nan dibatasi haknyo antaro guru jo murid, sainggo inyo 'mailang' dan ubuangannyo jo Haji Rasul agak maranggang, meskipun sasakali lai basilaturahmi ka gurunyo itu.

Sasudah maraso cukuik ilimu, pado taun 1916 Adam mambukak pangajian baru di Pasa Baru Padang Panjang di bawah bimbiangan Daud Rasjidi, lalu dijadikan surau pado taun 1920. Kudian surau itu manjadi asa mulo batagaknyo Madrasah Irsyadun Nas untuak muriknyo nan laki-laki jo Irsyadun Nisa untuk muriknyo nan padusi pado taun 1929. Manuruik Hamka, Adam nan kareh hati jo pandangan lamonyo akianyo maniru pulo sistem nan dikambangkan gurunyo, Haji Rasul. Namun, gayanyo sajak jadi parewa indak barubah: baju guntiang cino, kain bugih, jo tarompah. Kain saruang nan manjadi khas ulama indak dipakainyo, sainggo urang nan mancaliaknyo partamo kali indak manyangko inyo alim ulama.

Kiprah

Dakwahnyo Adam BB digambaran dari sipaiknyo nan konsisten, kareh tapi lugas, langsuang, jo sederhana. Misalnyo suatu ari inyo manegur saurang parewa nan indak salat, dijawek "indak ado saruang," Adam langsuang maagiah kain saruangnyo nan taguluang di badan sambia bakato "iko kain saruang, salatlah!" Di ari nan lain, Hatta manyabuik kondisi urang Mentawai nan miskin jo dibayangi misionaris. Adam lansuang ka pulau tu, mambaok 18 urang ka Padang Panjang dan digabuangkan ka anak asuahnyo nan lain. Satiok ditanyo soal marawaik anak-anak asuahnyo, inyo manjawek "Anak-anak tu dibari makan dek Allah." Bahkan, inyo basobok lansuang ka residen untuak mambaranguih judi di Padang Panjang, "tuan saurang residen, baa urang bajudi sajo tuan indak dapek malarang?"

Karanggangannyo dari Haji Rasul indak mambueknyo suruik raso cintonyo ka gurunyo itu. Maso patantangan Kaum Tuo jo Kaum Mudo, ulama Kaum Tuo mambaok saurang syekh banamo Syekh Abdul Hadi untuak manangkih kritik Kaum Mudo. Suatu hari, Syekh Djamil Djaho maundang syekh itu maisi pangajian di Padang Panjang. Sambia mangaku indak bisa babahaso Malayu, inyo bacaramah babahaso Arab dan mancela ulama Kaum Mudo. Adam nan hadir dan tasingguang jo ucapan syekh itu naiak pitam. Meski Syekh Jamil Jaho mausahoan indak ado nan batanyo, Adam nan alah naiak pitam batanyo ka Syekh Abdul Hadi. Ruponyo, inyo manjawek pulo pakai bahaso Melayu balogat Arab "Apakah engkau murid Haji Rasul? Kena'afa mau tanya? Fanggil engkau funya guru kemari. Saya tidak thakut".

Makin naiaklah paitamlah Adam Balai-Balai. "Syekh pembohong," katonyo, "Engkau katakan engkau tak pandai bahasa Melayu. Rupanya engkau tahu dan engkau gunakan menyebut nama guruku." Syekh Abdul Hadi baliak manantang, "Yah, mana gurumu itu, bawa sini." Makin manjadilah palak Adam, "Tak usah guruku, dengan saya pun selesai," lalu inyo maju ka muko syekh itu. Nan mangaji di dalam alah lari kalua dek mangiro Adam BB nan mantan parewa itu ka bakalahi jo Syekh Abdul Hadi, sadang syekh itu lari pulo dari jandela musajik itu, tagalincia masuak tabek. Kajadian itu mambuek trauma Syekh Abdul Hadi, sainggo katiko khutbah Jumat di Musajik Rayo Gantiang pado suatu hari, inyo mambaok kapak dalam khutbahnyo. Traumanyo samakin manjadi, katiko kapak itu diambiak inyo makin malawan, sahinggo dibaoklah inyo ka polisi. Akhianyo Syekh Abdul Hadi dilarikan ka rumah sakit jiwa di Sabang.

Katiko taun 1928, pamarentah Hindia Balando barancano manerapkan Ordonansi Guru nan adah balaku di Jawa. Aratinyo, guru-guru nan indak mamanuhi syaraik rasmi Balando dilarang maaja. Hal itu mambuek heboh Ranah Minang, sainggo sadoalah ulama basatu dan bamusyawarah untuak manulaknyo. Meskipun barasia, Balando barancana pulo manerapkan Ordonansi Sekolah Liar pado taun 1932, aratinyo sikolah nan indak tadaftar dek Balando akan ditutuik. Adam BB manjadi korban 'teror' dampak dari Ordonansi Sekolah Liar ko, katiko guru-guru MIN diintimidasi dan sabagiannyo ditangkok. Pado maso pandudukan Japang, inyo masuak ka dalam daftar hitam dan dikaja balatantara Japang. Pado maso Revolusi Kamardekaan pulo, Adam manyadiokan dapua umum dan markas palawanan.

Inyo maningga pado taun 1953 dan dimakamkan di dakek Musajik Raya Jihad Padang Panjang. Pado taun 2016 makamnyo diparancak jo marmar putiah dan dirancanakan ka manjadi cagar budayo.