Wikipedia

Huriah Adam

Huriah Adam (lahia Padangpanjang, Sumatera Barat, 6 Oktober 1936 - wafaik Samudra Indonesia, 10 November 1971)[1] adolah surang seniman tari nan tanamo dari Sumatera Barat.

Huriah adolah anak padusi surang ulama Islam moderen dari Padangpanjang, iyolah Syekh Adam Balai-Balai,[2] sadang mandenyo banamo Fatimah.[3] Syekh Adam mandirian sikola umum nan kusuih untuak padusi,[2] sarato mandukuang bakambangnyo bakaik anak-anaknyo tamasuak juo jo Huriah.[3] Huriah mandapek bimbiangan ahli tarian jo silek Minangkabau sajak masih paja ketek lai.

Di kudian ari Huriah manjadi tanamo karano mangubah tarian eksperimental dalam bengkel tari antar budayo di Jakarta Arts Centre, Taman Ismail Marzuki, untuak digabuangan jo garak-garik tarian jo drama tradisional Minangkabau, sarupo silek jo randai.[4] Bantuak-bantuak garakan tari baru nan inovatif tu kudian manyeba ka babagai sanggar tari Minang dan acok diajaan pulo di sikola manangah baik di ibukota atau di Sumatera Barat.[4] Salain sabagai panari, baliau juo surang palukih jo pamatuang nan cukuik baik, di mano babarapo karyanyo manjadi koleksi pacinto seni sarato ado pulo nan manjadi monumen di babarapo daerah di Sumatera Barat.

Huriah baru baumua 35 taun kutiko maningga dalam kacilakoan kapa tabang pado 10 November 1971, nan jatuah ka lauik lapeh pasisia Sumatera Barat.[1]

Kahidupan awal

suntiang

Lahia pado 6 Oktober 1936 di Padang Panjang, Huriah marupoan putri saurang ulama Minangkabau, Syekh Adam Balai-Balai. Ayahnyo dikenal sabagai ulama nan manaruah minaik dalam mangembangan kasenian di Minangkabau. Madrasah Irsadin Naas (MIN), sakolah nan ditagakan Syekh Adam di Padang Panjang, punyo palajaran kesenian dengan mandatangan guru silek jo guru tari sarato manyadioan tampek untuak latihan kasenian murik-murik.[5]

Kagiatan kasenian manjadi ciri dari kaluarga Syekh Adam. Inyo mandukuang anak-anaknya nan baminat tarhadap seni. Huriah marupoan anak padusi satu-satunyo.[6] Tigo dari limo saudara Huriah Adam, yaitu Bustanul Arifin, Irsjad, dan Achyar, mamiliah mandalami dunia musik—bahkan Bustanil jo Irsyad walau lahir tunanetra, tapi berhasil maraih beasiswa baraja musik di Royal Conservatory of The Hague di Brussel. Indak takah kabanyakan udanyo nan maarahan padok ka bidang musik, Huriah manekuni bidang tari, seni lukih, jo seni pahek.[7][6][8]

Karya

suntiang

Tari ciptaan Huriah didasaran pado gerak pokok tari jo pencak Minang.[9] Anasir-anasir tari Minang disasuaian dan diisi jo unsur tari daerah lain takah Jawa, Bali, Palembang, jo daerah lainnyo. Inyo maolah tari agar mudah dimangarati, salalu indah geraknyo, dan dapek disasuaian jo cito-cito "Ciek Bangsa jo Ciek Kabudayaannyo". Asimilasi ikoi bamukasuik mampakayo jo mamparancak tari nasional dengan kombinasi sarato diiringi biola sabagai salingan rabab. Demikianlah tari-tari daerah nan pado umumnyo lalok dijagoannyo balik jo caro manyasuaian teori dengan panggilan zaman.[10]

Ketiko Tanah Air dilanda dek samacam kalatahan mancari apo nan disabuik "Kepribadian Nasional", Huriah Adam pernah manyusun konsep sapanjang 28 halaman folio nan inyo agiah judul "Membina Pribadi". Konsep iko parnah dikirim kapado Presiden Sukarno tapi indak pernah dipublikasian. Di dalamnyo, inyo manuangan pikirannyo, tautamo tantang seni jo kepribadian nasional.[11][8]

Tigo tari Huriah dipertunjukkan dalam alek Indonesia Cultural Evening nan marupoan rangkaian acara Ganefo di Istana Olahraga Bung Karno pado 1963. Katigo tari tersebut marupoan tari kreasi yakni: tari nina bobok, tari nelayan, dan tari sandang pangan

Tari nina bobok manggambaran kasiah sayang saurang mandeh kapado anaknyo. Di tangah kasibukan karajo, saurang ibu harus manyudahi pakerjaan nan sadang mereka padoki untuak malalokan anaknyo. Salanjuiknyo, tari gotong royong atau tari nelayan manampilan gerakan silat utamanyo gerakan tangan, kaki, jo mato untuak malukihan kahidupan nelayan nan mancari ikan jo pukek dan manikmati hasilnyo sacaro basamo-samo. Tari iko dibaokan dek anam urang tadiri dari laki-laki jo padusi nan mamakai sarawa jo baju silaek.[12]

Adapun tari sandang pangan mancaliakan kahidupan patani mulai dari turun ka sawah, mancangkua, manyemai banih, manutuiknyo jo tanah, mambajak, manguil, jo batanam. Para patani manyabik padinyo, mangirik, manampi, mamisahan antaro nan bareh jo nan hampo, mamasuakannyo ka dalam karuang, dan sasudah karing diikek untuak lakeh dibaok pulang. Tari iko dibaokan dek tujuh urang padusi. Sabalunnyo, tari sandang pangan alah dipentaskan di Festival Tarian Seluruh Indonesia di Bandung pado 1960 dan dinyatoan sabagai pamanang terbaik kaduo.[13]

Tari lain Huriah Adam yakni tari payuang nan malukihan marapulai baru nan tangah babulan madu, tari barabah nan manggambaran saikua buruang barabah, jo tari sakapua siriah nan manampilan gerakan panyambutan tamu jo maagiah siriak kapado tamu. Tari sakapua siriah dibaokan dek limo urang padusi jo pakaian adaik baju kuruang dan tikuluak tanduk.[14] Tari tarakhia nan dibuek Huriah adolah tari sapasang api jo tari sijundai. Tari sijundai pernah dibaokan dek Sukmawati Soekarnoputri.[15]

Salain tari, Huriah mambuek sendratari Malin Kundang nan manjadi salah satu koreografi tarakhia nan inyo dibuek. Gerakannyo mangombinasian gerak Minang jo gerak balet. Sendratari iko patamo bana dipentaskan di Taman Ismail Marzuki, Jakarta sabalun dipentaskan di Padang Panjang jo Padang, Sumatera Barat.[16]

Kahidupan pribadi

suntiang

Pado 1957, Huriah manikah jo Ramudin. Sajak menikah, inyo salalu dibimbing dek suaminyo untuak latihan jo maadoan partunjukan. Huriah manjadi ibu bagi limo urang anak. Mereka yakni Muhammad Ikhlas, Murniati, Muhammad Jujur, Sucihati, dan Relahati.[17]

Panghargaan

suntiang

Pado 2011, Presiden Susilo Bambang Yudhoyono maagiah panghargaan Bintang Budaya Parama Dharma untuak Huriah.[8]

Rujuakan

suntiang
Catatan kaki
  1. ↑ a b Redaktur TEMPO (1981). Apa & siapa sejumlah orang Indonesia. Penerbit Grafiti Pers. p. 17. https://books.google.co.id/books?id=afcZAAAAIAAJ&q=huriah+adam&dq=huriah+adam&hl=id&sa=X&ved=0ahUKEwiMwqCh2_fOAhUJRI8KHfB_CfQ4ChDoAQhHMAk. 
  2. ↑ a b Congress on Research in Dance (2004). Dance, identity and integration: tributes to the late Carl Worz and Muriel Topaz ; conference proceedings. Conference/Taipei National University of the Arts. p. 176. https://books.google.co.id/books?id=8G-1AAAAIAAJ&q=huriah+adam&dq=huriah+adam&hl=id&sa=X&ved=0ahUKEwiMwqCh2_fOAhUJRI8KHfB_CfQ4ChDoAQg8MAc. 
  3. ↑ a b Leirissa, R.Z. (1995). Ensiklopedi tokoh kebudayaan. Vol. 1. Departemen Pendidikan dan Kebudayaan, Direktorat Jenderal Kebudayaan, Direktorat Sejarah dan Nilai Tradisional, Proyek Inventarisasi dan Dokumentasi Sejarah Nasional. p. 100. https://books.google.co.id/books?id=8ONwAAAAMAAJ&q=huriah+adam&dq=huriah+adam&hl=id&sa=X&ved=0ahUKEwjpmean2ffOAhUJqo8KHd4KBdsQ6AEIHzAB. 
  4. ↑ a b Barker, Clive; Trussler, Simon (2004). New Theatre Quarterly 75, Vol. 19. Cambridge University Press. p. 223-234. ISBN 0521535905, 9780521535908. https://books.google.co.id/books?id=-rpFmwcrG5IC&pg=PA224&dq=huriah+adam&hl=id&sa=X&ved=0ahUKEwjpmean2ffOAhUJqo8KHd4KBdsQ6AEILDAE#v=onepage&q=huriah%20adam&f=false. 
  5. ↑ Leirissa R.Z. 1995, hlm. 100.
  6. ↑ a b Leo Wisnu Susapto 4 Maret 2019.
  7. ↑ Syamsidar 1981, hlm. 13–15.
  8. ↑ a b c Tokoh.id 26 Januari 2012.
  9. ↑ Syamsidar 1981, hlm. 81.
  10. ↑ Syamsidar 1981, hlm. 5–6.
  11. ↑ Syamsidar 1981, hlm. 9.
  12. ↑ Syamsidar 1981, hlm. 30–32.
  13. ↑ Syamsidar 1981, hlm. 34.
  14. ↑ Syamsidar 1981, hlm. 33–40.
  15. ↑ Syamsidar 1981, hlm. 48.
  16. ↑ Syamsidar 1981, hlm. 39–48.
  17. ↑ Syamsidar 1981, hlm. 22.
Daftar pustaka

Pautan lua

suntiang
Diambiak dari "https://min.wikipedia.org/w/index.php?title=Huriah_Adam&oldid=2463901"