Daud Rasyidi
Syekh Haji Daud Rasyidi (lahia di Balingka, Agam, 1880 - maningga di Bukittinggi, Sumatera Barat, 26 Januari 1948 pado umua 68 tahun) adolah saurang ulama Indonesia dari Minangkabau (Sumatera Barat). Inyo tamasuak ka golongan Kaum Mudo nan bakambang pado abad ka-20. Inyo dikenal sabagai pandakwah kaliliang sajak suraunyo dihampeh galodo (banjir lumpuk yang tibo mendadak), kamudian bajuang malawan palawanan Balando sarato mambantu perjuangan Indonesia pado maso Revolusi Kemerdekaan.
 | |
| Biografi | |
|---|---|
| Lahia | 1880  Balingka |
| Kamatian | 26 Januari 1948 (67/68 tahun (id)  )Bukittinggi |
| Kalompok etnis | Urang Minangkabau |
| Kagiatan | |
| Karajo | Ulama |
| Kaluarga | |
| Pasangan hiduik | Siti Rajab (id) |
| Anak | Mansoer Daoed Dt. Palimo Kayo Anah (id) Miramah (id) Sa'diah (id) Makmur (id) Afifah (id) |
Daud Rasyidi adolah bapak dari Mansoer Daoed Dt. Palimo Kayo, adolah ulama jo politikus nan pernah manjabat sabagai duta besar Indonesia untuak Irak.
Pandidikan
suntiangDaud Rasyidi lahia di Balingka, Agam, pado taun 1860, dari pasangan Inyiak Rasyidi dan Nanti. Inyiak Rasyidi adolah saurang ulama tanamo di Balingka. Sajak ketek Daud diajaran amalan Islam di surau, sarupo salat dan mangaji Al Quran. Sasudah 7 taun, inyo diajaran apaknyo langsuang, lalu baraja basamo abangnyo Abdul Latif Khatib Tumangguang ka Syekh Mustafa Sungai Pagu di Muaro Labuah.[1][2]
Pado taun 1895, Daud pai baraja ka Makkah untuak mandalaman agamonyo. Di situ inyo baraja manambah ilmu Qiraat Quran dan sampai pulo baraja ka Syekh Ahmad Khatib Al-Minangkabawi walau indak lamo. Sapulangnyo dari Makkah, inyo manjadi gharim di Musajik Gantiang sambia bakarajo sabagai tukang jaik nan didapeknyo samaso baraja di Muaro Labuah. Inyo lanjuik baraja ka Syekh Haji Zabidi di Pasa Gadang sarato bahaso arab jo tulisan latin ka Syekh Haji Muhammad Thaib Singkarak di Balakang Tangsi.[1][2]
Pado taun 1903, Abdul Latif mamintak adiaknyo untuak mambantu ajar di Surau Jambatan Basi punyo Syekh Abdullah Ahmad di Padang Panjang. Dari situ inyo baraja ka Syekh Muhammad Thaib Umar di Sungayang, sarato dari taun 1906-1908 manjadi murid Haji Rasul nan paliang tuo di surau Maninjau tampeknyo baraja.[3] Sasudah itu inyo baliak ka Makkah baraja ka Syekh Al-Minangkabawi mandalaman ilmu nan sudah-sudah.[4] Katiko abangnyo Abdul Latif maningga pado taun 1912, inyo manggantian mangaja di Surau Jambatan Basi.[1]
Dakwah
suntiangDaud mamintak Haji Rasul mangaja di Surau Jambatan Basi, sadang inyo baliak ka Balingka. Surau Jambatan Basi itu dikambangan dek Haji Rasul jo nan lain manjadi Sumatera Thawalib. Surau Daud Rasyidi di Balingka dihampeh galodo pado taun 1916. Untuak samantaro inyo ikuik Haji Rasul ka Malaya untuak badakwah, tapi sajak itu, muncualah ide untuak berdakwah dari kampuang ka kampuang.[3] Sambia berdakwah itu, inyo manyaru surau-surau dan musajik-musajik agar dipelokkan, dan dari bantuan masyarakat inyo mambangun baliak suraunyo nan hancua itu.[1]
Daud Rasyidi tamasuak ulama nan mambantu Abdullah Ahmad untuak mandirian Persatuan Guru Agama Islam pado taun 1919 di Padang. Katiko Ordonansi Guru 1928 jo Ordonansi Sekolah Liar 1932 nan takenal itu, inyo berpartisipasi dalam mambuek komite nan manulak peraturan itu diterapkan di ranah Minangkabau.[2][3] Ordonansi Guru ditujukan agar guru-guru nan indak basertifikan indak diizinkan mangaja, sadang Ordonansi Sekolah Liar untuak manertibkan sekolah-sekolah nan dibangun tanpa izin Balando. Pado maso itu, kaduo peraturan itu bararti panggarak pandidikan di Minangkabau akan dibatasi garaknyo manuruik kahandak Balando.
Maso Revolusi dan Kamatian
suntiangKatiko Revolusi Kamerdekaan Indonesia pado taun 1946, Soekarno-Hatta tibo ka Bukittinggi nan batujuan manggalang dana dari masyarakat untuak mambali pesawat untuak malawan Balando. Syekh Daud tamasuak anggota panitia untuak manggambangan dana itu. Syekh Daud jo Syekh Ibrahim Musa Parabek manampuah daerah di Minangkabau, manumpuah dana dari masyarakat jo manyarahkan dana tu ka pamarentah pusat.
Syekh Daud Rasyidi dulu mangajaan murid-muridnyo di sabuah surau di Nagari Balingka. Namun, surau itu hancua pado taun 1914 dek galodo di kampuangnyo itu. Kini surau tampek mangajanyo itu dibangun ulang manjadi musajik. Di adok-an inyo, sabuah monumen ketek dibangun jo diresmikan dek Presiden Soekarno pado 6 Juli 1948.[5]
Syekh Daud maningga pado maso manjalankan shalat magrib di Surau Inyiak Djambek, Tangah Sawah, Kota Bukittinggi pado tanggal 26 Januari 1948 (14 Rabiul Awal 1366 H). Jasadnyo dikubur di sabalah Makam Syekh Muhammad Djamil Djambek nan talatak di sabalah Surau Inyiak Djambek.[6][7]
Rujuakan
suntiang- ↑ a b c d Hasril Chaniago (editor). 2023. Ensiklopedia Tokoh 1001 Orang Minang. Padang: UMSB Press. ISBN: 978-623-8416-00-4
- ↑ a b c Redaksi (2020-05-29). "Daud Rasyidi, Tokoh Pendidikan Islam". Beritasumbar.com (dalam bahasa Indonesia). Diakses tanggal 2024-01-21.
- ↑ a b c Hamka. 1982. Ayahku: Riwayat Hidup Dr. H. Abdul Karim Amrullah dan Perjuangan Kaum Agama di Sumatera. Jakarta: Umminda.
- ↑ "Syekh Daud Rasyidi, Ulama Penyatu Perjuangan Minangkabau (2)". Republika Online (dalam bahasa Indonesia). 2020-02-11. Diakses tanggal 2024-01-21.
- ↑ Islamic Centre Sumatera Barat. (2001). Riwayat hidup ulama Sumatera Barat dan perjuangannya.. Islamic Centre Sumatera Barat. ISBN 979-9252-85-7. OCLC 50185124. http://worldcat.org/oclc/50185124.
- ↑ https://books.google.co.id/books?id=MHEwAAAAMAAJ&q=daud+Rasyidi&dq=daud+Rasyidi&hl=id&sa=X&ved=0ahUKEwiG8-fW8enqAhXDH7cAHecoC-MQ6AEIdDAM
- ↑ https://books.google.co.id/books?id=LGpjDwAAQBAJ&pg=PA28&dq=inyiak+syekh+daud+rasyidy&hl=id&sa=X&ved=0ahUKEwiM6OyZ8OnqAhUNcCsKHU-WAUMQ6AEIKzAA#v=onepage&q=inyiak%20syekh%20daud%20rasyidy&f=false
Pranala lua
suntiang- "Syekh Daud Rasyidi, Ulama Pambek dari Balingka" Langgam.id, 5-5-2020. Diakses 26-7-2020.
- Republika.co.id/berita/dunia-islam/islam-digest/20/02/11/q5irk6430-syekh-daud-rasyidi-ulama-penyatu-perjuangan-minangkabau-1" id="mwWg" rel="mw:ExtLink nofollow">"Syekh Daud Rasyidi, Ulama Penyatuan Pajuangan Minangkabau (1) " Republika.co.id, 11-2-2020. Diakses 26-7-2020.
- Republika.co.id/berita/dunia-islam/islam-digest/20/02/11/q5irn7430-syekh-daud-rasyidi-ulama-penyatu-perjuangan-minangkabau-2" id="mwXQ" rel="mw:ExtLink nofollow">"Syekh Daud Rasyidi, Ulama Penyatuan Pajuangan Minangkabau (2) " Republika.co.id, 11-2-2020. Diakses 26-7-2020.
- "Karajo nan Pantiang, Urang nan Pantiang" RantauNet, 16-9-2010. Diakses pado 12 September 2013.
- "Haji Daud Rasyidi" Archived 2008-11-23 di Wayback Machine. Diarsipkan pado tanggal 11-12-2008 di Wayback Machine. Cimbuak.net, 2-6-2005. Diakses pado 12 September 2013.