Saluak
Saluak adolah tutuik kapalo laki-laki nan tarutamo dipakai sabagai pakaian pangulu di Minangkabau. Tutuik kapalo iko tabuek dari kain songket atau kain batiak babahan katun jo warna dasa cokelat atau sirah, bagantuang pado warna pakaian nan digunoan. Saluak dipasang ka kapalo jo mamiriangkannyo ka kida. Ciri khas tutuik kapalo iko talatak pado karuik atau lipatan nan mambantuak janjang, pado umumnyo bajumlah limo, tapi ado pulo sampai tigo baleh karuik.[1]
Saluak marupoan salah satu palangkok saurang pangulu dalam upacaro adaik di Minangkabau, sarupo batagak pangulu. Bagi pangulu, karuik atau lipatan pado saluak malambangkan banyak undang-undang nan samustinyo dipatuhi dek saurang penghulu.[2]
Salain dipakai dek pangulu, tutuik kapalo iko dipakai dek marapulai pado wakatu upacaro pernikahan.[3]
Bantuak
suntiang
Saluak barasa dari bantangan kain babantuak segi ampek baukuran 80 meter persegi. Kain dirandam talabiah dulu ka dalam cairan tapuang kanji nan alah dimasak. Dalam kaadaan basah, kaduo suduik kain nan balawanan dipatamuan sainggo mambantuak sagitigo. Tapi (aleh) sagitigo dibuek lipatan sabanyak nan dituju, biasonyo limo sampai tigo baleh. Sudah itu, dibuek lingkaran saukuran gadang kapalo jo manyilangan kaduo ujuangnyo. Ujuang silangan bagian dalam dilipek mambaluik ujuang bagian lua nan salanjuiknyo dimasuakan ka dalam, sadangkan ujuang silangan bagian lua dilipek ka ateh sainggo manutuik sabagian lubang lingkaran. Salanjuiknyo, ujuang-ujuang puncak sagitigo nan duo lapih disuruakan sainggo batamu jo ujuang lipatan nan sabalah ka lua patamo nan akhianyo kaduo ujuangnyo manutuik lubang lingkaran basamo-samo jo ujuang sabalah bawah nan dilipek ka ateh. Sasudah itu, dilanjuikan jo pangamehan akhia.[4]
Bantuak saluak sarupo songkok, tapi bagian atehnyo manuruikan bantuak kapalo. Bagian muko saluak dibuek data dan ado karuik-karuik hasia lipaek kain, nan mambantuak janjang. Samek digunoan untuak mambantuak karuik saluak jo caro manyamekannyo pado bagian ateh saluak. Pado bagian sisi balakang saluak, ado pilinan ujuang sisi kida jo ujuang sisi suok kain saluak. Adopun bagian dalam saluak manuruikan bantuak lua saluak, yakni ado karuik-karuik hasia lipatan kain.[5][6]
Kain pado saluak dapek barupo kain songket atau kain batiak babahan katun. Saluak nan digunoan dek pangantin laki-laki biasonyo marupokan kain songket babanang ameh. Motifnyo barupo batang pinang, bungo tanjuang, jo tumbuahan lainnyo. Warna saluak sairama jo warna bahan batiak nan digunoan, sarupo warna cokelat jo warna sirah bata. Pado saluak nan tabuek dari batiak, canduang bawarna galok.[3][6]
Mukasuik
suntiangLipek-lipek saluak malambangkan lilitan aka saurang pimpinan adaik. Pangulu mampu manyimpan rahasio, indak buliah tagageh-gageh dalam maambiak kaputusan, dan selalu bamusyawarah jo sanak sudaro. Dalam papatah, lipatan-lipatan saluak nan babantuak janjang malambangkan aturan iduik urang Minangkabau nan "bajanjang naiak, batanggo turun".[7]
Lipatan-lipatan saluak bajumlah limo sampai tigo baleh lipatan. Jumlah ko biasonyo dikaikan jo makna adaik Minang atau Islam. Limo lipatan dapek malambangkan limo unsua dalam adaik Minangkabau, iyolah pangulu, katik, pamarintah, cadiak pandai, jo manti atau dubalang. Adopun 13 karuik buliah diaratikan sabagai jumlah rukun salat. Karuik pado saluak apobilo dikambangkan akan maleba, nan dilambangkan sabagai lawehnyo ilimu saurang pangulu sainggo talok malaksanakan tugehnyo manyalamaikan anak kamanakannyo.[7]
Saluak indak manggunokan jahitan, malainkan anyo manggunoan samek atau dikabek, nan baarati paraturan nan dimufakaikan dek niniak mamak dapek diubah sawakatu-wakatu sasuai jo kabutuahan jo pakambangan nan tajadi di masyarakaik.[8]
Pamakaian
suntiang
Caro pamakaian saluak iyolah jo dimiriangan ka arah kida. Bagian dasa saluak ado di tangah kaniang, sajaja jo tulang iduang.[6]
Saluak dipakai dek pangulu. Dalam pamakaiannyo, indak sumbarang urang nan buliah manggunoannyo, anyo pangulu nan dianggap alah mamiliki ilimu sarato mamahami satiok tugeh jo tangguang jaweknyo.[8]
Rujuakan
suntiang- Catatan kaki
- ↑ Nadya Amelia 2017.
- ↑ Afifah Asriati 2011.
- ↑ a b Nazif Basir & Elly Kasim 1997.
- ↑ Anwar Ibrahim 1986, hlm. 151–152.
- ↑ Anwar Ibrahim 1986, hlm. 27.
- ↑ a b c Dina Herlina Sari 2015, hlm. 4–9.
- ↑ a b Anwar Ibrahim 1986, hlm. 28.
- ↑ a b Dina Herlina Sari 2015, hlm. 10–11.
- Daftar pustaka
- Dina Herlina Sari (2015). "Studi Tentang Saluak Penghulu di Kota Payakumbuh" (PDF). Journal Home Economic and Tourism. Universitas Negeri Padang. 8 (1).
- "Koleksi Saluak di Museum Adityawarman". Museum Adityawarman. 2018. Diarsipkan dari versi asli tanggal 2019-04-03. Diakses tanggal 2019-04-03.
- Nazif Basir; Elly Kasim (1997). Tata Cara Perkawinan Adat Istiadat Minangkabau. Elly Kasim Collections. https://books.google.co.id/books?id=PI9uAAAAMAAJ&q=Saluak+minangkabau&dq=Saluak+minangkabau&hl=id&sa=X&ved=0ahUKEwjwqOm6qPDgAhVo6XMBHZ4HBFIQ6AEIMzAC.
- Nadya Amelia (2017). "Nama dan Makna Bagian-Bagian Pakaian Penghulu Minangkabau Di Kenagarian Kacang Kecamatan X Koto Singkarak Kabupaten Solok". Jurnal Bahasa dan Sastra. Universitas Negeri Padang. 5 (1).
- Anwar Ibrahim (1986). Pakaian Adat Tradisional Daerah Provinsi Sumatra Barat. Departemen Pendidikan dan Kebudayaan, Direktorat Jenderal Kebudayaan, Direktorat Sejarah dan Nilai Tradisional. http://repositori.kemdikbud.go.id/8265/1/PAKAIAN%20TRADISIONAL%20SUMATERA%20BARAT.pdf.
- Afifah Asriati (2011). Degradasi Makna Simbolik Busana Adat Minangkabau. http://repository.unp.ac.id/707/1/AFIFAH%20ASRIATI_125_13.pdf.