Suntiang

Suntiang adolah hiasan kapalo bak cando mahkota nan dipakai padusi di Minangkabau. Bantuak suntiang ko diambiak dari alam, baiak dari bantuak tumbuahan ataupun dari bantuak binatang. Suntiang biasonyo dipakai anak daro atau palangkok pakaian adaik padusi minangkabau. Indak hanyo sabagai hiasan, tapi inyo banilai moral untuak anak daro jo marapulai manjadikannyo panutan dalam hiduik barumah-tanggo.

Suntiang gadang

Suntiang nan dipakai anak daro di baralek nikah adaik Minangkabau

Suntiang ko babantuak satangah lingkaran sarato rononyo bak cando tabuek dari ameh. Barek suntiang ko kiro-kiro 3,5–5 kg. Kini banyak suntiang nan dibuek jo bantuak nan labiah ringan jo mudah dek alasan mampamudah tukang suntiang jo anak daro nan ka mamakainyo. Bagian suntiang nan sarupo tumbuahan contohnyo diambiak dari bantuak bungo mawar, melati, cimpako, jo sarai. Untuak bantuak binatang bantuaknyo sarupo buruang kuau, merpati, ramo-ramo, jo ikan.

Ukuran suntiang babeda manuruik pamakaiannyo. Suntiang nan dipakai anak daro baukuran gadang atau nan disabuik suntiang gadang, sadangkan suntiang baukuran ketek atau suntiang ketek dipakai dek pasumandan (pandampiang anak daro).

Jinih Suntiang

Ado babarapo jinih suntiangko, diantaronyo:

Suntiang manuruik ukuran

• Suntiang gadang
• Suntiang ketek / sumandan

Suntiang manuruik bantuak

• Suntiang bungo pudieng
• Suntiang pisang saparak
• Suntiang pisang saikek
• Suntiang kambang loyang

Suntiang manuruik ikek

• Suntiang ikek Pasisia
• Suntiang ikek Kurai
• Suntiang ikek Solok Selayo
• Suntiang ikek Banuhampu Sungai Puar
• Suntiang ikek Lima Puluh Kota
• Suntiang ikek Sijunjung Koto Tujuh
• Suntiang ikek Batipuh X Koto
• Suntiang ikek Sungayang
• Suntiang ikek Lintau Buo

Bagian Suntiang

• Bungo sarunai (lapisan bawah sabanyak 3-5 lapih)
• Bungo gadang (lapisan tangah sabanyak 3-5 lapih)
• Kambang goyang (lapisan ateh)
• Kote-kote (hiasan nan jatuah di pipi kanan jo kiri)