Sistem pakawinan di Minangkabau

Marapulai jo anak daro pado alek pakawinan di Minangkabau

Pakawinan di Minangkabau diatua dek adaik jo budayo Minangkabau.

Aturan PakawinanSuntiang

Pakawinan di Minangkabau tabagi duo macam, iyolah kawin ideal jo kawin pantang. Kawin ideal disabuik juo jo pakawinan awak samo awak atau pulang ka bako.

Manuruik alam pikiran urang Minangkabau, pakawinan nan paliang ideal iolah pakawinan antaro kaluargo dakek, mode pakawinan antaro anak kamanakan. Pulang ka mamak aratinyo mangawini anak mamak, sadangkan pulang ka bako makasuiknyo adolah mangawini kamanakan ayah. Tingkek pakawinan ideal barikuiknya iolah pakawinan ambiak-maambiak, aratinyo kakak baradiak laki-laki dan padusi A manikah sacaro basilang jo kakak baradiak laki-laki dan padusi B. Urutan salanjuiknyo iolah pakawinan urang sakorong, sakampuang, sanagari, saluhak, dan akianyo sasamo Minangkabau. Pakawinan jo urang lua kurang disukoi, walaupun indak dilarang. Dengan kato lain, pakawinan ideal bagi masarakaik Minangkabau iolah pakawinan antaro awak samo awak, itu bukan manggambakan baso inyo manganuik sikap nan eksklusif. Pola pakawinan awak samo awak itu balatar balakang sistem komunal dan kolektivisme nan dianuiknyo.[1]

Sadangkan kawin pantang iolah kawin nan dilarang atau indak buliah dilakuan dek urang Minangkabau, apobilo dilakuan ka mandapek sanksi ukuman. Di sampiang itu ditamui pulo samacam pakawinan sumbang, nan indak ado larangan dan pantangannyo, akan tatapi labiah baik indak dilakuan. Pakawinan nan dilarang iolah pakawinan nan talarang manuruik ukum pakawinan nan alah umum.

Pakawinan pantang adolah pakawinan nan ka marusak sistem adaik, iyolah pakawinan urang nan satali darah manuruik stelsel matrilineal, sakaum, dan sasuku walaupun indak ado ubuangan kakarabatan dan indak sakampuang alaman.

Prosesi adaik panikahanSuntiang

MaresekSuntiang

Maresek adolah langkah partamo dari proses pra-nikah di Minangkabau; sanak sudaro calon anak daro ka maminang calon marapulai, nan akhianyo ka bamufakaik. Parancanaan jo palaksanoan panikahan umumnyo malibaikan kaluarga gadang, tarutamo nan dari sisi anak daro. Iko marupokan adaik bagi padusi di Minangkabau jo sanak sudaronyo untuak talibaik dalam sabagian gadang rancana panikahan, tamasuak dalam lamaran panikahan, sasuai jo budayo Minangkabau nan matrilineal.[2][3] Ayah dari anak daro indak talalu talibaik dalam prosesi lamaran panikahan, karano kaputusan marupokan hak prerogatif dari sanak mandeh anak daro. Dunsanak mandeh anak daro malakukan negosiasi jo pihak marapulai sarato manantuan syaraik untuak panikahan.[2][3]

Batimbang tandoSuntiang

Batimbang tando adolah adaik nan dikarajoan sabalun diadokannyo baralek. Batimbang tando iko batujuan untuak maikek kaduo balah pihak nan basangkuik pauik. Pado batimbang tando nan ka dibaok dek laki-laki adolah ameh atau kain.

Jikok batimbang tando disatujui, pado hari nan alah ditantuan baru pihak padusi nan manjampuik pihak laki-laki sacaro adaik ka rumahnyo basamo niniak mamak nan dari padusi. Pihak padusi katiko manjampuik laki-laki mambaok nasi kunik.

Alek panikahanSuntiang

Panikahan di Minangkabau marupokan bagian pantiang dari tradisi urang Minangkabau, sajumlah pakaian adaik, rumah, jo palangkokan nan takaik jo pernikahan banyak direkonstruksi jo ditampilkan di museum-museum.[4] Panikahan itu surang biasonyo dilakukan jo babagai upacaro jo tradisi salamo duo minggu.[5] Pakaian panikahannyo rumik sangaik.[6] Tata caro pernikahan di Minangkabau pun indak talapeh dari tradisi Islam.[7]

Sasudah panikahanSuntiang

Salapeh manikah, kaduonyo indak tingga di rumah laki-laki, tapi tingga di rumah mandeh si anak daro. Sang suami pindah ka rumah istrinyo jo mambaok sagalo harato miliaknyo. Namun, sasuai adaik, inyo buliah tingga basamo adiak padusinyo bahkan sasudah manikah jo manjalang rumah bininyo hanyo pado malam hari.[2][3] Dek padusi mangontrol satiok aspek kahidupan kaluarga di kalangan masyarakaik Minangkabau, saurang laki-laki labiah mamiliah untuak pai ka lua nagari atau ka lua kampuang untuak mancari peluang nan labiah gadang untuak kamajuan pribadi. Kok inyo tingga di rumah, mako inyo dipandang randah sabagai laki-laki lamah, panuruik, jo kurang agresif.[2] Dek parubahan zaman jo modernisasi, laki-laki di Minangkabau punyo labiah banyak kasempatan di lua rumahnyo, jo banyak laki-laki labiah mamiliah untuak pai marantau.[2] Sacaro budaya, urang Minangkabau mampatahankan sistem matrilineal, di mano padusi mampunyoi hak nan labiah gadang daripado laki-laki dalam hal-hal nan takaik jo harato pusako atau warihan, dunsanak, jo pangasuahan anak. Harato warisan anyo dibagikan kapado sudaro/anak padusi.[2]

Caliak puloSuntiang

RujuakanSuntiang

  1. Navis, AA (1984). Alam Terkembang Jadi Guru. Jakarta: Pt Grafiti Pers. pp. 193. 
  2. a b c d e f Lee, Khoon Choy (1999). A Fragile Nation: The Indonesian Crisis. World Scientific. p. 261. ISBN 978-981-02-4003-5. http://books.google.com/books?id=4Td0t9u-CmAC&pg=PA261. Diakses pado 1 Januari 2013. 
  3. a b c An-Na'im, Abdullahi A. (11 October 2002). Islamic Family Law in A Changing World: A Global Resource Book. Zed Books. p. 254. ISBN 978-1-84277-093-1. http://books.google.com/books?id=Hg0zCFM0fwkC&pg=PA254. Diakses pado 1 Januari 2013. 
  4. Blackwood, Evelyn (2000). Webs of Power: Women, Kin, and Community in a Sumatran Village. Rowman & Littlefield. p. 26. ISBN 978-0-8476-9911-7. http://books.google.com/books?id=Bs1t0QUOeKsC&pg=PA26. Diakses pado 1 Januari 2013. 
  5. Fox, James J. (September 2006). Inside Austronesian Houses: Perspectives on Domestic Designs for Living. ANU E Press. p. 142. ISBN 978-1-920942-84-7. http://books.google.com/books?id=4JavFdIXo3oC&pg=PA142. Diakses pado 1 Januari 2013. 
  6. Monger, George (30 November 2004). Marriage Customs of the World: From Henna to Honeymoons. ABC-CLIO. p. 159. ISBN 978-1-57607-987-4. http://books.google.com/books?id=o8JlWxBYs40C&pg=PA159. Diakses pado 1 Januari 2013. 
  7. Jones, Gavin W.; Chee, Heng Leng; Mohamad, Maznah (1 June 2009). Muslim-Non-Muslim Marriage: Political and Cultural Contestations in Southeast Asia. Institute of Southeast Asian Studies. pp. 181–. ISBN 978-981-230-874-0. http://books.google.com/books?id=Bl-i5BQ4egMC&pg=PA181. Diakses pado 3 Januari 2013.