Musajik Tuo Siguntua
Musajik Tuo Siguntua talatak di Dusun Ranah, Nagari Siguntua, Kecamatan Sitiung, Kabupaten Dharmasraya, Sumatra Barat, Indonesia.[1] Musajik iko marupoan paninggalan Karajaan Siguntua nan bangunannyo dipakiroan alah baumua 100 taun labiah.[2][3][4]
| Musajik Tuo Siguntua Masjid Tua Siguntur | |
Musajik Tuo Siguntua diliek dari kompleks makam | |
| Latak | Dusun Ranah, Desa Siguntur, Kecamatan Sitiung, Kabupaten Dharmasraya, Sumatra Barat, Indonesia |
| Afiliasi agamo | Islam |
| Kapamimpinan | Ahli warih Karajaan Siguntua |
| Deskripsi arsitektur | |
|---|---|
| Jinih arsitektur | Musajik |
| Gaya arsitektur | Minangkabau |
| Spesifikasi | |
| Panjang | 13,2 meter |
| Leba | 13,2 meter |
Musajik Tuo Siguntua barado sa pakarangan jo pandam pakuburan rajo-rajo Siguntua, nan tapeknyo barado di sabalah utara musajik. Di sabalah timur, tadapek rumah gadang paninggalan Karajaan Siguntua. Katigonyo yaitu, musajik, makam, jo rumah gadang alah ditetapkan dek pamarintah Indonesia sabagai cagar budayo pado 2007.[2][5][6]
Arsitektur Musajik Tuo Siguntua mangikuti bantuak musajik tradisional Minangkabau pado umumnyo, yaitu badenah pasegi jo atok limas barundak-undak. Konstruksinyo alah mangalami banyak parubahan sajak didirian, diantaranyo panggantian material atok, pondasi, jo dindiang.[7]
Sijarah
suntiangSiguntua marujuak pado namo daerah nan pernah manjadi pusek Karajaan Malayu. Daerah Siguntua talatak di hulu Sungai Batanghari. Di kawasan iko, ado babarapo paninggalan Hindu-Buddha. Siguntua dipakiroan lahia sabagai karajaan sasudah masuaknyo Islam. Namun, indak dikatahui pasti bilo masuaknyo Islam ka wilayah Siguntua.[8]
Musajik Tuo Siguntua didirian di sisi selatan Sungai Batanghari, karano persis di sabarangnyo tadapek kompleks bangunan paninggalan Hindu-Buddha, salah satunyo Candi Pulau Sawah.[9] Indak dikatahui bilo pastinyo Musajik Tuo Siguntua didirian. Namun, manuruik panalusuran Balai Pelestarian Peninggalan Purbakala (BP3) Batusangkar, bangunannyo nan katiko kini dipakiroan alah baumua labiah dari 100 tahun.[2][3]
Dalam pajalanannyo, musajik iko sempat indak digunoan untuak baribadah, karano kondisi bangunan nan indak layak, tarutamo bagian lantai nan kayunyo alah lapuak.[9] Pamugaran baru dapek dikarajoan dek ahli waris dan masyarakaik satampek pado 1957. Lantai nan samulo bakolong dan tabuek dari papan kayu kini ko alah disemen.[10]
Salanjuiknyo, bagian atok, pondasi, dan dindiang alah diganti jo material baru dek BP3 Batusangkar pado taun anggaran 1992/1993. Salain itu, dilakukan pambongkaran pintu jo jendela, mambuek selasar, paga beton, paga kawek baduri, sarato pintu basi. Pangarajoan akhia barupo pangacetan rangko atok dindiang, pintu, jendela, jo paga tembok.[10][11]
Kini ko, Musajik Tuo Siguntua masih digunoan sabagai tampek ibadah, namun indak manyalanggaroan salat wajib sacaro bajamaah. Kagiatan ibadah wajib dipusekan di musajik nan baru nan barado di sabalah barat musajik. Walau demikian, pado bulan Ramadan, musajik iko manyalanggaroan salat Tarawih bajamaah sarato jo pangajian wirid.[9]
Rupo bangunan
suntiangMusajik Tuo Siguntua tagak di ateh tanah baukuran 20,44 x 20 meter. Bangunan utamo nan baguno sabagai ruang salat babantuak pasegi baukuran 13,2 x 13,2 meter.[8] Pintu manuju ruang utamo hanyo tadapek di sisi timur, tabuek dari kayu bawarna krem.[12] Pintu tasabuik baukuran 2,15 x 1 meter, badaun duo jo babantuak jalusi (ado ventilasi).[12]
Dindiang bangunan tabuek dari batu batang aia sataba 40 sampai 50 cm nan diplester semen.[2] Musajik iko punyo sapuluah jendela baukuran 1,75 x 0,75 meter nan masiang-masiang badaun duo jo tabuek dari kayu bawarna krem. Satiok daun jendela baukuran 1,75 x 0,37 meter.[10]
Sabagaimano musajik baarsitektur Minangkabau lainnyo, atok Musajik Tuo Siguntua barupo tajug, yaitu bantuak limas bujur sangkar barundak-undak jo pamukaan nan malangkuang ka dalam. Atok tabuek dari seng, ditopang dek tiang-tiang babahan kayu ulin. Tiang utamonyo atau disabuik tiang macu punyo diameter 40 cm dan tinggi 7,85 meter.[10][10]
Bangunan mihrab dibuek manjorok kalua di sisi barat baukuran 2,5 x 3 meter. Tadapek mimbar di mihrab musajik, tapi alah indak dipagunoan lai karano Musajik Tuo Siguntua indak digunoan lai untuak salat Jumaik.[2]
Tampek bawuduak tadapek di sabalah utara musajik baukuran 7 x 3 meter nan tabagi dalam tigo ruangan. Iko marupokan bangunan tambahan nan tabuek dari batu simin.[10]
Kawasan Musajik Tuo Siguntua dikalialiangi jo paga beton di bagian mungko dan paga kawek baduri di bagian sampiang dan balakang. Pintu masuak manuju laman musajik barado di bagian timur tabuek dari basi.[2][10]
Pakuburan
suntiangMusajik Tuo Siguntua barado sa pakarangan jo pandam pakuburan rajo-rajo Siguntua, nan barado di sabalah utara musajik. Pandam pakuburannyo babantuak sagi limo baukuran 40 x 24,5 meter. Di dalamnyo, tadapek anam pakuburan nan masiang-masiangnyo hanyo ditandoi jo nisan jo jirat dari bata jo batu. Rajo-rajo Siguntua nan bamakam yaitunyo: Sultan Muhammad Syah bin Sora, Sultan Abdul Jalil bin Sultan Muhammad Syah Tuangku Bagindo Ratu II, Sultan Abdul Kadire Tuangku Bagindo Ratu III, Sultan Amirudin Tuangku Bagindo Ratu IV, Sultan Ali Akbar Tuangku Bagindo V, dan Sultan Abu Bakar Tuangku Bagindo Ratu VI.[2][10][6]
Rujuakan
suntiang- ↑ "Sitiung - Pemerintah Kabupaten Dharmasraya". Pemerintah Kabupaten Dharmasraya Adat Basandi Syarak, Syarak Basandi Kitabullah. Diarsipkan dari versi asli tanggal 2019-09-18. Diakses tanggal 2019-09-04.
- ↑ a b c d e f g BPCB Sumatra Barat 2018.
- ↑ a b Masjid-masjid Kuno... 2006.
- ↑ Republika 16 Mei 2017.
- ↑ Pemerintah Provinsi Sumatera Barat 2012.
- ↑ a b & Ernatip 2012.
- ↑ I.G.N. Anom, dkk 1996, hlm. 51.
- ↑ a b BPCB Sumatra Barat 2018, hlm. 18.
- ↑ a b c Rezka Delpiera 6 Juni 2017.
- ↑ a b c d e f g h situsbudaya.id 2 April 2009.
- ↑ I.G.N. Anom, dkk 1996.
- ↑ a b BPCB Sumatra Barat 2018, hlm. 19.
Daftar pustaka
suntiang- Masjid-masjid Kuno di Sumatra Barat, Riau, dan Kepulauan Riau. Batusangkar: Balai Pelestarian Peninggalan Purbakala (BP3) Batusangkar. 25 Oktober 2006. https://kebudayaan.kemdikbud.go.id/bpcbbatusangkar/wp-content/uploads/sites/28/2015/04/Masjid-Kuno-Sumbar-Riau-Kepri-Sugi-2006-Cet.-2-Rev.pdf. Diakses pado 25 April 2019.
- "Daftar Cagar Budaya Tidak Bergerak Provinsi Sumatera Barat". Pemerintah Provinsi Sumatera Barat. 2012. Diakses tanggal 25 April 2019.
- "Deskripsi Cagar Budaya Tidak Bergerak Kabupaten Dharmasraya Provinsi Sumatera Barat" (PDF). Balai Pelestarian Cagar Budaya (BPCB) Sumatra Barat. 2018. Diarsipkan dari versi asli (PDF) tanggal 2019-04-26.
- "Masjid Tua Siguntur Kabupaten Dharmasraya Sumatera Barat". situsbudaya.id. 2 April 2009. Diakses tanggal 25 April 2019.
- Rezka Delpiera (6 Juni 2017). "Masjid Siguntur, Saksi Perkembangan Islam di Dharmasraya". klikpositif.com. Diarsipkan dari versi asli tanggal 2018-06-30.
- Anom, I. G. N.; Sugiyanti, Sri; Hasibuan, Hadniwati (2006). Hasil Pemugaran dan Temuan Benda Cagar Budaya PJP I. Jakarta: Direktorat Jenderal Kebudayaan Kementerian Pendidikan dan Kebudayaan Indonesia. https://books.google.co.id/books?id=BjXkCgAAQBAJ&pg=PA51&lpg=PA51&dq=masjid+siguntur&source=bl&ots=7Xq8a2VRMO&sig=ACfU3U1EmsGYBixrWs2UGxnEONcl0TIl9Q&hl=id&sa=X&ved=2ahUKEwjRqYPy6-_hAhXQ7nMBHcGUAJw4ChDoATAFegQICBAB#v=onepage&q=masjid%20siguntur&f=false. Diakses pado 25 Oktober 1996.
- Ernatip (2012). "Pewarisan Seni Tradisi di Minangkabau (Studi Tentang Tari Toga di Nagari Siguntur Kabupaten Dharmasraya)". Bunga Rampai Budaya Sumatera Barat, Budaya Masyarakat Minangkabau: Seni, Teknologi Tradisional, dan Hubungan Antar Budaya. Jakarta: Kementerian Pendidikan dan Kebudayaan Republik Indonesia. http://repositori.kemdikbud.go.id/10876/1/bunga%20rampai%20budaya%20sumatera%20barat.pdf.