Karajaan Siguntua adolah sabuah karajaan nan alah ado samanjak tahun 1250 pasca runtuahnyo Karajaan Dharmasraya. Karajaan iko batahan salamo babarapo maso hinggo kamudian dikuasai dek Karajaan Pagaruyuang, tatapi sampai kiniko ahli warih istano karajaan masih ado dan tetap bagala Sutan. Ahli warih nan mamagang jabatan rajo Siguntua hinggo maso kini adolah Sutan Hendri. Kalau diparahatian dari rajo-rajo nan pernah mamarintah, karajaan iko tamasuak banauang di bawah karajaan Pagaruyung di bawah pamarintahan Adityawarman. Bahaso nan dipagunoan di karajaan Siguntua adolah bahaso Minang dialek Siguntua nan mirip jo dialek Payakumbuah.[1][2]

Sijarah suntiang

Sijarah karajaan Siguntua alum banyak dikatahui, namun manuruik sumber lokal manyabuikan bahwasanyo daerah Siguntua marupoan sabuah karajaan Dharmasraya di Swarnabhumi (Sumatra) nan bakadudukan di hulu bantang aia Batanghari, bantang aia iko malewati Provinsi Jambi dan kamudian bamuaro di lauik Cino Salatan. Sabalum agamo Islam masuak ka wilayah Minangkabau atau Jambi, karajaan Siguntua marupoan karajaan ketek nan banauang di bawah karajaan Malayu, namun pernah banauang pulo pado karajaan Sriwijaya, Majapahit, Singosari, jo Minangkabau.[3]

Pado tahun 1197 (1275 M), Siguntua marupoan pusek Karajaan Malayu dengan rajonyo Mauliwarmadewa nan bagala Sri Buana Raya Mauliawarmadewa sabagai rajo Dharmasraya. Sadangkan dalam prasasti Amonghapasa manyabuikan bahwasanyo pado tahun 1286 Sri Maharaja Tribhuwanaraja Mauliawarmadewa basamayam di Dharmasraya, daerah padalaman Riau daratan. Dengan kato lain karajaan Swarnabhumi pado wakatu itu alah dipindahan dari Jambi ka Dharmasraya. Manuruik kaduo pandapek tasabuik, ado kamungkinan pado abaik 12 karajaan Siguntua iko barasa dari karajaan Swarnabhumi Malayupuri Jambi.[4]

Pado abaik ka-14, agamo Islam masuak ka Karajaan Siguntua. Pado wakatu itu nan bakuaso adolah rajo Pramesora nan baganti namo manjadi Sultan Muhamad Syah bin Sora Iskandarsyah. Salanjuiknyo karajaan Siguntua banauang di bawah Karajaan Alam Minangkabau. Salah ciek bukti Karajaan Siguntua manganuik agamo Islam taliek pado masyarakaiknyo nan mamagang prinsip syarak basandi Kitabullah. Salain itu, ditemuan pulo duo buah stempel karajaan Siguntua babahaso Arab nan manyabuikan bahwasanyo "Cap iko dari Sultan Muhammad Syah bin Sora Iskandar atau Muhammad Sultan Syah Fi Siguntur Lillahi" jo "Cap iko batuliskan bahwasanyo Al-Watsiqubi 'inayatillahi' 'azhiim Sutan Sri Maharaja Diraja Ibnu Sutan Abdul Jalil 'inaya Syah Almarhum." Dipakiroan pulo pado maso ikolah Musajik Siguntua didirian.[5]

Paninggalan suntiang

Karajaan Siguntua iko manyisoan sabuah jinih tarian nan disabuik tari toga (tari larangan), sabuah tarian nan mirip jo tarian Melayu sarato jo tarian Minang. Tari toga manjadi tari resmi karajaan jo dipatunjuakan pado upacara panobatan rajo atau batagak gala, baralek keluarga rajo, upacara turun mandi anak rajo, parayoan kamanangan paparangan, sarato jo manjadi tampek mancari jodoh putri rajo. Pado maso Balando nan katiko itu masuak ka Siguntu pado tahun 1908, rajo-rajo di Siguntua jo sakitarnyo tapaso mangakui kadaulatan Hindia Balando nan mambuek rajo kahilangan kadaulatannyo. Banyak benda karajaan nan diambiak dek urang Balando, tamasuak tambo (riwayaik karajaan nan tatulis) jo kagiatan kesenian karajaan, tamasuak tari toga.[1][6]

Samanjak kabaradoan Balando tasabuik, tari toga alah indak dipatunjukan lai. Para panari jo padendang nan pandai dari tari tasabuik banyak nan maningga sahinggo indak ado generasi panaruihnyo sahinggo mambuek tari iko hanyo diingek jo dikanali dari carito turun-tamurun. Pado tahun 1980, pawarih Karajaan Siguntua, Tuan Putri Marhasnida, manamuan saurang rang gaek nan katiko itu alah baumua 80 tahun. Urang gaek tasabuik masih hapa kasado dendang nan tadapek dalam tari toga sabab baliau salalu malantunkan dendang katiko malakuan kagiatan Batobo. Batobo adolah mambarasiahan kabun atau manyabik di sawah basamo-samo nan malibaikan 30 sampai 60 urang. Si padendang salalu Batobo bia urang-urang indak bosan bakarajo saharian, inyo disuruah badendang sambia bakarajo. Pado tahun 1989, dengan takumpuanyo kadasado infomasi nan bakaitan jo tari toga mako tari toga pado tahun tasabuik iduik baliak dan dapek dipatunjuakkan baliak dengan adonyo saketek modifikasi. Tari toga modifikasi Marhasnida iko kamudian ditampilan di Radio Republik Indonesia (RRI) Padang pado 1990 sarato jo dimainan dalam babagai acara Karajaan Siguntua, tamasuak manyambuik peserta "Arung Sejarah Bahari Ekspedisi Pamalayu" nan disalanggaroan dek Balai Pelestarian Sejarah dan Nilai Tradisional Padang.[6][7]

Rajo-rajo siguntua suntiang

Barikuik ko rajo-rajo Siguntua[1]:

Pariode Hindu-Buddha suntiang

  1. Sri Tribuwana Mauliwarmadewa (1250-1290)
  2. Sora (Lembu Sora) (1290-1300)
  3. Pramesora (Pramesywara) (1300-1343)
  4. Adityawarman (kanakamedinindra) (1343-1347) - basamoan dalam mamarintah Dharmasraya jo Pagaruyung.
  5. Adikerma (putra Paramesora) (1347-1397)
  6. Guci Rajo Angek Garang (1397-1425)
  7. Tiang Panjang (1425-1560)

Pariode Islam suntiang

  1. Abdul Jalil Sutan Syah (1575-1650)
  2. Sultan Abdul Qadir (1650-1727)
  3. Sultan Amiruddin (1727-1864)
  4. Sultan Ali Akbar (1864-1914)
  5. Sultan Abu Bakar (1914-1968)
  6. Sultan Hendri (1968-maso kini) — hanyo sabagai pajabaik sajo, tanpa kakuasaan karano karajaan Siguntua tingga namo sajo.[8]

Rujuakan suntiang

  1. a b c "Sekilas Sejarah Kerajaan Siguntur di Dharmasraya Dalam Jejak Digital". Metropolis.co.id (dalam bahasa Indonesia). 14 Agustus 2018. Diakses tanggal 2020-09-16. 
  2. Rahmayani, Omy (2016-08-29). "IDENTIFIKASI PENINGGALAN-PENINGGALAN BERSEJARAH DI KABUPATEN DHARMASRAYA" (dalam bahasa Indonesia). UNIMED. 
  3. "Kerajaan Siguntur Minta Peninggalan Kerajaan Dipindahkan ke Dharmasraya". Tempo (dalam bahasa Inggris). 2008-01-30. Diakses tanggal 2020-09-16. 
  4. "Perancangan media informasi tentang kerajaan siguntur". repository.isi-padangpanjang.ac.id. Diarsipkan dari versi asli tanggal 2021-01-26. Diakses tanggal 2020-09-16. 
  5. "Cagar Budaya Kabupaten Dharmasraya". kebudayaan.kemdikbud.go.id. Diarsipkan dari versi asli tanggal 2021-07-01. Diakses tanggal 2020-09-16. 
  6. a b "Potret Budaya Nagari Siguntur Dharmasraya". Berita Sumatra Barat Terkini (dalam bahasa Indonesia). 2017-02-06. Diakses tanggal 2020-09-16. 
  7. KlikPositif. "Festival Pamalayu, Ajang Pariwisata Kenalkan Destinasi Dharmasraya Melalui Sejarah | KlikPositif.com - Media Generasi Positif". Festival Pamalayu, Ajang Pariwisata Kenalkan Destinasi Dharmasraya Melalui Sejarah | KlikPositif.com - Media Generasi Positif (dalam bahasa Indonesia). Diarsipkan dari versi asli tanggal 2021-10-22. Diakses tanggal 2020-09-16. 
  8. Sejarah Siguntur