Wikipedia

Deklarasi Universal Hak Asasi Manusia

(Dialiahkan dari DUHAM)

Deklarasi Universal Hak Asasi Manusia (disingkek DUHAM; bahaso Inggirih: Universal Declaration of Human Rights, disingkek UDHR) adolah sabuah dokumen antarobanso nan mangatur tantang hak jo kabebasan asasi untuak sadoalah urang iduik dan diadopsi dek Majelis Umum Pasarikatan Banso-Banso sabagai Resolusi 217 pado sesi katigonyo tanggal 10 Desember 1948 di Palais de Chaillot di Paris, Parancih.[1] Dari 58 nagara anggota PBB pado maso itu, 48 mandukuang, 8 mamiliah abstain, 2 indak mamiliah, dan indak ado nan manulak.[2]

Universal Declaration of Human Rights
Eleanor Roosevelt mamacik versi DUHAM dalam bahaso Inggirih
Hak-hak asasi nan disatujui dek Majelis Umum PBB pado patamuannyo nan ka-183 di Paris pado 10 Desember 1948
Disusun1948
Diratifikasi10 Desember 1948
TampekPalais de Chaillot, Paris
PanyusunKomisi panyusun[lower-alpha 1]
TujuanHak asasi manusia

DUHAM punyo 30 pasal nan mangatur tantang "hak jo kabebasan dasar surang individu" dan managehan karakternyo nan universal sabagai tacelak, indak bisa diasiangkan, dan balaku untuak saluruah urang.[1] Dokumen ko diadopsi sabagai sabuah "standar basamo untuak dicapai sadoalah urang jo banso" dan maikek nagara nan manando tanganinyo untuak mangakui sadoalah urang sabagai "jiwa nan laia bebas dan setara dalam kaormatan jo hak-haknyo" tanpa mairaukan "kabansoan, tampek tingga, jinih kalamin, asal banso atau etnis, warna kulik, agamo, bahaso, atau status-status lain".[3] DUHAM dianggap sabagai sabuah dokumen nan pantiang dek karena bahaso susunannyo nan basipaik universal dan indak ado marujuak pado budayo, sistem politik, atau agamo nan tatantu.[4][5] Dokumen ko baperan pantiang dalam mangambangkan hukum hak asasi manusia antarobanso, dan marupokan langkah nan jolong kali dalam panyusunan International Bill of Human Rights nan disalasaikan pado tahun 1966 dan mulai balaku pado tahun 1976.

DUHAM adolah sabuah resolusi nan indak basipaik maikaik pado nagara-nagara nan manando tanganinyo, namun isi nan diaturnyo alah dijalehan dan diturunkan dalam pajanjian antarobanso, instrumen hak asasi manusia pado tingkek wilayah, konstitusi nagara, sarato paraturan-paraturan parundang-undangan nasional.[1] Sadoalah nagara anggota PBB (193 nagara) alah maratifikasi paliang indak satu dari sambilan pajanjian antarobanso nan basipaik maikaik dan dipangaruahi dek deklarasi ko, dan mayoritas nagara alah maratifikasi labiah dari ampek macam pajanjian tu.[1] Sabagian sarjana hukum bapandapek baso banyak nagara alah marujuak pado DUHAM dalam 50 tahun taakhia, deklarasi ko alah basipaik maikaik sabagai bagian dari hukum kabiasaan antarobanso,[6][7] walaupun pangadilan di babarapo nagara alah mambatehi dampak dari pambalakuannyo.[8][9] DUHAM alah sacaro laweh mampangaruhi pakambangan hukum, politik, jo sosial di tingkek global maupun nasional, dan alah ditajamahan ka labiah dari 524 macam bahaso.[10]

Sajarah

suntiang

Pangasahan

suntiang

DUHAM disahkan dek Majelis Umum Pasarikatan Banso-Banso sabagai Resolusi Majelis Umum A/RES/217(III)[A] pado 10 Desember 1948 di Palais de Chaillot, Paris.[11] Dari 58 nagara anggota PBB pado maso itu,[12] 48 mandukuang, indak ado nan manulak dan 8 mamiliah abstain.[13][14] Honduras jo Yaman indak sato mamiliah.[15] Eleanor Roosevelt, istri Presiden Amerika Sarikat Franklin D. Roosevelt, mamainkan paran nan pantiang untuak maimpun dukuangan bagi pangasahan dokumen ko, tamasuak di nagaranyo surang maupun di nagara-nagara lain, dek karano kamampuannyo untuak bakampanye pado blok-blok politik nan saliang batantangan.[16]

Dalam catatan debat tantang pangasahan DUHAM,[17] Afrika Selatan barusao untuak malinduangi institusi apartheid nan nyato-nyato malanggar banyak pasal dalam deklarasi.[13] Arab Saudi nan mamiliah abstain disababkan dek Pasal 18, nan manjamin hak untuak maubah agamo atau kapacayaan, sarato Pasal 16, nan manjamin hak pakawinan nan setara.[13] Anam nagara nan bahaluan komunis mamiliah abstain dek karano DUHAM dianggap indak cukuik tajam mangutuak fasisme jo Nazisme;[18] namun Eleanor Roosevelt mangatokan baso alasan nan sabananyo adola Pasal 13, nan manjamin hak warga nagara untuak kalua dari nagaranyo (hak ekspatriasi).[19] Babarapo pangamat hukum bapandangan baso panantangan blok komunis nan dipimpin Uni Soviet disababkan dek adonyo pasal-pasal nan mamuaik hak negatif, cando pasal nan mangamanatkan pamarintah untuak indak malangga hak sipil dan politik tatantu.[20] Delegasi Inggirih, nan mamiliah mandukuang DUHAM, maraso frutrasi dek sabab dokumen akhianyo manganduang tangguangjawab moral namun indak ado kakuatan hukum.[21] Baru pado tahun 1976, kutiko Pajanjian Antarobanso tantang Hak Sipil jo Politik mulai balako, isi dari DUHAM punyo kakuatan hukum.

 
Hasil pamungutan suaro dalam sidang pleno:
Warna hijau: mandukuang;
Warna oren: mamiliah abstain;
Warna itam: indak mamiliah;
Warna abu-abu: alun bagabuang ka dalam PBB pado wakatu sidang

48 nagara nan mandukuang pangasahan DUHAM:[22]

8 nagara nan mamiliah abstain:[22]

Duo nagara nan indak mamiliah:

Batang tubuah jo isi

suntiang

Batang tubuah DUHAM dipangaruahi dek Kode Napoleon, nan mamuaik satu mukadimah dan prinsip-prinsip dasar.[23] Struktur nan final disusun dalam rancangan tahap kaduo nan dirumuskan dek ahli hukum Parancih René Cassin, nan mangambangan rancangan awal nan dirumuskan dek ahli hukum Kanada John Peters Humphrey.

Batang tubuah DUHAM manganduang:

  • Mukadimah nan manyatoan alasan kasajarahan jo sosial nan mambuek paralu panyusunan Deklarasi.
  • Pasal 1–2 manjalehan konsep dasar kaormatan, kabebasan, jo kasetaraan.
  • Pasal 3–5 manubuahan hak-hak individu lainnyo, saroman hak untuak iduik sarato larangan untuak mampabudak jo mambuek seso.
  • Pasal 6–11 manjalehan legalitas dasar hak asasi manusia dan upayo hukum nan dapek ditampuah untuak mampatahankannyo kok dilangga.
  • Pasal 12–17 manubuahan hak individu taadok masyarakatnyo, cando kabebasan bagarak, kabebasan batampek tingga, hak ateh properti, jo hak ateh kawarganagaraan.
  • Pasal 18–21 manubuahan "kabebasan konsttitusional" sarato kabebasan spiritual, publik, dan politis saroman kabebasan bapikira, kabebasan bapandapek, kabebasan mangaluakan ekspresi, kabebasan manganut agamo jo kapicayaan, kabebasan bakumpua, sarato kabebasan manarimo dan mangolah gagasan jo informasi malalui media.
  • Pasal 22–27 manubuahan hak-hak ekonomi, sosial, jo budayo cando hak ateh kasiatan, hak ateh standar iduik, hak untuak mandapek akomodasi tambahan dek karano cacat atau disabilitas, sarato panyabutan nan kusuih untuak hak diasuah bagi ibu jo anak.[24]
  • Pasal 28–30 manjalehan arati umum tantang palaksanaan hak-hak, pambatasan jo situasi nan mambatasi palaksanaan hak individu, sarato larangan untuak mamakai hak-hak nan tasabuik untuak malawan tujuan organisasi PBB.[25]

Rujuakan

suntiang
  1. ↑ a b c d "Human Rights Law". www.un.org (dalam bahasa Inggris). 2015-09-02. Diakses tanggal 2020-08-20. 
  2. ↑ "A/RES/217(III)". UNBISNET. Diarsipkan dari versi asli tanggal 21 January 2019. Diakses tanggal 24 May 2015. 
  3. ↑ UDHR Booklet, Art. 2.
  4. ↑ "Universal Declaration of Human Rights". www.amnesty.org (dalam bahasa Inggris). Diakses tanggal 2020-08-20. 
  5. ↑ "Human Rights: The Universal Declaration vs The Cairo Declaration". Middle East Centre. 2012-12-10. Diakses tanggal 2020-08-20. 
  6. ↑ Henry J Steiner and Philip Alston, International Human Rights in Context: Law, Politics, Morals, (2nd ed), Oxford University Press, Oxford, 2000.
  7. ↑ Hurst Hannum, The universal declaration of human rights in National and International Law Archived 2020-01-03 di Wayback Machine., p.145
  8. ↑ Posner, Eric (2014-12-04). "The case against human rights | Eric Posner". The Guardian (dalam bahasa Inggris). ISSN 0261-3077. Diakses tanggal 2020-01-22. 
  9. ↑ Sosa v. Alvarez-Machain, 542 U.S. 692, 734 (2004).
  10. ↑ "OHCHR | Universal Declaration of Human Rights Main". www.ohchr.org. Diakses tanggal 2020-08-20. 
  11. ↑ "Palais de Chaillot. Chaillot museums". Paris Digest. 2018. Diakses tanggal 2018-12-31. 
  12. ↑ "Growth in United Nations membership, 1945–present". www.un.org (dalam bahasa Inggris). Diakses tanggal 2018-02-01. 
  13. ↑ a b c CCNMTL. "default". Center for New Media Teaching and Learning (CCNMTL). Columbia University. Diakses tanggal 2013-07-12. 
  14. ↑ UNAC. "Questions and answers about the Universal Declaration of Human Rights". United Nations Association in Canada (UNAC). hlm. "Who are the signatories of the Declaration?". Diarsipkan dari versi asli tanggal 2012-09-12. 
  15. ↑ Jost Müller-Neuhof (2008-12-10). "Menschenrechte: Die mächtigste Idee der Welt". Der Tagesspiegel (dalam bahasa Jerman). Diakses tanggal 2013-07-12. 
  16. ↑ "70 Years of Impact: Insights on the Universal Declaration of Human Rights". unfoundation.org (dalam bahasa Inggris). 2018-12-05. Diakses tanggal 2020-09-13. 
  17. ↑ United Nations. "default". Diakses tanggal 2017-08-30. 
  18. ↑ Peter Danchin. "The Universal Declaration of Human Rights: Drafting History – 10. Plenary Session of the Third General Assembly Session". Diakses tanggal 2015-02-25. 
  19. ↑ Glendon 2002, pp. 169–70
  20. ↑ "70 Years of Impact: Insights on the Universal Declaration of Human Rights". unfoundation.org (dalam bahasa Inggris). 2018-12-05. Diakses tanggal 2020-09-13. 
  21. ↑ Universal Declaration of Human Rights. Final authorized text. The British Library. 1 September 1952. http://www.bl.uk/collection-items/universal-declaration-of-human-rights. Diakses pado 16 Agustus 2015. 
  22. ↑ a b "Yearbook of the United Nations 1948–1949 p 535" (PDF). Diarsipkan dari versi asli (PDF) tanggal September 27, 2013. Diakses tanggal 24 July 2014. 
  23. ↑ Glendon 2002, pp. 62–64.
  24. ↑ Universal Declaration of Human Rights, United Nations, 1948 
  25. ↑ Glendon 2002, Chapter 10.

Bibliografi

suntiang


Kutipan rusak: Tag <ref> ado untuak grup banamo "lower-alpha", tapi indak ado <references group="lower-alpha"/>

Diambiak dari "https://min.wikipedia.org/w/index.php?title=Deklarasi_Universal_Hak_Asasi_Manusia&oldid=3159452"