Tinggam Kajai

Tinggam Kajai adolah sabuah pakampuangan tradisional nan barao di Kabupaten Pasaman Barat, Sumatera Barat. Pakampuangan iko labiah tapeknyo barado di Nagari Kajai, Kecamatan Talamau, Pasaman Barat. Pakampuangan iko di sabuik juo jo namo pakampuangan tuo Tinggam Kajai karano pakampuangan tasabuik alah ado samanjak abaik ka 16. Di dalam kawasan pakampuangan Tinggam Kajai iko tadapaek tigo buah kampuang tradisional, yaitunyo kampuang Tinggam Mudiak, kampuang Tinggam Hilia sarato jo kampuang Kasiak Putiah. Katigo kampung tasabuik barado pulo di jorong nan samo yaitunyo Jorong Lubuak Sariak.

Perkampungan tradisional Tinggam Kajai

Lokasi

Kawasan parumahan Tinggam Kajai barado di jalan kampuang tinggam, Jorong Lubuak Sariak, Kecamatan Talamau, Kabupaten Pasaman Barat, Provinsi Sumatera Barat. Kawasan iko barado di kawasan dataran tinggi bukik barisan nan dakek juo jo gunuang talamau. jarak pakampuangan tasabuik dari pusek kabuaten Pasaman Barat bajarak labih kurang 17 km. Kaadaan jalan manuju ka lokasi relatif lancar. Lokasi tasabuik talatak labiah kurang 4 km dari jalan rayo Simpang Ampek manuju ka Talu. Kamudian, dari pasa Kajai Lubuak Sariak dapek ditampuah jo kandaraan baiak roda duo maupun roda ampek malalui jalan tanah sarato jo malewati sabuah jembatan gantuang.

Sijarah

Kawasan pakampuangan tradisional Tinggam Kajai iko alah ado samanjak abaik ka 16. Lokasinyo nan barado di Jorong Lubuak Sariak nan marupoan salah ciek jorong nan barado di Nagari Kajai, manjadian kawasan tasabuik manjadi salah ciek jorong nan mampunyoi wilayah nan cukuik laweh. Sacaro wilayah adaik pakampuangan tradisional nan ado di Jorong Lubuak Sariak bajumlah 3 kampung, duo diantaronyo masih dalam ciek kawasan nan dinamoan Pakampuangan Tinggam, dan ciek kampuang lainnya bajarak indak jauah dari pakampuangan Tinggam nan dinamaoan pakampuangan Kasiak Putiah. Artinyo dalam ciek jorong tasabuik tadapaek 3 kampuang tradisional, yaitunya kampuangTinggam Mudiak, kampuang Tinggam Hilia, jo kampuang kasiak Putiah. Ka tigo kampung tasabuik disabuik dalam satu kawasan parumahan tradisional yaitunyo kawasan perumahan tradisional Tinggam Kajai. Perkampungan Tinggam Kajai iko pado awa nyo didirikan dek Siak Bonda disabuik juo jo sabutan Tongku atau Tuanku Imam nan mandapek tugas dari Yang Dipertuan Daulat Parit Batu nan bakaduduakan di Simpang Empat. nan sangkek itu manjadi pusek pamarintahan. Dalam sistem pamarintahan adaik, masing-masing pakampungan dipimpin dek masiang-masiang datuak. Kampuang Tinggam Mudiak dipimpin dek Datuak Sati nan barasa dari Suku Jambak, Kampung Tinggam Hilia dipimpin dek Datuak Managun nan barasa dari suku Caniago. dan Kampuang Kasiak Putiah dipimpin dek Datuak Sutan Gumbalo nan barasa dari suku Caniago. Kaduo pakampuangan iko, kampuang tinggam, baik hilia maupun tinggam mudiak jo kampuang kasiak putiah mampunyoi sabuah kaunikan yaitunyo mampunyoi arsitektur bangunan minangkabau nan babeda jo arsitektur minangkabau pado umumnya, Hal tasabuik dapek diliek dari bantuak bangunan nan ado di kawasan tasabuik. Bantuak pakampuanganyo nan babeda jo pakampuangan minangkabau lainyo tasabuik manjadikan kampuang tasabuik manjadi salah ciek cagar budaya nan barado di Kabupaten Pasaman Barat dan juo marupoan salah ciek tujuan atau objek wisata sejarah yang ada di Kabupaten Pasaman Barat.

Bangunan rumah

Kampung iko masih mampatahankan rumah-rumah tradisional nan baumua alah puluahan tahun, bahkan ado babarapo nan alah mancapai umua ratuihan tahun. Duo rumah gadang di siko sempat direnovasi ateh namo bantuan dari pamarintah karano alah amaik rapuah. Salain itu pamarintah alah pulo mampabaiki jalan manuju ka lokasi tasabuik nan mambuek akses kaluaa masuak kampuang manjadi labiah lanca. Kawasan Parumahan Tradisional Tinggam marupoan pakampuangan lamo nan dihuni dek sakitar 100 kapalo keluarga. Pakampuangan Tinggam merupakan salah ciek bantuak pakampuangan tradisional nan sacaro historiografi tradisional Minangkabau atau tambo marupoan wilayah rantau. Sacaro umum, bangunan nan ado di Tinggam babahan kayu. Di paakampuangan Tinggam saindaknyo tadapek 52 bangunan kayu jo parinciannyo iolah 49 bangunan rumah jo 3 bangunan rangkiang. Salain bangunan kayu, pado sisi timua dari pakampuangan tadapek bangunan musajik nan alah manggunoan bahan semen jo bata.

Rumah di Kawasan Kajai mampunyoi kaunikan jo kaunggulan, dimano masyarakaiknyo alah mamahami panataan jo panggunoan ruang nan alah taliek dari pakampuangan nan ta tata dengan sangaik baiak sarato mampunyoi pola tata ruang nan taratur. Pola susunan bangunan tamasuak dalam kategori pola linier, nan mano bangunan barado di sisi baraik jo sisi timua nan dipisahan dek jalan. Wilayah pakampuangan tradisional Tinggam sacaro geografi barado di lambah pabukitan nan barado di sisi baraik, utara jo salatan, sadangkan pado sisi salatan tadapek batang aia nan dek masyarakaik satampek dinamoan Sungai Batang Tinggam. Bangunan rumah nan ado di Pakampuangan mampunyoi babarapo variasi baiak bantuak atok, bantuak pintu, bantuak jendela, janjang. Namun, sacaro umum, bangunan rumah tingga babantuak rumah pangguang atau rumah kolong nan taliek pado bagian nan kosong atau kolong pado bawah bangunan. Bagian kolong rumah ado nan masih mamakai batu sandi jo ado pulo nan alah diganti jo semen.

Ado pulo bangunan rumah tingga nan babantuak rumah bagonjong dengan jumlah gonjong ganok (2 gonjong) nan dilengkapi dengan gonjong tambahan pado bagian pintu jo janjang. Rumah bagonjong nan masih tasiso taliek mamakai sistem tradisional (sistem pasak). Bangunan rumah tingga ado nan badenah ampek pasegi jo ado pulo nan badenah ampek pasegi panjang. Dari segi ukuaran bangunan cukuik variatif, ado nan mampunyoi ukuran panjang 5 m, 6 m, 8 m, jo leba bangunan ado nan punyo leba 4 m, 5 m, 6 m. Salain bangunan rumah tingga masih tadapek 3 rangkiang nan khusus barado di mungko bangunan rumah tingga nan babantuak rumah bagonjong. Pado maso kini ko bangunan pakampuangan tradisional Lubuak Sariak, kanagarian Kajai masih mampatahankan arsitektur aslinyo. Pakampuangan Tradisional Lubuak Sariak nan barado di Kanagarian Kajai marupoan sabuah pakampuangan nan dikuliliangi pabukitan jo pagunuangan, sarato dilalui dek babarapo aliran batang aia. Masyarakaik Pakampungan Tradisional Lubuak Sariak alah bakambang jo manyeba kamano-mano, tatapi kondisi tanah leluhur masih dipatahankan sampai kini ko. Sabagai sumber parekonomian masyarakaik Lubuak Sariak sabagian gadang manjadi petani, dengan kakayoan jo paninggalan arsitektur nan khas jo masih asli, mako pakampuangan tradisional Lubuak Sariak mampunyoi potensi jo dayo tarik nan gadang sabagai objek wisata.

Kahidupan masyarakaik

Masyarakaik kampuang Tinggam Kajai tasabuik manggantuangkan hiduiknyo jo bakarajo batani, bakabun, sarato bataranak. Salain itu katiko wakatu senggang, masyarakaik mambuek karajinan tangan sarupo tampek panangkok ikan. Masyarakaik satampek banyak juo nan jadi pataranak ikan. Animo masyarakaik disinan cukuik tinggi dalam usaho budidaya ikan, tarutamo ikan nila jo ikan ameh. Salain itu, Masyarakaik Tinggam Kajai punyo pulo usaho batani dalam pangolahan minyak nilam. Minyak nilam marupoan salah ciek minyak atsiri nan dihasiakan dek nilam (Pogostemon cablin Benth.) sarato marupoan komoditas unggulan nasional Indonesia. Minyak nilam tasabuik punyo banyak kagunoan, mulai dari pambunuah saranggo, hinggo bamanfaaik pulo sabagai ubek. Sabanyak 90% kabutuahan minyak nilam dunia, disokong dek Indonesia nan barasa dari panyuliangan di palosok-palosok Nusantara. Salah satu tempat penyulingan tersebut berada di Kampung Tinggam Kajai.

Bahaso

Kampuang tradisional di Nagari Kajai mampunyoi pabedaan gaya babahaso jo nagari lainyo nan badakekan, sarupo contoh jo Nagari Sinuruik. pabedaan vokal nan paliang banyak ditemuan antaro Kanagarian Sinuruik jo Kanagarian Kajai adolah pabedaan vokal [a] jo [o]. Sarupo pangucapan kato "kepala", di Nagari Sinuruik di baco jo "kapalo" dan kalau di Nagari Kajai masyarakaik satampek mambaconyo jo "kopalo". Jadi aratinyo kabanyakan Vokal [a] di Sinuruik, manjadi vokal [o] di Kajai. Contoh pabedaan pangucapan kato lainnyo yaitu kato "dahulu", kalau di nagari sinuruk di ucapkan jo "dulu", kamudian kalau di Nagari Kajai diucapkan jo "dolu". Salanjuiknyo kato "nangka" kalau di kanagarian sinuruk di ucapkan jo "cibodak" sadangkan kalau di Kanagarian Kajai diucapkan jo "cobodak". Aratinyo, dalam hal iko. pangucapan Bahasa Minangkabau Sinuruik mampunyoi banyak pasamoan jo Bahaso Minangkabau umum. Contoh lainnyo, kato "makan" dalam Bahaso Minangkabau umum di ucapkan "makan" dalam bahaso masyarakaik sinuruk. Namun babeda jo masyarakaik kajai nan marubah huruf vokal nyo manjadi huruf [e], sahinggo kato "makan" barubah manjadi "maken".