Ci Talua adola buah tangan untuok panginang mapulai atau nak daro. Nak daro ado panginangnyo, mapulai adolo. Panginang nak daro adola padusi baumuo 5-15 taun, pakaiannyo ampie samolo jo nak daro karajonyo mangawani nak daro duduak mananti mapulai datang biasonyao baduo urang. Sadangkan panginang mapulai mairingi mapulai bararak ka uma nak daro, pakaiannyo bebas rapi, jumlanyo banyak ado nan sampai 10-15 urang. Panginang mapulai adola anak laki-laki baumuo 5-12 taun. Biasonyo urang bararak ko banyak tamasuak anak-anak, makonyo panginang diagie tando supayo sonang maagie ci taluo Ci talua adola makanan nan tabuek dari talua abuih diagie gencu mera jo nasi kunik babungkui jo daun sarato jo bungo dari karote batangkai bilah buluah.Bungo dibuek bawarna-warni ado warna mera, kuniang, hijau, pink dan lainnyo bantuknyo rancak. Panjang tangkai bungo ko kiro-kiro 30 - 40 cm bagian atehnyo pucuk bungo, bagian bawa tangkai dirunciang. Caro manyatuannyao ujuang tangkai bungo nan runciang ditusuk an ka talua dah tu ditusuak lo ka nasi kunik nan lah dibungkui. Nan mambuek ci taluo adola pihak nak daro, biasonyo dibuek banyak sabab salain panginanfg adolo nan manintak. Sabalun diagian ka panginang disusun dulu dalam talam, dek nyo banyak rancak nampaknyo. Katiko rombongan mapulai sampai di uma nak daro, panginang barobuik ci talua nan la disadion dek urang uma nak daro. Anak-anak ko sanang bana atinyo mandapek ci taluo, ado nan indak namuah makan dibaoknyo pulang, baitu juo panginang nak daro dapek ci taluo pulo. Sampai kini ci talua masih manjadi buah tangan untuk panginang diacara barolek kawin. Tradisi panginang jo ci taluo ko ado di nagori Pangkalan Koto Baru Kabupaten Lima Puluh Kota.
