Randang baluik

Randang baluik (bahasa Indonesia: rendang belut) adolah variasi randang nan babahan baluik. Masakan iko marupoan masakan tradisional khas Minang nan tarutamo tadapaek di Kabupaten Tanah Datar, Sumatra Barat. Randang baluik dihidangkan basamo-samo dengan masakan lain dalam pahelatan adat Minang, sarupo di acara baralek, turun mandi, khitanan, batagak pangulu, jo sabagainyo.

Baluik nan ka dimasak talabiah dahulu dibarasiahan lendirnyo dan kamudian salanjuiknyo dibaka di ateh api sahinggo kariang. Sacaro umum, proses pambuatan randang baluik samo sarupo randang dagiang, hanyo babeda pado panggunoan banyak macam daun katiko mamasak. Bumbu-bumbu dimasuakan ka dalam santan dan diaduak hinggo santan mangental. Sasudah itu, baluik dimasuakan basamo daun-daun sambia taruih diaduak hinggo kuah santan kariang dan warnanyo manjadi galok.

Hidangan randang baluik mampunyoi tekstur gurih dengan raso asam jo padeh. Randang baluik disajian dengan daun-daun nan digunoan katiko mamasak. Daun-daun tasabuik dimakan, sadangkan tulang baluik indak dimakan.

Bahan

Baluik

Bagi masyarakaik Minangkabau di Tanah Datar, baluik dapek diolah sabagai makanan dengan proses mamasak randang. Dek sabab itu, hidangan iko disabuik sabagai randang baluik. Baluik marupoan sumber protein. Manuruik gizinyo, baluik mampunyoi kanduangan protein nan tinggi malabiahi kanduangan protein nan ado pado ikan. Karano pamukaan badan baluik dilapisi dek salapuik lendir, baluik nan akan dimasak talabiah dahulu dibarasiahan lendirnyo.

Baluik umumnyo didapek atau ditangkok dari areal pasawahan. Areal pasawahan mamungkinkan tampek bakambang biaknyo baluik. Ado alaik tradisional nan digunoan untuak manangkok baluik yaitunyo lukah, sarupo bubu. Salain ditangkok dari areal pasawahan, ado pulo nan malakuan usaho budi daya baluik untuak mangimbangi pamintaan konsumen nan samakin tinggi.

Bumbu dan dedaunan

Bumbu nan diparaluan untuak mambuek randang baluik, yakninyo karambia, sipadeh, langkueh, bawang merah, bawang putiah, katumba, garam, lado merah, lado rawit, dan babarapo macam daun-daunan. Untuk 1 kg baluik, diparaluan ampek karambia. Daun-daunan bafungsi sabagai panyadap raso. Ado banyak macam daun-daun nan digunoan di antaronyo: daun surian, daun asam batang, daun kantuik-kantuik, daun kasambi, daun aka katidiang, daun kapeh, daun asam kudo, daun aka baluik, daun kunyik, daun salam, jo daun jeruk puruik.

Pangolahan

Pangolahan randang baluik indak babeda jo pangolahan randang pado umumnyo. Bahan utamonyo, yaitunyo baluik. Sabalum diolah dan dimasak jo bumbu randang, baluik dibarasiahan talabiah dahulu agar lendir pado baluik hilang. Caronyo, yakni dengan manggosok baluik pado daun sarai, daun jambu biji, atau abu dapur (abu dari tungku) dan manyiramkan aia angek. Adopun untuak mailangan bau amis, baluik dibaka di ateh api manyalo.

Baluik nan alah barasiah digoreng manggunoan minyak hinggo rapuah atau garing, tatapi jaan talalu lamo agar baluik indak kariang. Pangariangan baluik dapek pulo dilakuan dengan caro dijamua, tatapi mambuek baluik jadi kareh. Pangariangan baluik tagantuang pado kabiasoan masiang-masiang urang.

Samintaro itu, bumbu-bumbu dihaluian jo daun-daun diirih untuak dimasuakan ka dalam santan sambia diaduak. Proses pangaduakan taruih dilakuan hinggo warna kuah santan manjadi galok. Sasudah itu, baluik dimasuakan jo diaduak hinggo kuah jadi kariang.

Daftar pustaka

• Ensiklopedi Makanan Tradisional Indonesia. Kementerian Kebudayaan dan Pariwisata. 3 Desember 2004. http://repositori.kemdikbud.go.id/8306/1/ENSIKLOPEDI%20MAKANAN%20TRADISIONAL%20INDONESIA%20-%20SUMATERA.pdf. 
• Reno Andam Suri (2012). Rendang Traveler: Menyingkap Bertuahnya Rendang Minang. Terrant Ink. ISBN 979-3750-45-6. http://worldcat.org/oclc/808205065. 
• "Si Licin Belut Kuatkan Tulang". Kompas.com. 7 November 2008.