Batagak pangulu

Batagak pangulu marupokan upacara adaik Minangkabau dalam rangka maresmikan saurang manjadi panghulu. Dalam hal ko pangangkatan atau paresmian panghulu indak dapek dilakuan dek kaluarga nan basangkutan sajo. Paresmian haruslah bapedoman kapado patitiah adaik “maangkek rajo, sakato alam, maangkek panghulu sakato kaum”. Tata tertib maresmikan panghulu dimulai dari rapek atau mufakaik kaum, kamudian dibaok kahalaman nan artinyo dibaok masalahnyo ka dalam kampuang lalu diangkek ka tingkek suku jo akhianyo di baok dalam Karapatan Adaik Nagari (KAN),nan bahak mamasangkan deto panghulu (tutuik kapalo kabasaran panghulu) nan baru diangkek iolah pucuak adaik.

Pangangkatan panghulu dapek juo dilakuan jo padoman iduik bakarilaan, mati batungkek mati artinyo, jikok saurang panghulu alah indak talok lai manjalankan tugasnyo, dek karano kasibukan lain atu dek karano kasihatan indak mangizinkan atau dek karano bakarajo di rantau jo sabagainyo, mako inyo buliah manyerahkan jabatan itu kapado calon panggantinyo. Biasanyo calon pangganti ko adolah kamanakannyo (anak laki-laki saudara padusinyo) nan alah dewasa.

sacaro umum Batagak pangulu indak agenda rutin nan mamiliki wakatu tatantu malainkan basifaik kondisional jo fleksibel sasuai kabutuhan atau situasi masyarakaik nan dinamis sahingga upacara Batagak pangulu hanyo akan diadokan apabilo saurang panghulu adaik alah layak di ganti.

Caro Batagak Pangulu

Upacara malewakan gala atau menagakkan panghulu adolah suatu kagiatan nan dilakuan dek kaluarga jo masyarakaik nagari untuak mangukuhkan sako (gala pusako) pado suatu kaum. Managakkan sako dapek dilakuan ateh tigo hal sarupo hiduik bakarelaan (mangganti panghulu nan masih hiduik), mati batungkek budi (mangganti panghulu nan alah maningga dunia), gadang manyimpang (pangangkatan panghulu baru). Malewakan gala batujuan untuak mambaritahukan kapado masyarakaik ateh palantikan pamimpin baru suatu kaum jo panghulu tasabuik akan mamimpin nagari sacaro kolektif basamo jo panghulu lainnyo. Saurang panghulu pado hakekatnyo “tumbuah dek batanam, tinggi dek baanjuang, gadang dek baambak”. Kapamimpinan panghulu ditantukan dek masyarakaik kaumnyo, paralu mandapekan dukungan dari anggota kaluarganyo untuak manjalankan roda pamarintahan kaluarga kaum jo nagari. Biasanyo upacara pangangkatan panghulu dilakuan salamo tigo hari disertai jo patunjukan kasenian untuak manghibur tamu jo makan basamo jo caro manyambalih saikua kabau jo kapalanyo digantuangan di tampek nan labiah tinggi sabagai tando suksesnyo kagiatan ko. Sadonyo kaluarga dakek, kaluarga jauah jo karabaik sarato masyarakaik lainnyo dalam nagari turuik hadir mameriahkan tarutamo pado acara puncak sarupo mandangakan pidato adaik nan manyatokan tugas jo tangguang jawab panghulu baru tasabuik. Dalam pidato adaik panghulu nan baru diangkek tasabuik manyatokan bahwa inyo bajanji indak manyimpang dari kaedah adaik dalam manjalankan roda pamarintahannyo.