Pusek Dokumentasi jo Informasi Kabudayoan Minangkabau
Pusek Dokumentasi jo Informasi Kabudayoan Minangkabau (namo rasminyo dalam bahaso Indonesia, Pusat Dokumentasi dan Informasi Kebudayaan Minangkabau) atau biaso disingkek PDIKM adolah salah satu museum di Sumatera Barat nan talatak di Kelurahan Silaing Bawah, Kecamatan Padang Panjang Barat, Kota Padang Panjang. Museum ko barisikan baragam macam informasi jo koleksi mangenai budayo Minangkabau baiak barupo dokumentasi audio maupun visual. Museum iko dapek diakses dari jalur utamo Padang–Bukittinggi, bajarak sakitar labiah kurang duo kilometer dari pusek Kota Padang Panjang.
| Pusat Dokumentasi dan Informasi Kebudayaan Minangkabau | |
|---|---|
 PDIKM | |
| Didirian | 1990 |
| Lokasi | Kelurahan Silaing Bawah, Kecamatan Padang Panjang Barat, Kota Padang Panjang, Sumatera Barat, Indonesia |
| Jinih | Museum kabudayoan Minangkabau |
| Wikimedia Commons mampunyoi media nan bahubuangan jo Minangkabau Culture Documentation and Information Centre |
Sijarah suntiang
1988–1990: Awal pandirian suntiang
Hal utamo nan malatarbalakangi pandirian PDIKM salah satunyo adolah adaoyo asumsi baso masyarakaik Minangkabau indak mamiliki bukti-bukti sijarah tatulis nan elok, dek karano urang Minang tabiaso jo budayo tutua nan diturunkan turun tamurun; pado kanyatoannyo memang dokumentasi tantang Minangkabau labiah banyak ditamui di lua Minangkabau, misalnyo di Museum Nasional Indonesia, Jakarta atau Museum Leiden, Balando. Barangkek dari kasadaran untuak malestarikan jo mandakekan dokumen tantang budayo Minangkabau jo urang Minangkabau itu surang, Bustanil Arifin, Mantan Mantari Koperasi Republik Indonesia pado maso Orde Baru, barinisiatif untuak mandirian sabuah limbago non-profit barupo wadah untuak mahimpun babagai dokumen jo informasi tantang kabudayoan Minangkabau. Abdul Hamid, nan ampia sapanjang iduiknyo manjadi pangabdi pandidikan di Sumatera Barat, dimintakan paratiannyo untuak manjajaki didirikannyo limbago ko, dan kudian pado 8 Januari 1988 didirikanlah Yayasan Dokumentasi jo Informasi Kabudayoan Minangkabau (YDIKM).
Untuak pancapaian tujuannyo, YDIKM mandirikan sabuah wadah nan diagiah namo Pusek Dokumentasi jo Informasi Kabudayoan Minangkabau (PDIKM). PDIKM surang batujuan untuak mambarikan informasi mangenai kabudayoan Minangkabau jo mangumpuaan babagai macam literatur jo dokumentasi audio jo visual; sarupo rekaman babagai paristiwa adaik dalam bantuak film jo video, rekaman lagu-lagu tradisional, inggo mambuek duplikat alat-alat musik tradisional. Pado tangga 8 Agustus 1988 dilakukan palatakan batu partamo sabagai tando dimulainyo pambangunan PDIKM di Padang Sarai, Kelurahan Silaing Bawah. Bangunan PDIKM didirian di ateh tanah salaweh 2 Ha jo arsitektur mangikuti bantuak Rumah Gadang, dan dirasmikan pamakaiannyo pado tangga 17 Desember 1990. Sajak itu alah takumpua 3.000 labiah dokumen lamo tantang Minangkabau baiak dalam bantuak reproduksi buku, naskah, kliping koran, foto maupun mikrofilm; kabanyakan tabik sabalun taun 1945, sabagian di antaronyo masih babahaso Balando jo Arab Malayu.
1990–kini: Maso salanjuiknyo suntiang
Untuak mampamudah akses pangunjuang jo isi dokumen nan dimiliki PDIKM, alah dilakukan upayo panarjamahan naskah-naskah lamo nan sabagian babahaso Balando jo Arab Malayu. Sabagai upayo komunikasi jo ajang pangayoan informasi ditabikkan Buletin Triwulan Simandarang jo oplah 1.000 eksemplar nan didistribusikan pado perguruan tinggi, panaliti, jo intelektual dalam jo lua nagari.
Sairiang pajalanan wakatu, ateh kasepakatan Yayasan Dokumentasi jo Informasi Kabudayoan Minangkabau jo Pamarintah Kota Padang Panjang mako pangalolaan PDIKM dialiahan dari YDIKM kapado Pamarintah Kota Padang Panjang dalam hal iko Dinas Pamudo Olahraga Kabudayoan jo Pariwisata. Hal iko untuak manjamin pangalolaan nan labiah rancak, baiak dalam hal materi, manajemen, maupun sumber daya manusia pangalolanyo. Dokumen parubahan status pangelolaan iko ditandotangani pado bulan Oktober 2006 antaro Wali Kota Padang Panjang jo Anas Nafis mawakili Yayasan DIKM. Dek adonyo PDIKM diharokkan dapek marangsang minaik masyarakaik umum untuak mampalajari jo manggali lai sijarah jo nilai-nilai masyarakaik Minangkabau nan masih relevan untuak diimplementasikan.
Koleksi suntiang
- 1.900 jilid salinan buku jo majalah terbitan sabalun taun 1942.
- Sekitar 1.500 judul buku terbitan salapeh taun 1950 sumbangan masyarakaik jo satumpuak gadang kliping babagai koran jo majalah.
- 90 album foto.
- 500 foto dalam bingkai gadang jo ketek.
- 142 reel mikrofilm positif, isinyo barupo naskah-naskah lamo, koran-koran nan tabiik sabalun Parang Dunia II, jo sabagainyo; untuak mambaco mikrofilm tasabuik PDIKM alah punyo alat baco mikrofilm 35 mm positif atau negatif langkok jo alat panunjang lainnyo.
- Sakitar 600 kaset nan isinyo mulai dari nyanyian carito klasik Minangkabau sarupo saluang, rabab, jo sabagainyo sampai kapado lagu pop Minang.
- Sakumpulan replika alat musik tradisional Minangkabau.