Pulau Siberut

Pulau Siberut adolah pulau paliang laweh jo paliang utara dari Kapulauan Mentawai, talatak 150 kilometer sabalah barat Sumatera di Samudra Hindia. Pulau ko manjadi unian utamo bagi Urang Mentawai. Saparuah bagian barat pulau ko alah ditetapkan manjadi Taman Nasional Siberut pado 1993. Sabagian gadang pulau ko tatutuik dek hutan hujan, tapi digunokan untuak panabangan komersial.

Siberut

Geografi
Lokasi	Asia Tenggara
Koordinat	1°23′S 98°54′E
Kapulauan	Kapulauan Mentawai
Area	4,030 km2 (1.556 sq mi)
Nagara
Indonesia
Provinsi	Sumatera Barat
Kabupaten	Kapulauan Mentawai
Demografi
Populasi	30-35.000 (per 2001)
Kapadatan	7,5 /km2 (19,4 /sq mi)
Kalompok etnis	Suku Mentawai sarato 10% populasi sisonyo dari bagian lain Indonesia.

Pulau-pulau nan labiah ketek nan batatangga jo Pulau Siberut adolah Karamajet jo Masokut nan talatak di Selat Bungalaut di selatan pulau ko. Pulau ko tanamo dek sebaran primatanyo, di antaronyo bilou (Hylobates klossii), langur ikua kandiak (Simias concolor), langur Mentawai (Presbytis potenziani) jo baruak Pulau Pagai (Macaca pagensis).

Siberut takanai dampak tsunami jo gampo bumi Samudra Hindia 2004, tapi jumlah korban jiwa indaklah manantu. Sabuah laporan manyatokan baso pulau iko mangalami kanaikan duo meter dek gampo bumi.

Geografi

Pulau Siberut bariklim hutan hujan tropis nan basah, jo curah hujan tahunan 4.000 mm. Suhu rato-rato pado 22 inggo 31 °C, jo rato-rato kalambaban bakisar pado 81-85%. Pasisia timur mampunyoi pulau-pulau nan amaik ketek, taluak, jo tarumbu karang, sarato diliputi dek hutan bakau jo hutan nipah. Pasisia barat diliputi dek hutan barringtonia nan payah dijangkau dek karehnyo ombak lauik jo curamnyo tabiang. Kawasan padalaman babukik-bukik jo katinggian 384 meter, sarato alia aia nan mambantuak batang aia di hutan rawo jo dataran randah nan ditumbuahi tanaman sagu. Juo ado kawasan hutan primer dipterocarpaceae.

Karagaman hayati

Siberut tapisah dari daratan utamo dangkalan Sunda sajak pleistosen tangah. Katapisahan ko manjadi pamicu karagaman hayati, jo kiro-kiro 900 spesies tumbuahan vaskular jo 31 spesies mamalia. 65 persen mamalia jo 15 persen binatang lain basifaik endemik pado babarapo tingkek taksonomi, mambuek Siberut unik. Dari 134 spesies buruang nan tasuo di Siberut, 19-nyo adolah endemik pado babarapo tingkek taksonomi.

Lingkuangan

Saurang dukun ubek (sikerei) dari Siberut, Kapulauan Mentawai.

Siberut diakui sabagai cadangan biosfer pado 1981. Pado 1993, bagian barat pulau ko ditetapkan sabagai Taman Nasional, salaweh 1.905 km². Kiro-kiro 70% hutan di lua cagar alam digunokan untuak konsesi panabangan, babarapo masih baroperasi, dan sabagian lainnyo ditangguahan.

Pado 2001, UNESCO mambaok fase baru pado Program Siberut nan lah diluncuakannyo jo panakanan pado palinduangan ekosistem malalui pangambangan lokal. Fase iko malibaikan tabantuaknyo kamitraan pakumpulan lokal, kalompok palinduangan, jo pamarintah daerah.

Budaya

Babarapo antropolog picayo baso babarapo ribu taun lalu, Suku Batak di Sumatera Utara adolah urang nan partamo mauni pulau ko. Tapi, kini ado pabedaan dalam hal budayo jo bahaso di antaro panduduaknyo. Antropolog asa Swiss, Reimar Schefold mangabihan wakatu batahun-tahun di antaro salah satu kalompok Siberut, yakni Sakuddei.

Di barat pulau ko, ado tradisi rumah panjang komunal nan disabuik uma.

Bacoan lanjuik

• Halaman 437 dari - Indonesia, Edisi ka-8. Lonely Planet Publications Pty Ltd, Footscray, Victoria ISBN 978-1-74164-435-5