Tsunami (baso Jepang: 津波, arati harfiah "galombang palabuhan";[1] pangucapan: /sˈnɑːmi/ atau /tsˈnɑːmi/ [2]) adolah sarangkaian galombang aia nan disabaukan dek bapindahnyo aia dalam volume nan gadang bana, nan biasonyo tajadi pado lauik atau danau gadang. Gampo, latusan gunuang barapi, macam-macam ledakan bawah aia (tamasuak ledakan parangkek nuklir bawah lauik), tanah runtuah, gletser pacah, balantak meteor, jo lain-lain gangguan di ateh atau di bawah aia samonyo punyo potensi maasiaan tsunami.[3]

Poto diambiak di Ao Nang, Provinsi Krabi, Thailand, kutiko gampo dan tsunami Samudra Hindia 2004 di Thailand.
Gampo dan tsunami Tōhoku 2011. Pandangan udaro karusakan wilayah Sendai mampacaliakan asok itam kalua dari kilang minyak miliak Nippon Oil Sendai.

Galombang tsunami ko indak sarupo jo galombang lauik nan normal, karano panjang galombangnyo jauah labiah gadang. Tsunami indak nampak saroman galombang nan tapacah-pacah, malainan mulonyo mungkin sarupo jo pasang naiak nan sabana capek, dek karano alasan ko acok juo disabuik sabagai galombang pasang. Tsunami umumnyo tadiri ateh sarangkaian galombang nan periode kadatangannyo antaro babarapo minik inggo jam, tibonyo bauruik-uruik bak "kareta galombang".[4] Galombang nan tingginyo bapuluah meter dapek timbua dek karano bancano alam gadang. Sungguahpun dampak tsunami tabateh ka wilayah pasisia, tanago parusaknyo dapek jadi lua biaso dan dapek mampangaruahi tapian samudra kasadonyo. Tsunami Samudra Hindia 2004 marupoan salah satu bancano alam paliang mamatian dek sijarah umaik manusia, nan manalan labiah dari 230.000 korban maningga di 14 nagara nan di sakuliliang Samudra Hindia.

Ahli sijarah Yunani Kuno Thucydides mampakiroan dalam karyanyo Sijarah Parang Peloponnesia nan ditulih pado akia abaik ka-5 SM, bahaso tsunami ko ado kaitannyo jo gampo bawah lauik,[5][6] tapi pamahaman tantang apo tsunami tu tatap kabua inggo masuak abaik ka-20 walaupun masih banyak pulo nan indak dikataui. Bidang-bidang utamo panalitian kini ko di antaronyo iolah mancubo mangataui baa babarapo gampo gadang indak maasiaan tsunami samantaro nan labiah ketek manyabaukannyo; sarato usao untuak sacaro tapek mampakiroan jalua malintehnyo tsunami di lautan; dan caro mampakiroan baa galombang tsunami ka bapangaruah pado bantuak garih pantai tatantu.

Rujuakan suntiang

  1. "Tsunami Terminology". NOAA. Diarsipkan dari versi asli tanggal 2011-02-25. Diakses tanggal 2010-07-15. 
  2. Wells, John C. (1990). Longman pronunciation dictionary. Harlow, England: Longman. p. 736. ISBN 0-582-05383-8.  Entry: "tsunami"
  3. Barbara Ferreira (April 17, 2011). "When icebergs capsize, tsunamis may ensue". Nature. Diarsipkan dari versi asli tanggal 2011-11-04. Diakses tanggal 2011-04-27. 
  4. Fradin, Judith Bloom and Dennis Brindell (2008). Witness to Disaster: Tsunamis. Witness to Disaster. Washington, D.C.: National Geographic Society. pp. 42, 43. http://shop.nationalgeographic.com/ngs/product/books/kids-books-and-atlases/animals-and-nature/witness-to-disaster%3A-tsunamis. 
  5. Thucydides: “A History of the Peloponnesian War”, 3.89.1–4
  6. Smid, T. C. (April , 1970). 'Tsunamis' in Greek Literature. 17 (edisi ke-2nd). pp. 100–104.