Politik Minangkabau

Politik Minangkabau adolah suatu sistem politik nan balandaskan filosofi demokrasi, egalitarian, sarato kaadilan sosial. Sistem politik tu alah balaku dalam papolitikan masyarakaik Minangkabau sajak baabaik-abaik nan lalu, nan dianggap dek babagai kalangan sabagai sabuah sistem nan modern sarato mandului zamannyo.

Istano Pagaruyuang, simbol politik tatinggi karajaan Minangkabau.

Filosofi

Filosofi politik urang Minang baraka dari kabudayaan Minangkabau nan alah dikambangan dek duo urang tokoh legendaris, yakni Datuk Katumangguangan jo Datuk Parpatih Nan Sabatang. Datuak Katumanggungan manyusun sistem adaik Koto Piliang nan mamiliki filosofi bajanjang naiak batanggo turun. Dalam nagari-nagari nan manganuik sistem politik iko dikenal adonya kadudukan pangulu nan batingkek-tingkek. Dari pangulu andiko, pangulu suku, sampai pangulu pucuk. Pangulu pucuak juo disabuik sabagai pucuk nagari nan tertuang dalam filosofi adaik bapucuak bulek, baurek tunggang. Dalam sistem iko, gala pusako (pangulu) indak bisa digantian, sabalun panyandang gala maningga.

Tokoh legendaris lainnyo Datuk Perpatih Nan Sebatang, manyusun sistem adat Bodi Caniago jo filosofinyo mambasuik dari bawah. Sistem iko marupoan anti-tesis dari konsep Koto Piliang nan hierarkis. Konsep Bodi Caniago labiah mangamukokan konsep bardasarkan musyawarah mufakat. Dalam nagari-nagari nan manerapkan sistem Bodi Caniago, kadudukan sado pangulu mamiliki darajat nan samo. Filosofinyo duduak sahamparan tagak sapamatang, duduak samo randah tagak samo tinggi.

Dek adonyo partentangan dari duo sistem adat jo politik di Minangkabau itu, mako timbulah suatu sintesis politik nan maambiak corak kaduo-duonya itu sahinggo dalam parkambangannyo, politik Minangkabau bisa manerapkan sistem Koto Piliang nan hierarkis basarato sistem Bodi Caniago nan egaliter. Kategangan di antaro dua kubu sistem politik itu marupoan salah satu dikotomi nan manjago kasaimbangan di masyarakaik.

Untuak konsep kapamimpinan politik, masyarakaik Minangkabau indak mamposisian pamimpinnyo sabagai urang nan dikultuskan sahinggo katiko pamimpin itu indak amanah atas jabatannyo inyo bisa disanggah ataupun diganti malalui dewan adat. Hal iko bardasarkan kapado filosofi Minangkabau nan manempekan pamimpin itu ditinggikan sarantiang didahulukan salangkah. Dengan filosofi kapemimpinan politik takah itu, Minangkabau kudian banyak malahiaan pamimpin sajati nan randah hati dan panuah pangabdian dek inyo mamahami bahaso inyo hanyo ditinggian sarantiang sarato didahuluan salangkah dek masyarakaiknyo. Atau juo bardasaran kapado filosofi rajo adia rajo disambah, rajo zalim rajo disanggah. Adonya dewan adaik nan terdiri dari para pangulu jo niniak mamak di sadoalah nagari, manciptakan sistem check and balances dalam politik Minangkabau.

Sajak masuaknyo Islam ka Sumatera, sistem politik Minangkabau dipakuek dek tigo unsur (triumvirat) nan disabuik Tigo Tungku Sajarangan. Triumvirat iko terdiri dari tigo unsur masyarakaik nan mancakup kaum adat, kaum cadiak pandai, jo kaum ulama.

• Kaum Adat diwakili dek babarapo urang pangulu dari suku/klan nan ado dalam sistem adat Minangkabau, takah suku Koto jo Piliang, Bodi jo Caniago sarato babagai suku pacahan baru lainnyo. Satiok suku/klan diwakili dek babarapo urang datuak nan marupoan kapalo kaum atau kaluarga gadang.
• Kaum Ulama diwakili dek urang-urang nan manguasoi ilmu agamo Islam, tapi indak mamacik posisi dalam struktur adaik.
• Kaum Cadiak Pandai diwakili dek urang-urang nan dianggap punyo pangetahuan nan laweh, santiang jo pandai, tapi juo indak mamacik posisi dalam struktur adaik.

Katigo unsur iko saling bainteraksi, badialektika, bahkan juo bakonflik dalam suatu sistem politik nan diwadahi dek suatu limbago Karapatan Adat Nagari. Di dalam limbago ikolah dimusyawarahan sagalo sasuatu parmasalahan nan ado dalam suatu nagari sahinggo dapek diputihan solusi nan disepakati dek sado pihak demi kaadilan jo kasajahteraan masyarakaik itu surang. Keputusan limbaga iko basipaik otonom tanpa musti mamintak parsatujuan dari otoritas politik nan labih tinggi takah rajo atau gubernur.

Pra-kamardekaan Indonesia

Jauah sabalun kadatangan kolonialis Balando, sistem sosial jo politik dalam masyarakaik Minangkabau alah dijalanan jo prinsip-prinsip politik nan demokratis, egaliter sarato bakaadilan sosial. Hal iko nampak dari balakunyo sistem Nagari nan otonom, dima suatu kalompok masyarakaik nan bahimpun dalam suatu nagari (satingkek kalurahan/desa) dikalola sacaro basamo dek suatu triumvirat nan disabuik Tigo Tungku Sajarangan dalam sabuah limbago (lembaga) nan disabuik Kerapatan Adat Nagari.

Tigo Tungku Sajarangan tadiri dari tigo unsua masyarakaik nan mancakup kaum adaik, kaum ulama sarato kaum cadiak pandai.

• Kaum Adaik diwakili dek babarapo urang panghulu dari suku/klan nan ado dalam sistem adaik Minangkabau, sarupo suku Koto jo Piliang, Bodi jo Caniago sarato babagai suku pacahan baru lainnyo. Satiok suku/klan diwakili dek babarapo urang datuak nan adolah kapalo kaum atau kaluarga gadang.
• Kaum Ulama diwakili dek urang-urang nan manguasoi ilimu agamo tapi indak mamagang posisi dalam struktur adaik.
• Kaum Cadiak Pandai diwakili dek urang-urang nan dianggap punyo pangatahuan nan banyak, cadiak sarato pandai tapi indak pulo mamagang posisi dalam struktur adaik.

Katigo unsua ko saliang bainteraksi, badialektika bahkan konflik pulo kadang-kadang, dalam suatu sistem politik nan diwadahi dek suatu limbago Karapatan Adat Nagari. Di dalam limbago ikolah dipadebatkan jo dimusyawarahkan sagalo sasuatu pamasalahan nan ado dalam suatu nagari sahinggo dapek ditamuan solusi nan disapakati dek sadonyo pihak demi kaadilan sarato kasejahteraan masyarakaik itu sendiri. Kaputusan limbago ko bersifaik otonom tanpa harus mamintak pasetujuan dari otoritas politik nan labiah tinggi sarupo raja, misalnyo.

Pasca-kamardekaan Indonesia

Tan Malaka, Mohammad Hatta, sarato Sutan Sjahrir; tigo urang tokoh politik pantiang Indonesia dari Minangkabau.

Sistem politik Minangkabau nan demokratis sarato egaliter adolah antitesis bagi sistem politik gadang lainnyo di Indonesia nan diusuang dek budayo Jawa nan cenderung sentralistik, patron klien sarato feodalistik. Dalam sajarah sajak Indonesia mardeka, kaduo sistem politik ko saliang bainteraksi, basaing sarato badialektika dalam papolitikan Indonesia dalam rangka pangalolaan nagaro demi pancapaian tujuan banegara, iyolah masyarakaik adia sarato makmur.

Pado awal-awal kamardekaan, sistem politik Minangkabau nan tamanifestasi dalam lakon politik dari tokoh-tokoh politik nan barasa dari Minangkabau, samisal Hatta, Syahrir, Natsir, Agus Salim sarato nan lain-lain, mandapek-an tampek nan labiah laluaso jo balakunyo sistem parlementer nan diwarnai jo baragam partai politik. Untuak sabuah nagaro nan masih mudo, tanyato sistem ko acok menimbuaan kagaduahan politik, sahinggo baakibaik pado jatuah bangunnyo pamarentahan sarato acoknyo pagantian kabinet.

Sistem ko balaku sampai kaluanyo Dekrit Presiden pado taun 1959. Sistem politik demokratis nan baumua 14 taun tu kudian baganti jo sistem politik sentralistik sarato feodalistik nan dijalanan dek Presiden Soekarno jo kakuasaan nan ampia indak babateh sampai taun 1965, dima akhianyo kakuasaan diambiak aliah dek Soeharto. Salamo sakitar 32 taun salanjuiknyo, Presiden Soeharto-pun manjalanan sistem nan hampia samo jo pandahulunyo. Barulah pado taun 1998, karano adonyo reformasi, papolitikan Indonesia baliak ka sistem demokrasi, walaupun masih basifat prosedural atau alun substansial.

Rujuak-an

• Graves, Elizabeth E. (2007). Asal-usul Elite Minangkabau Modern: Respons Terhadap Kolonial Belanda Abad XIX/XX. Jakarta: Yayasan Obor Indonesia.
• Adat Minangkabau & Merantau Tsuyoshi Kato. Diakses 30 Juni 2013.

Pautan lua

• Nilai Egalitarian Dan Demokratis Masyarakat Minangkabau Archived 2013-03-02 di Wayback Machine. Berdikari Online, 26 Juli 2010. Diakses 30 Juni 2013.
• Kun Fayakun, Jadilah Indonesia Archived 2013-06-05 di Wayback Machine. Lentera Timur, 12 Juli 2011. Diakses 30 Juni 2013.
• Berpikir Minang untuk Indonesia Archived 2014-10-14 di Wayback Machine. Kompasiana. Diakses 30 Juni 2013.