Paristiwa Situjuah
Paristiwa Situjuah adolah suatu paristiwa panyarangan dek pasukan panjajah Balando kapado para pajuang kamardekaan Indonesia di maso Pamarentahan Darurat Republik Indonesia (PDRI) nan manewaskan babarapo urang pimpinan pajuang sarato puluahan urang anggota pasukan lainnyo.
PDRI suntiang
PDRI (Pamarentahan Darurat Republik Indonesia) adolah suatu pamarentahan darurat nan dibantuak pado tanggal 22 Desember 1948 dek babarapo urang pimpinan pajuang kamardekaan Indonesia nan dipimpin dek Sjafruddin Prawiranegara. Pamareintahan tu dibantuak kareno ditangkok sarato diasiangan-nyo babarapo urang pamimpin Republik Indonesia iyolah Presiden Soekarno, Wakil Presiden Mohammad Hatta jo Mantari Lua Nagari Agus Salim sarato Sjahrir jo nan lainnyo dek pihak Balando katiko tajadinyo Agresi Militer Balando II pado tanggal 19 Desember 1948.
Ibukota PDRI adolah Bukittinggi, namun pajuangannyo labiah banyak tajadi di desa-desa jo di hutan-hutan Sumatera Tangah sahinggo disabuik "Pamarentahan Dalam Rimbo Indonesia" (PDRI) dek pihak Balando. Sadangkan lokasinyo disabuik "Somewhere in the Jungle".
Patriot Bangso suntiang
Dalam salah satu mato rantai pajuangan PDRI itulah tajadi suatu paristiwa pado tanggal 15 Januari 1949, dima puluahan urang pajuang nan tadiri dari babarapo pimpinan jo puluahan anggota pasukan Barisan Pangawal Nagari jo Kota (BPNK) tewas sakatiko dibarondong tembakan dek pihak panjajah Balando. Paristiwa tu tajadi di Lurah Kincia, Situjuah Batua,Kecamatan Situjuah Limo Nagari, Kabupaten Limo Puluah Kota, Sumatera Barat.
Malam sebalunnyo pado 14 Januari 1949 para pajuang tu maadoan rapek untuak mambahas strategi dalam maadok-i agresi nan dilakuan dek Balando nan disabuik sabagai Agresi Militer Balando II. Rapek tu ateh instruksi Gubernur Militer Sumatera Tangah Sutan Mohammad Rasjid nan dipimpin dek Chatib Sulaiman sabagai Katua Markas Patahanan Rakyat Daerah. Salain tu rapek diikuik-i dek babarapo urang pimpinan pajuang lainnyo, diantaranyo Arisun Sutan Alamsyah (Bupati Militer Limo Puluah Kota), Letnan Kolonel Munir Latief, Mayor Zainuddin, Kapten Tantawi, Lettu Azinar, Letda Syamsul Bahri sarato 69 urang pasukan Barisan Pangawal Nagari jo Kota (BPNK).
Hasil rapek mamutuihan baso mareka akan manyarang kota Payokumbuh nan diduduak-i Balando, lalu akan manduduak-i kota tu sambia manggaloraan sumangaik palawanan gerilya rakyaik untuak mambuktian pado dunia internasional baso Pamarentahan Republik Indonesia masih ado sarato didukuang rakyaik nan taruih malakuan palawanan sarato pajuangan. Kasadonyo tu dilakuan untuak malawan propaganda Balando nan salalu mengatoan baso mareka alah manguasoi Indonesia sapanuahnyo sasudah mareka bahasil manduduak-i ibu kota Republik Indonesia, Yogyakarta, sarato manangkok jo maasiangan para pamimpin Republik.
Subuah hari sasudah baistirahat sausai rapek, katiko nak malaksanaan shalat subuah tibo-tibo mareka disarang dek pihak Balando. Para pimpinan pajuang nan ikuik mahadiri rapek tu sarato puluahan pajuang lainnyo-pun gugur sakatiko.
Paristiwa nan tajadi di Lurah Kincia, Situjuah Batua, Kecamatan Situjuah Limo Nagari, Kabupaten Limo Puluah Kota, Sumatera Barat itu dikana sabagai Paristiwa Situjuah.