Munir Latief

Letnan Kolonel Munir Latief adolah surang tantara sarato pajuang kamardekaan Indonesia. Baliau tamasuak salah surang tokoh pajuang nan tewas basamo puluahan pajuang lainnyo dalam Paristiwa Situjuah nan tajadi pado tanggal 15 Januari 1949 di Situjuah Batua, Limo Puluah Kota, Sumatera Barat. Paristiwa Situjuah adolah salah satu mato rantai dari pajuangan mampatahankan kamardekaan nan dilakuan dek Pamarentahan Darurat Republik Indonesia (PDRI) di bawah pimpinan Syafruddin Prawiranegara nan balangsuang dari tanggal 22 Desember 1948 sampai 13 Juli 1949.

Munir Latief
Kabangsaan	Indonesia
Karojo	Tantara
Dikana dek	Pajuang kamardekaan Indonesia (PDRI)

Pandidikan jo Karier

Munir Latief pernah basakola di Sakola Adaik sarato MULO Padang, salanjuiknyo baliau ka Jakarta untuak malanjuik-an pandidikan ka HBS, namun indak salasai karano Japang talanjua manduduak-i Indonesia. Baliau-pun baliak ka Padang lalu masuak pandidikan calon parwira nan diadoan dek Japang, Gyu Gun angkatan partamo. Dalam pandidikan tantara tu Munir Latief satu angkatan jo Dahlan Djambek, Ahmad Husein, Ismail Lengah, Dahlan Ibrahim sarato nan lainnyo. Salasai dari pandidikan tu baliau mandapek-an pangkek Letnan Duo.

Sasudah Japang kalah dalam Parang Dunia II, para parwira didikan Japang tu mambangun kakuatan sarato mandirian Barisan Kaamanan Rakyat (BKR) nan taseba di Sumatera Tangah. Dikudian hari BKR barubah namo manjadi Tantara Kaamanan Rakyat (TKR).

Pado taun 1946 di Bukittinggi didirian Sakola Pandidikan Opsir. Mayor Munir Latif diangkek sabagai Direktur Pandidikan Opsir manggantian pajabat sabalunnyo iyolah Kolonel Ismail Lengah. Di bawah pimpinan Munir dilaksanaan pandidikan angkatan kaduo nan diikuik-i 60 urang calon kadet. Pado taun 1947 Mayor Munir Latif dipindahan sarato diangkek manjadi Kumandan Batalyon III/Resimen II di Sungai Panuah. Salanjuiknyo baliau dimutasi ka Bukittinggi baliak lalu mamimpin Pandidikan Divisi IX.

Gugua

Pado tanggal 14 Januari 1949 di Lurah Kincia, Situjuah Batua,Kecamatan Situjuah Limo Nagari, Kabupaten Limo Puluah Kota, Sumatera Barat, Munir Latief maikuik-i rapek nan dipimpin dek Chatib Sulaiman sabagai Katua Markas Patahanan Rakyat Daerah. Rapek tu sabagai bagian dari pajuangan PDRI mambahas strategi pajuangan dalam maadok-i Agresi Militer Balando II.

Dalam suasana baistirahat sausai rapek, pado tanggal 15 Januari 1949 pado subuah harinyo katiko ka malaksanaan shalat subuah, tibo-tibo pasukan Balando datang manyarang sarato mambarondong para pajuang tu. Letnan Kolonel Munir Latief jo babarapo pimpinan pajuang lainnyo besarato jo puluahan anggota pasukan Barisan Pangawal Nagari jo Kota (BPNK) tewas sakatiko.