Imam (/ɪˈmɑːm/; bahaso Arab: إمام‎ imām; jamak: أئمة aʼimmah) adolah istilah sabuah posisi pamimpin dalam Islam. Istilah ko biasonyo dipakai sabagai gala bagi pamimpin ibadah (salat) di musajik maupun dalam pimpinan komunitas Muslim tarutamo Islam Sunni. Pado konteks ko, imam dapek mamimpin palayanan dalam kagiatan ibadah dalam Islam, malayani sabagai pamimpin komunitas, jo maagiah nasihaik agamo.

Samantaro bagi Islam Syiah, imam punyo paran jo makna nan labiah tapusek tarutamo dalam konsep imamahnyo. Istilah ko baginyo, hanyo buliah dipakai bagi para ahlul bait (kaluarga nabi Muhammad).^[1]

Sunni

Posisi imam dalam Sunni babeda jo nan dipakai dek Syiah, pabedaan utamo nan acok diabaikan dek urang di lua Islam. Pado istilah sahari-hari, imam dalam Islam Sunni bararti surang nan mamimpin salat wajib, bahkan di lokasi lua musajik. Khutbah jumaik biasonyo diagiah dek imam nan lah ditunjuak (marangkap katik). Sadoalah musajik punyo ciek imam untuak mamimpin salat bajamaah, walau kadang-kadang ditunjuak dari salah saurang dari jamaah sajo bukan urang nan lah batunjuak jo bagaji.

Posisi imam padusi masih kontroversi dalam Islam. Urang nan buliah ditunjuak manjadi imam, manuruik hadis, adolah urang nan lah punyo banyak pangatahuan tantang Quran jo Sunnah (hadis) sarato elok lakunyo.

Istilah Imam dipakai pulo untuak ilmuwan Islam atau alim ulama, biasonyo untuak ulama mazhab dalam ilmu fiqih. Buliah juo dipakai marujuak alim ulama dalam bidang hadis atau akidah.

Barikuik tabel alim ulama nan dianggap sabagi imam:

Fiqih	Aqidah	Ilmu Hadis
Imam Abu Hanifa	Imam Ahmad ibn Hanbal (Atsari)	Imam Bukhari
Imam Malik	Imam al-Asy'ari (Asy'ari)	Imam Abu Dawud
Imam Shafi'i	Imam Abu Mansur al-Maturidi (Maturidi)	Imam Muslim
Imam Ahmad ibn Hanbal	Wasil ibn Ata (Mu'tazilah)	Imam Ahmad ibn Hanbal

Tokoh figur sentral dalam gerakan Islam disabuik juo Imam sarupo Imam Nabhawi di Suriah jo Ahmad Raza Khan di India jo Pakistan.

Posisi imam di Turki

Imam ditunjuak dek nagara untuak dipakarajokan di musajik-musajik. Inyo marupokan lulusan dari sakolah tinggi imam-khatib ataupun sarjana agamo. Hal ko diatua dek Dewan Urusan Agamo^[2] Turki jo hanyo laki-laki nan buliah ditunjuak dalam posisi ko, sadangkan padusi dbuliah ditunjuak sabagai pandakwah atau guru Quran sajo. Mazhab nan dipakai dalam urusan ko iyolah mazhab Hanafi.

Syiah

Artikel utamo untuak bagian ko adolah: Imamah

Istilah Imam nan bakaitan jo kapemimpinan umaik partamo kali disandang dek Imam Ali, manuruik kayakinan Syi'ah. Ali adolah anak dari Abu Thalib, paktuonyo Rasulullah Muhammad SAW. Salanjuiknyo, imamah dipacik dek katurunannyo Ali co di bawah ko. Golongan nan mangimani 12 imam ko disabuik Syi'ah Itsna 'Asyariyah (Syiah Duo Baleh Imam)