Ibu kota

Ibu kota adolah kota utamo di sabuah nagara atau daerah, buliah jadi kota iko alun tantu nan paliang gadang. Di kota iko biasonyo tadapek kantua-kantua pamarintahan pusek atau daerah jo sabuah dewan pawakilan rakyaik nan acok disabuik parlemen sarato kantua-kantua pusek parusahoan-parusahoan komersial. Salain itu di ibu kota nagara biasonyo tadapek pulo pawakilan-pawakilan dari nagara asiang nan biaso disabuik kedutaan besar.

Ado babarapo pangacualian:

• Di Balando ibu kota manuruik undang-undang adolah Amsterdam, tapi kota pamarintahan adolah Den Haag. Di kota taakhia iko pulo tadapek pawakilan-pawakilan dari nagara asiang.
• Ibu kota Israel adolah Yerusalem. Tapi bahubuang kota iko dek dunia internasional dianggok sabagai sabuah kota Internasional, mako Kedutaan Besar nagara-nagara nan bahubuangan diplomatik jo Israel manaruah Kedutaan Besar mareka di kota Tel Aviv, kacuali babarapo nagara sajo.
• Ibu kota Afrika Selatan adolah Pretoria tampek kaduduakan presiden. Tapi parlemen talatak di Cape Town/Kaapstad jo mahkamah aguang di Bloemfontein.
• Ibu kota Republik China di Taiwan nan rasmi adolah Nanjing, namun dek kalah dalam parang sudaro sahinggo Chiang Kai-shek mamindahkan pamarintahan ka ibu kota samantaro di Taipei, Taiwan.
• Ibu kota rasmi Malaysia adolah Kuala Lumpur. Di kota iko pulo parlemen, nan dipertuan Agong jo pawakilan-pawakilan nagara asiang barado. Tapi kantua perdana menteri bakaduduakan di Putrajaya.

Kadang-kadang babarapo nagara mamindah ibu kota mareka dek alasan politik atau ekonomis. Babarapo nagara nan pernah mamindahkan ibu kota mareka adolah:

• Amerika Serikat, dari New York ka Philadelphia lalu ka Washington, DC
• Brasil dari Rio de Janeiro ka Brasilia
• Kazakhstan dari Almaty/Alma Ata ka Astana
• Turki dari Istanbul/Konstantinopel ka Ankara

Acokkali ibu kota harus dipindahkan karano diduduaki atau dikuasoi nagara asiang.

• Lithuania antaro taun 1918-1940 baibu kotakan Kaunas karano ibu kota Vilnius dikuasoi Polandia

Dalam maso perang acokkali ibu kota diduduaki musuah jo harus mandirikan ibu kota "tandingan" atau samantaro di kota lain:

• Republik Indonesia babarapo kali ibu kotanyo bapindah antaro taun 1945-1950. Dari Jakarta ka Yogyakarta lalu ka Bukittinggi sabalun baliak ka Jakarta
• Perancis "Bebas" antaro taun 1940-1944 jo ibu kota Vichy

Kadang-kadang ibu kota nagara harus dibagi jo nagara lain karano dikuasoi musuah:

• Siprus jo ibu kota Nikosia nan harus dibagi jo Republik Turki Siprus Utara sajak taun 1974
• Kota Berlin nan tabagi antaro Republik Federal Jerman jo Republik Demokratis Jerman antaro taun 1949 - 1990.