Candi Muaro Takuih
Candi Muaro Takuih adolah kompleks candi Buddha nan talatak di Desa Muaro Takuih, Kecamatan XIII Koto, Kabupaten Kampar, Riau, Indonesia. Kompleks candi iko bajarak kurang labiah 135 kilometer dari Kota Pakanbaru.
| Komplek Percandian Muara Takus | |
|---|---|
| Namo sasuai jo Sistem Registrasi Nasional Cagar Budaya | |
 Candi Muaro Takuih | |
 Cagar budaya Indonesia | |
| Kategori | Kawasan |
| No. registrasi nasional | RNCB.20030304.05.000453 |
| Lokasi | XIII Koto, Kabupaten Kampar, Riau |
| Taun panatapan | 2003 |
| Pamiliak |  Indonesia |
| Pangalola | Balai Pelestarian Cagar Budaya Sumatera Barat |
  Candi Muaro Takuih Lokasi candi Muaro Takuih di Kabupaten Kampar, Riau | |
Situs Candi Muaro Takuih dikaliliangi dek tembok baukuran 74 x 74 meter, nan tabuek dari batu putiah jo tinggi tembok ± 80 cm, di lua arealnyo adopulo tembok tanah baukuran 1,5 x 1,5 kilometer nan mangaliliangi kompleks situs ko sampai ka tapian Batang Kampar Kanan. Di dalamnyo ado ampek bangunan candi nan banamo Candi Sulung/Tuo, Candi Bungsu, Candi Mahligai, jo Candi Palangka.[1]
Ahli-ahli purbakala alun dapek manantukan sacaro tapek maso situs candi iko didirikan. Ado nan manyabuik abaik ka-4, ado pulo nan manyabuik abaik ka-7, abaik ka-9, bahkan abaik ka-11. Namun candi iko dianggap alah ado pado zaman kaamehan Sriwijaya, sainggo babarapo sijarawan maanggap kawasan ko sabagai salah satu pusek pamarintahan dari karajaan Sriwijaya.[2][3]
Pado taun 2009 Candi Muaro Takuih dicalonkan untuak manjadi salah satu Situs Warisan Dunia UNESCO.[4]
Sijarah
suntiang
Candi Muaro Takuih adolah situs candi nan dibangun dek Karajaan Sriwijaya pado abaik kasabaleh. Arsitektur jo desain candi manunjuakan corak Buddha Mahayana. Manuruik Schnitger, sabagian gadang bangunan candi alah maalami renovasi pado abaik kaduobaleh. Hal iko dianggap manunjuakan baso kompleks candi ko dipagunokan sabagai tampek ibadaik sarato pusek niago dek Sriwijaya.[5]
Situs candi ko alah lamo ditinggakan salamo barabaik-abaik sabalun ditamukan dek Cornet De Groot pado 1860.[1] Situs ko kudian dijalajahi sarato ditaliti dek W.P Groenveld pado 1880 sarato panggalian ulang dilakukan sacaro batahap. Pado 1983 dilakukan panalitian baliak ka situs arkeologi Muaro Takuih dan didapek hasia pametaan siso-siso parik lamo, kompleks Candi Mahligai, sarato bangunan saisuak lainnyo.[4] Kini situs ko dilinduangi sabagai Cagar Budaya Indonesia.[1][6]
Deskripsi situs
suntiangCandi Muaro Takuih adolah situs candi paliang tuo di Sumatera, nan juo satu-satunyo situs paninggalan sijarah nan babantuak candi di Riau. Candi nan bacorak Buddhis iko marupokan bukti baso agamo Buddha panah bakambang di kawasan iko.[1]
Kompleks candi iko tabuek dari batu kasiak, batu sungai, jo batu bata. Babeda jo candi nan ado di Jao, nan tabuek dati batu andesit nan diambiak dari pagunuangan. Bahan pambuek Candi Muaro Takuih, khususnyo tanah liek, diambiak dari sabuah kampuang nan banamo Pongkai, lataknyo kurang labiah 6 km di sabalah ilia situs Candi Muaro Takuih. Namo Pongkai kamungkinan barasa dari bahaso Cino, Pong aratinyo lubang jo Kai aratinyo tanah, sainggo dapek diaratian lubang tanah, dek sabab panggalian tanah untuak pambangunan candi. Bakeh lubang galian tu kini alah tabanam jo aia banduang PLTA Koto Panjang.[1][6]
Kompleks Candi Muaro Takuih bapaga jo dindiang batu satinggi satu meter jo ukuran 74 x 74 meter. Di dalamnyo ado ampek candi Buddha. Di antaro ampek candi, ado Candi Mahligai nan tampak babeda. Candi ko marupokan stupa Buddha babantuak taratai nan tampak babeda dibandiang candi lainnyo di Indonesia, dan labiah saroman jo candi-candi lamo di Thailand jo Myanmar. Stupa tagak di ateh aleh babantuak oktagonal dan tingginyo mancapai 14,3 meter. Di puncak stupa bahiasi jo sosok singo nan ampia indak tampak dari bawah.[1]
Pado sisi timur Candi Mahligai ado Candi Palangka. Candi ko tabuek dari batu bata dan kini tingginyo hanyo mancapai 1,45 meter. Dilaporkan baso saisuak bangunannyo labiah tinggi jo bagian atehnyo nan alah lamo runtuah. Bangunan katigo di dalam kompleks ko adolah Candi Bungsu. Hal nan paliang tampak dari candi iko adolah dibangun dari duo jinih batu nan sangek babeda. Ciek bagian tabuek dari batu bata dan bagian lainnyo dari batu kasiak. Candi ko kini mancapai katinggian 6,2 meter. Bangunan paliang gadang adolah Candi Tuo. Alehnyo baukuran 32,8 meter x 21,8 meter jo tinggi mancapai 8,5 meter. Candi iko batingkek-tingkek jo desainnyo saroman jo stupa Candi Borobudur. Cando sadoalah candi di kompleks ko, dekorasi Candi Tuo juo saketek. Dekorasi candi nan paliang tampak adolah sosok singo nan duduak di tareh ateh. Salain bangunan tasabuik, ado pulo gundukan nan dipakirokan sabagai tampek mambaka tulang manusia. Samantaro di lua situs ko ado pulo bangunan-bangunan bakeh nan tabuek dari batu bata nan alun dapek dipastikan jinih bangunannyo.[1][6]
Candi Mahligai
suntiangCandi Mahligai atau Stupa Mahligai, marupokan bangunan candi nan dianggap paliang utuah. Bangunan ko tabagi ateh tigo bagian, yaitu kaki, badan, jo atok. Stupa ko mampunyoi aleh babantuak persegi panjang jo ukuran 9,44 m x 10,6 m, sarato mampunyoi 28 sisi nan mangaliliangi aleh candi sarato pintu masuak barado di sabalah selatan. Pado bagian aleh tasabuik ado ornamen taratai kamba jo di bagian tangahnyo tagak bangunan minaro silindrik jo 36 sisi babantuak kalopak bungo pado bagian alehnyo. Bagian ateh dari bangunan ko babantuak lingkaran. Manuruik Snitger, daulu pado kaampek suduik fondasi ado 4 patuang singo dalam posisi duduak nan tabuek dari batu andesit. Salain itu, manuruik panalitian nan dilakukan dek Yzerman, daulu bagian puncak minaro ado batu jo lukisan daun oval jo ukiran-ukiran di sakaliliangnyo. Bangunan ko diduga maalami duo tahap pambangunan. Hal iko didasarkan pado kanyataan baso di dalam kaki bangunan nan kini ado profil kaki bangunan lamo sabalun bangunan dipagadang.[1][6]
Candi Tuo
suntiangCandi Tuo atau Suluang marupokan candi induak di dalam Kompleks Candi Muaro Takuih. Bangunan ko tabagi manjadi tigo bagian, yaitu kaki, badan, jo atok. Bagian kaki tabagi duo. Ukuran kaki partamo tingginyo 2,37 m, sadangkan nan kaduo mampunyoi katinggian 1,98 m. Tanggo masuak ado di sisi barat jo sisi timur nan dihiasi jo patuang singo. Leba masiang-masiang tanggo 3,08 m jo 4 m. Dicaliak dati siso bangunan bagian aleh, mampunyoi bantuak malingka jo garih tangah ± 7 m jo tinggi 2,5 m. Ukuran fondasi bangunan candi iko adolah 31,65 m x 20,20 m. Fondasi candi iko mampunyoi 36 sisi nan mangaliliangi bagian aleh. Bagian ateh dari bangunan ko adolah bundaran. Indak ado ruang kosong samo sakali di bagian dalam Candi Suluang. Bangunan tabuek dari susunan bata jo tambahan batu kasiak nan hanyo digunokan untuak mambuek suduik-suduik bangunan, pilaster-pilaster, jo pambateh-pambateh bingkai bawah kaki candi jo tubuah kaki sarato pambateh tubuah kaki jo bingkai ateh kaki. Manuruik panalitian taun 1983 dikataui baso candi iko paliang indak alah maalami duo tahap pambangunan.[1][6]
Candi Bungsu
suntiangCandi Bungsu bantuaknyo indak jauah beda jo Candi Suluang. Hanyo sajo pado bagian ateh babantuak bujua sangka. Candi ko tagak di sisi barat Candi Mahligai jo ukuran 13,2 x 16,2 meter. Di sisi timur ado stupa-stupa ketek sarato ado sabuah janjang nan tabuek dari batu putiah. Bagian aleh bangunan mampunyoi 20 sisi, jo sabuah bidang di atehnyo. Pado bidang tasabuik ado taratai. Panalitian nan dilakukan dek Yzerman, didapek sabuah lubang di pinggiran padmasana stupa nan di dalamnyo ado tanah jo abu. Dalam tanah tasabuik didapek tigo kapiang ameh jo sakapiang lai di dasa lubang, nan baturiah jo gambar-gambar trisula jo tigo huruf Nagari. Di bawah lubang, ado sapotong batu persegi nan pado sisi bawahnyo baturiah jo gambar trisula jo sambilan huruf Nagari. Bangunan ko dibagi manjadi duo bagian manuruik jinih bahan nan digunokan. Kurang lalbiah saparuah bangunan bagian utara tabuek dari batu kasiak, sadangkan saparuah bangunan bagian selatan tabuek dari bata. Bateh antaro kaduo bagian tasabuik maikuti bantuak profil bangunan nan tabuek dari batu kasiak. Hal iko manunjuakan baso abgian bangunan nan tabuek dari batu kasiak labiah dulu salasai dibangun kudian ditambahkan bagian bangunan nan tabuek dari bata.[1][6]
Candi Palangka
suntiangBangunan candi ko talatak di sisi timur Stupa Mahligai jo ukuran badan candi 5,1 m x 5,7 m sarato tinggi kiro-kiro duo meter. Candi iko tabuek dari batu bata sarato mampunyoi pintu masuak nan maadok ka arah utara. Candi Palangka pado maso saisuak dipakirokan dijadikan sabagai altar.[1]
Parayoan
suntiangCandi Muaro Takuih partamo kali dijadikan tampek Parayoan Waisak Nasional pado 25 Mei 2019. Parayoan ko dihadiri 3500 umaik Buddha nan datang dari Riau jo lua provinsi. Parayoan ko diawali jo malakukan pradaksina atau mangaliliangi candi dek 80 biksu nan mambaok api suci dan diikuti dek umaik Buddha nan hadir. Rangkaian parayoan diakhiri jo malapeh labiah dari 2000 lampion ka langik. Parayoan Waisak tamasuak dalam rangkaian acara Festival Muara Takus.[7][8]
Galeri
suntiang-
Candi Tuo, candi induak jo stupa barundak -
Candi Mahligai, candi jo stupa paliang tinggi -
Candi Bungsu -
Candi Palangka
.jpg)
.jpg)
.jpg)
.jpg)
Rujuakan
suntiang- ↑ a b c d e f g h i j k "Candi Muara Takus (Sumatra) - Kepustakaan Candi". candi.perpusnas.go.id (dalam bahasa Indonesia). Diarsipkan dari versi asli tanggal 2019-01-08. Diakses tanggal 2019-01-08.
- ↑ Forgotten Kingdoms in Sumatra, Brill Archive
- ↑ Soekmono, R., (2002), Pengantar sejarah kebudayaan Indonesia 2, Kanisius, ISBN 979-413-290-X.
- ↑ a b Centre, UNESCO World Heritage. "Muara Takus Compound Site". UNESCO World Heritage Centre (dalam bahasa Inggris). Diakses tanggal 2019-01-08.
- ↑ Farhan, Afif. "Candi Muara Takus, Warisan dari Kerajaan Sriwijaya". detikTravel (dalam bahasa Indonesia). Diakses tanggal 2019-01-08.
- ↑ a b c d e f bpcbsumbar (2019-05-21). "Riwayat Penelitian dan Pemugaran Kompleks Candi Muara Takus". Balai Pelestarian Cagar Budaya Sumatera Barat (dalam bahasa Inggris). Diarsipkan dari versi asli tanggal 2021-01-26. Diakses tanggal 2021-01-22.
- ↑ "3.500 Umat Budha Rayakan Waisak di Candi Muara Takus Riau". merdeka.com (dalam bahasa Inggris). Diakses tanggal 2021-01-22.
- ↑ bpcbsumbar (2019-05-27). "Waisak Nasional di Candi Muara Takus Kampar Riau 2019". Balai Pelestarian Cagar Budaya Sumatera Barat (dalam bahasa Inggris). Diarsipkan dari versi asli tanggal 2021-01-29. Diakses tanggal 2021-01-22.
Daftar Pustaka
suntiang- (Indonesia) Balai Arkeologi Medan. 1998. Berkala Arkeologi SANGKHAKALA.
- (Indonesia) Departemen Pendidikan dan Kebudayaan. 1996. Hasil Pemugaran dan Temuan Benda Cagar Budaya PSP I. Proyek pembinaan Peninggalan Sejarah dan Kepurbakalaan Pusat. Jakarta
- (Indonesia) Haryono, Timbul. 1986. Relief dan Patung Singa Pada Candi-Candi Periode Jawa Tengah: Penelitian Atas Fungsi dan Pengertiannya. Laporan Penelitian. Yogyakarta
- (Inggirih) Kempers, A. J. Bernet. 1959. Ancient Indonesian Art. Cambridge, Massachusetts: Harvard University Press
- (Indonesia) Siagian, Renville. 2002. CANDI sebagai warisan seni dan budaya Indonesia. Yogyakarta: Yayasan Cempaka Kencana
- (Indonesia) Soekmono, R. 1974. Candi, Fungsi dan Pengertiannya. Disertasi. Jakarta
- (Indonesia) Suaka PSP Prov. Sumbar dan Riau. 1995. Buletin Arkeologi AMOGHAPASA. Batusangkar
| Ado kategori tantang Candi Muaro Takuih di Wikimedia Commons |
Pautan lua
suntiang- Situs Resmi Kementrian pariwisata Archived 2016-03-04 di Wayback Machine.