Batang Kampar (bahaso Indonesia: Sungai Kampar) marupoan salah satu sungai gadang nan barado di pulau Sumatera, Indonesia. Sungai ko baulu di pagunuangan Bukik Barisan di Sumatera Barat, dan bamuaro di pasisia timur pulau ko di Riau.

Sungai ko dibantuak dek patamuan duo buah sungai nan ampia samo gadangnyo, nan disabuik Kampar Kiri jo Kampar Kanan. Patamuan ko tajadi di daerah Langgam, Kabupaten Pelalawan. Sasudahnyo patamuan tu, salanjuiknyo sungai tu disabuik jo namo Batang Kampar sajo sampai ka muaronyo di Salat Malaka. Sakuliliang kawasan ulu sungai ko dipakai juo untuak PLTA Koto Panjang, nan punyo kapasitas 114 MW.

Galombang Bono suntiang

Di sungai ko juo tajadi fenomena alam nan manakjubkan. Fenomena tasabuik tajadi di bagian hilia Batang Kampar tapeknyo di kecamatan Teluk Meranti, kabupaten Pelalawan, provinsi Riau dan dinamoan jo panduduak satampek sabagai Bono. Sasungguahnyo iko adolah galombang pasang naiak aia lauik nan masuak ka Batang Kampar di mano galombang tasabuik dapek mancapai katinggian 6 meter dan dapek mambaliakan dan mambanaman kapa-kapa ketek ataupun sampan. Galombang pasang ko tajadi akibaik duo arus lauik (Lauik Cino Salatan jo Salat Malaka) jo aruih Batang Kampar balantak. Panduduak sakitar manandoan apobilo galombang ko ka datang adolah jo mandanga suaro saroman guruah nan mandaru-daru dari jauah. Kok lah tadanga suaro saroman tu, mako kapa-kapa ketek jo sampan-sampan nan ado akan manapi untuak manyalamaikkan diri.

Kini ko galombang Bono manjadi tanamo samanjak tim ekspedisi World Wide Fund for Nature (WWF) bakunjuang ka Samananjuang Kampar (namo untuak ilia Batang Kampar). Anggota tim tasabuik manyadari kalaulah galombang tasabuik dapek dijadian sarana untuak ulahrago basalanca (surfing). Hinggo tasebalah barita bahaso galombang Bono dapek dijadian tujuan wisata salanca aia. Salah satu iklan di televisi Indonesia alah pulo manampilan video pasalanca sadang basalanca aia di ateh galombang Bono ko.