Bachtaruddin

Bachtaruddin (lahia di Maninjau, 1907 – maningga di Jakarta, 24 Juni 1956) adolah saurang panubuah jo pangapalo Partai Komunis Indonesia (PKI) di Sumatera Barat.

Pado pamilu 1955, inyo tapiliah sabagai anggota DPR RI dari Partai PKI mawakiakan daerah pamiliahan Sumatera Tangah. Di DPR RI, Bachtaruddin manjadi pangapalo Fraksi PKI jo manjabek sabagai Wakia Katuo I. Tapi, inyo maningga di tangah maso jabeknyo. Kurusi nan ditingganyo baisian jo Anwar Kadir.

Akademi Ilmu Politik Bachtaruddin, nan baambiakan dari namonyo, didirikan salapeh kamatiannyo manjadi sakolah untuak kader-kader PKI.

Kaiduikan awa

Apak Bachtaruddin banamo Said jo bagala Haji, saurang sudaga jo panyokong Persatuan Muslim Indonesia (Permi). Bachtaruddin adolah saudaro tiri dari Rasuna Said. Lahia jo bagadangan di Maninjau, Bachtaruddin manyalasaikan sakolahnyo di HIS jo MULO Jakarta. Salapeh itu, inyo bakarajo sabagai tanago karajo kolonial di Medan. Inyo pulo paranah manjadi saurang patinju di Singapura, tapi indak barapo lama.

Pado maso panduduakan Japang di Sumatera Barat, inyo manjadi personel polisi di Padang. Panulih Hasril Chaniago mancataik, Bachtaruddin bapangkaik Keibu (Inspektur Polisi) di kapolisian.

Manubuahkan PKI Sumatera Barat

Salapeh proklamasi kamardikaan Indonesia, Bachtaruddin kalua dari kapolisian untuak mangatua panubuahan PKI di Sumatera Barat basamo Usman Keadilan, Nursuhud, dan Anwar Kadir.

Wakatu pamilu 1955, PKI mandapek 61.591 suaro (sakironyo 7% dari jumalah suaro) di Sumatera Tangah. Ateh capaian tasabuik, PKI manampekkan satu wakianyo di DPR (namonyo Bachtaruddin) basamo duo wakia lainnyo di Konstituante.

Jumalah suaro nan didapek PKI di Sumatera Tangah, manuruik sijarawan Mestika Zed, "mangajuikkan" karano partai tasabuik "taamaik saketek" pado zaman pajuangan. PKI manjadi partai pamanang ka-3 salapeh Masyumi nan mandapek 480.521 suara (49%) jo Persatuan Tarbiyah Islamiyah nan mandapek 271.513 suara (28%).

Caliak pulo

• Arteria Dahlan