Persatuan Muslim Indonesia
Persatuan Muslim Indonesia, atau disingkek Permi, marupoan partai politik beraliran nasionalisme-Islam nan ditagakan di Padang Panjang pado tahun 1930. Partai iko kudian bubar dek tekanan pamarentah Hindia Belanda pada tahun 1937.[1][2][3][4]
Pendahulu Permi adolah Persatuan Sumatera Thawalib nan tagak pado tahun 1928. Pado kongresnya nan katigo di Padang Panjang, Persatuan Sumatera Thawalib barubah manjadi partai politik. Pado mulonyo, Permi bakadudukan di kota kalahirannyo, tapi kudian pusek partai iko dipindahan ka Padang.[5]
Permi marupoan partai politik nan aktif manantang panjajahan Balando. Babedo jo partai-partai lainnyo di Indonesia, Permi pado masonyo marangkul baiak asas nasionalisme maupun Islam, dan manampekannyo pado kadudukan sajajar.
Sijarah
suntiangCikal bakal Permi adolah organisasi Persatuan Sumatera Thawalib nan tabantuak pada November 1928 dalam sabuah konggres nan dihadiri dek utusan-utusan saluruah Sumatera Thawalib. Tujuan organisasi iko indak hanyo untuak maningkekan sistem parguruan tapi juo untuak mangorganisir kagiatan-kagiatan dalam bidang politik, ekonomi, jo sosial. Pado kongresnyo nan katigo bulan Mei 1930, Persatuan Sumatera Thawalib maubah dirinyo manjadi Persatuan Muslimin Indonesia (Permi).[6]
Permi mulonyo adolah organisasi kamasyarakatan barasasan Islam jo kabangsoan, nan kudian manjelma menjadi partai politik Islam. Anggota organisasi iko umumnyo adolah bakeh pelajar jo guru-guru Sumatera Thawalib nan sajak lamo manantang infiltrasi kumunih.[6]
Duo tahun sasudah ditagakan, Permi tumbuah manjadi partai nan bapangaruah di Sumatra Barat, dan salanjuiknyo pangaruhnyo maluek ka daerah lain takah Tapanuli, Aceh, Bengkulu, jo Sumatra Selatan. Puncaknyo pado Desember 1932, Permi alah punyo 7.700 anggota, nan tadiri dari 4.700 laki-laki jo 3,000 padusi. Kagiatannyo maliputi dari pandidikan, kapanduan, penerbitan berkala jo pamflet, sarato mangadoan patamuan publik.[7]
Parlawanan
suntiangSajak awal tagaknyo Permi alah manuai kacurigaan pamarentah kolonial nan mancaliaknyo sabagai ancaman. Para juru bicaro Permi biaso bapidato tarang-tarangan malawan panjajahan. Dek itu, sajak akhia tahun 1932 pargerakan tokoh-tokoh Permi mulai dibatasi. Rasuna Said, salah surang pamimpin Permi nan kareh manantang pamarentah Balando dalam pidato-pidatonyo, ditangkok pado Desember 1932.[8] Ikuik ditangkok pulo yakni aktivis wanita Permi lainnyo Rasimah Ismail.[9]
Muchtar Lutfi ditangkok pado bulan Juli tahun 1933. Babarapo pimpinan Permi kanai larangan pai. Kudian partai iko kanai larangan bakumpua. Permi bausaho mancari aka jo manerbitkan kursus-kursus tatulih, nan kudian disita pamarentah. Pangarangnyo, Ilyas Ya'kub, jo panerbitnyo Djalaluddin Thaib ditangkok pado bulan September. Muchtar Lutfi, Ilyas Ya'kub, dan Djalaluddin Thaib kudian diasiangan ka Boven Digoel pado tahun 1934.[7]
Penangkapan jo larangan tersebut efektif malumpuahan kagiatan Permi. Muhammad Sjafei, satu-satunyo pimpinan nan masih aktif, mambubaran Permi pado 18 Oktober 1937.
Ideologi
suntiangPandangan Permi nan mamaduan paham nasionalisme dengan Islam sajalan jo pandapek banyak urang Minangkabau maso itu. Pandangan iko mangkritik partai-partai nasionalis lainnyo nan maambiak model gerakan nasionalis India dan cenderung enggan mangakui Islam sabagai faktor pamarsatu dalam parjuangan kamardekaan. Manuruik mereka di dalam negara nan 90 persen Muslim, katakutan maambiak asas Islam ibaraik "harimau takuik masuak rimbo atau aia manolak mangalir ka lauik." Dek baitu itu, Permi acok batantangan jo partai-partai non-agama maupun partai Islam nan cenderung hanyo mandasaran diri pado ciek paham se.[10]
Natsir, pado maso itu bagabuang dalam Persis, mancimooh Permi sabagai Islam nan pakai dan, babedo jo Persis nan marupoan Islam nan indak pakai jo (Islam sajo).[11] Filosofi Permi juo babedo jo filosofi tokoh nasional asal Minangkabau, Mohammad Hatta nan bapandapek bahasonyo partai politik saharusnyo indak barasas agama, meskipun Hatta surang Muslim taat. [12]
Gagasan Islam nasionalis Rasyid Ridha sabana maagiah pangaruah pado para ulama di Sumatera Barat. Namun, gagasan iko baru mandapekan wadah politk nan cocok katiko tabanatuaknyo Permi dan pulangnya duo cendekiawan Minangkabau tamatan Kairo, Ilyas Ya'kub jo Muchtar Lutfi untuak mamacik tampuak kapamimpinan Permi.[13] Ilyas Yakub dalam tajuaknyo di Medan Rakjat terbitan Februari 1931 manyesalkan krisis dalam pargerakan rakyat Indonesia pado sangkek itu, utamonyo tapecahnyo gerakan Islam dengan nasionalis (kabangsoan). Manuruiknyo, meskipun didasaran atas duo asas nan babedo, indak ado pabedoan jo patantangan pado tujuan nan handak dicapai kaduo gerakan tersebut. Inyo manyaruan parsatuan sabagai tanda kadewasaan, dan bapandapek mamasuakan slogan Permi "Islam jo kabangsoan" ka dalam gerakan politik akan mamacahan krisis.[14]
Caliak pulo
suntiangRujuakan
suntiang- ↑ Elson, R. E. The Idea of Indonesia: A History. Cambridge University Press, Apr 3, 2008. pp.xiii.
- ↑ Mrázek, Rudolf. Sjahrir: Politics and Exile in Indonesia. SEAP Publications, 1994. pp.523.
- ↑ Wieringa, S. Sexual Politics in Indonesia. Springer, May 21, 2002. pp.387.
- ↑ Federspiel, Howard M. Islam and Ideology in the Emerging Indonesian State: The Persatuan Islam (Persis), 1923 to 1957. BRILL, Jan 1, 2001. pp.51.
- ↑ Sumatera Thawalib, Sekolah Islam Modern Pertama di Indonesia. Padang Kita. Retrieved November 29, 2017.
- ↑ a b Daya, Burhanuddin (1990) (dalam bahaso id). Gerakan pembaharuan pemikiran Islam. Tiara Wacana Yogya. ISBN 978-979-8120-13-8. https://books.google.co.id/books?id=CPQeAAAAMAAJ&hl=id&lr=&num=20.
- ↑ a b Ingelson, 1979. pp.230.
- ↑ Hj. Rasuna Said. Archived 2018-03-17 di Wayback Machine. Pahlawan Center. Retrieved November 29, 2017.
- ↑ Blackburn, Susan. Indonesian women and political Islam. Journal of Southeast Asian Studies / Volume 39 / Issue 01 / February 2008, pp 83–105. pp.87.
- ↑ Audrey R. Kahin (1984). "Repression and regroupment: religious and nationalist organization in West Sumatra in the 1930s". Indonesia. 38: 39–54.
- ↑ Assyaukanie, Luthfie (2009). Islam and the Secular State in Indonesia. Institute of Southeast Asian Studies. pp. 46.
- ↑ Kahin, Audrey (2008). Dari Pemberontakan ke Integrasi: Sumatra Barat dan Politik Indonesia 1926-1998. Jakarta: Yayasan Obor Indonesia. pp. 67.
- ↑ Kahin, Audrey (2008). Dari Pemberontakan ke Integrasi: Sumatra Barat dan Politik Indonesia 1926-1998. Jakarta: Yayasan Obor Indonesia. pp. 62–63.
- ↑ Abdullah, Taufik (2009). Schools and Politics: The Kaum Muda Movement in West Sumatra (1927-1933). Equinox Publishing. pp. 177.
Bibliografi
suntiang- Ingelson, John. (1979). Road to Exile: The Indonesian Nationalist Movement 1927-1934. Asian Studies Association of Australia.