Urang Alor

Suku Pantar, Etnis Dia'ang/ Dei'ing marupokan panduduak asli yang mandiami Pulau Pantar, Pura jo Pulau Alor, Kabupaten Alor, Nusa Tenggara Timur. Kabupaten Alor tadiri ateh 5 kacamatan yang tadiri dari Kacamatan Alor Timur, Alor Barat Laut, Alor Barat Daya, alor Selatan jo Pantar. Daerah iko marupokan daerah yang babukik jo bagunuang dengan babagai kamiriangan leriang. Pado abad ka 17-18 di pulau Alor jo Pentar sajo tadapek sambilan karanjaan ketek.

Suku Alor

Kawasan jo populasi nan signifikan
Kabupaten Alor, NTT, Indonesia
Bahaso
Alor, Indonesia
Agamo
Kristen Protestan (mayoritas), Muslim, Kristen Katolik, kepercayaan asli
Kalompok etnis takaik
Suku Lamaholot

Ciri-ciri fisik urang suku Alor sandiri manunjuakkan babagai variasi dari babagai jenis ras, sarupo ras Mongoloid, Negroid, jo Polinesia dan sacaro parawakannyo suku Alor ko mampunyoi rambuik yang karitiang, kulik nan itam, jo bahu yang maleba, sarato ukuran badan yang rato-ratonyo pendek.

Bahaso

Bahaso Alor suku iko dari rumpun Austronesia mampunyoi banyak ragam bahso atau dialek, diantaranyo Belagar, Denebang, Deing, Mauta, Lemma, Alor, Kabola, Abui, Kawel, Kemang, Kelong, Maneta, Wuwuli, Seboda, Malua, Kramang, Wersin jo Kui.

Pamukiman

Rumah-rumah urang Alor biasonyo badiri di ateh tiang dan babantuak bulek, sarato dibagian mungko jo balakang rumah tadapek barando rumah, bagian kida jo suok ado ruang tampek lalok jo upacara adat, dapua talatak dibagian tangah, dan di ateh ado lotiang untuak malataan barang-barang barago, sarupo benda pusako.

Atokk rumah urang suku Alor tabuek dari ilalang, ijuak, jo daun lontar, dindiang juo tabuek dari anyaman daun lontar, buluah atau papan. lantai rumah biasonyo tabuek dari anyaman buluah atau papan, kamudian tiang tangah rumah babantuak bulek.

Pamukiman rumah urang suku Alor biasonyo tadiri dari kalompok-kalompok ketek, yang mano latak rumah dari tiok-tiok kalompok biasonyo bajauahan sakitar satangah sampai sajam bajalan kaki manampuah jalan satapak. Pamiliahan tampek pamukiman suku Alor biasonyo di sakitar daerah pabukitan atau gunuang-gunuang untuak manghindari dari sarangan musuah samo baguno juo untuak mangawasi musuah dari pamukiman.

Mato pancaharian

Mato pancarian urang Alor iko pado umumnyo adolah batani, baladang dengan sistim tabang bakar. Tanaman yang di tanam di ladang tasabuik contohnyo jaguang, padi, ubi kayu, sorgum dan kacang-kacangan. Salain batani, suku Alor juo manangkok ikan sabagai mato pancarian. bagi suku urang Alor ko jaguang manjadi makanan utamo dalam kasahariannyo dan babeda jo masyarakaik Indonesia pado umumnyo yang mamakan nasi sabagai makanan utamo, bagi urang suku Alor ko nasi jadi makanan atau hidangan khusus.

Karajo di ladang sarupo mambukak lahan, manabang kayu, mambaka, samo mambuek paga biasonyo di karajoan samo pihak laki-laki suku Alor, baru untuak mangolah lahan, batanam, jo panen di karajoan basamo-samo laki-laki jo padusi. Manusuik kapicayoan urang suku Alor ko tanah atau lahan paladangan marupokan tanah ulayat adat, mako dari itu pengaturan untuak tanah adat di atur samo kapalo adat urang suku Alor ko. Biasonyo masyarakaik Alor sabalun mambukak lahan untuak batani pai maminta izin dulu ka kapalo adatnyo, jo caro ma hantaan siriah pinang atau pitih untuak mambali siriah jo pinang.

4 kalompok kerabat Urang Alor

1. Kalompok Hieta yang kaanggotaannyo dihituang malalui prinsip Patrilineal
2. Kalompok Fengfala adolah sagalo katurunan dari saudara ayah-ibu yang labiah tuo dari ayah-ibu
3. Kalompok Nengfala adolah sapupu silang dari pihak ibu
4. Kalompok kaluargo inti yang marupokan inti masyarakaik.

Kapicayoan

Mayoritas kapicayoan panduduak Alor adolah Kristen Protestan, sasudah itu ado Muslim jo saketek baragamo Kristen Katolik. Tetapi indak saketek pulo dari masyarakaik Alor yang manganut kapicayoan asli paham animisme dan dinamisme yang manyembah:

1. Larra/Lera yaitu matohari
2. Wulang yaitu bulan
3. Neda yaitu batang aia bisa disabuik juo dewa aia
4. Addi yaitu rimbo bisa disabuik juga dewa rimbo
5. Hari yaitu lauik bisa disabuik juo dewa lauik.
6. Panyembahan kapado Tuhan atau Allah disabuik (Nayaning Lhahatal) kapicayoan sacaro langsuang kapado Tuhan.

Kasenian jo kabudayaan Urang Alor

Babagai macam adat sarato kabudayaan di kabupaten Alor, mulai dari tarian, koleksi basijarah, dan suku tradisional yang masih lakek jo tradisinyo. Salah satu tarian dari Alor yang takenal iolah tarian Lego-Lego yang disabuik Sohhe / Darriz marupokan tarian tradisional Alor.

Tarian iko dilakukan sacaro massal di mano ciek jo yang lain saliang bagandeng tangan mambantuk lingkaran sambia mangaliliangi tigo batu basusun yang disabuik mesbah dengan mangumandangkan lagu pantun jo bahaso adat. Biasonya tarian iko dilakukan samalaman jo diiriangi gong dan moko.

tambahan juo dalam satiok ritual maupun ceremonial, suku alor biasonyo manyajikan makanan khas yaitu jaguang bose dan jaguang titi.

Lagu asal suku Alor adolah lagu Eti lola, Handek dan Heelora.

Alat musik tradisional suku Alor

Alor mampunyoi alat musik khas yang mirip gandang yang disebuik dengan Moko. Alat musik iko biasonyo digunakan sabagai alat upacara. Dan marupokan hasil kabudayaan zaman parunggu. Salain itu juo biasonyo moko dijadian sabagai belis, mahar atau maskawin.

Masyarakaik Alor sangat picayo kalau moko barasa dari tanah dan hanyo dipunyo samo para bangsawan karano nilainyo yang sabana tinggi. Oleh karano itu hampia bisa dipastikan indak ado masyarakaik adat di Nusantara yang mangoleksi moko dalam jumlah banyak sarupo suku-suku di Alor.

Adat perkawinan suku Alor

1. Parkawinan dengan pambayaran belis sacaro kontan, yang dimulai jo paminangan.
2. Parkawinan dengan belis yang indak dibayar kontan
3. Parkawinan tuka gadih
4. Parkawinan larii bersama
5. Parkawinan dengan malarikan sang gadih
6. Parkawinan untu adolah parkawinan tarikat