Tuntong laut
| Tuntong laut | |
|---|---|
| |
| Conservation status | |
| Klasifikasi ilmiah | |
| Kingdom: | Animalia |
| Phylum: | Chordata |
| Class: | Reptilia |
| Order: | Testudines |
| Suborder: | Cryptodira |
| Family: | Geoemydidae |
| Genus: | Batagur[1] |
| Species: | B. borneoensis |
| Namo binomial | |
| Batagur borneoensis (Schlegel & Muller, 1844) | |
| Sinonim[3] | |
| |
Tuntong laut[4] (Batagur borneoensis), atau yang dapek pulo disabuik beluku[5] adolah sajinih kuro-kuro yang hiduik di Thailand, Malaysia, Kalimantan, sarato Sumatra.[4][6] Awalnyo, kuro-kuro ko dimasuakan ka dalam marga Callagur, tapi kajian filogeni badasaan karakter DNA mitokondria nan dikarajoan pado 2007 manunjuakan tanyato marga hewan ko labiah tapek dimasukan ka dalam genus Batagur.[1]
Tuntong laut mamiliki tubuah sadang hinggo gadang, panjang karapasnyo dapek mancapai 1.000 mm, meski banyak nan hanyo sakitar 500 mm. Rahang atehnyo bagarigi. Kaki mukonyo punyo limo caka, samantaro kaki balakangnyo hanyo ampek caka.[5]
Tuntong laut nan batino baukuran lebih gadang dari nan jantan, dengan panjang tubuah mancapai 60 cm. Ukuran rato-rato hewan jantan bakisa antaro 30 sampai 40 cm.[6]
Hewan ko sangkek mudo punyo tigo lunas pado parisai pungguangnyo. Tapi, katiko alah dewasa, nan tasiso hanyo lunas vertebralnyo. Keping nuchal (tangkuak) tuntong laut sangaik ketek atau malah acok ndak ado. Keping vertebral batepi rato, hampia samo panjang jo lebanyo, kacuali keping tarakhia nan maleba di bagian balakang; urutan panjang keping vertebralnyo yaitu: 2 > 3 > 4 > 1 > 5. Keping kostal kurang labiah samo jo leba keping vertebral di tangah parisai (pado anakan: kostal kurang leba dibandingan vertebral). Urutan panjang hubungan di antaro keping parisai paruik: abdominal > femoral > pektoral > anal > < humeral > gular.[5]
Pungguang hewan ko bawarna gadiang atau coklat mudo kahijau-hijauan disaratoi jo bacak-bacak nan tasusun sabagai tigo garih hitam mamanjang di tangah keping kostal jo vertebral. Kadang-kadang dijumpai pulo individu yang hampia saluruah punggungnyo bawarna kahitaman. Tuntong laut jantan punyo garih leba bawarna sirah di ateh kapalo, tu pipi nan putiah. Parisai paruik biasanyo krem, polos ndak babacak atau bagarih.[5]
Hewan ko dapek disobok an di Asia Tenggara bagian selatan.[6] Jangkauannyo maliputi Malaysia jo Kalimantan.[6] Tuntong laut dapek pulo disobok an di Pulau Sumatra.[6] Hewan ko dapek bamigrasi sampai 3 km.[6] Dek karano padagangan hewan, tutong laut akhianyo dapek disobok an di babagai panjuru dunio.[6]
Dikatahui, tutong laut mandiami muaro sarato bagian sungai nan tapengaruah jo pasang suruik.[6] Hewan ko dapek pulo mandiami daerah rawa-rawa jo sungai ketek.[6] Katiko musim kawin, tuntong laut malakuan migrasi.[6] Sarupo jo penyu laut, tutong laut batino batelua di pasia pantai.[6]
Tuntong laut umumnyo hiduik sabagai herbivora.[6] Makanan utamonyo tadiri dari buah pohon bakau, tumbuhan jatuah ka sungai, tuneh, jo tumbuhan lia nan tumbuah di sisi sungai.[6] Rumpuik sungai marupoan salah satu sumber makanan tapenting bagi hewan ko.[6] Takadang, tutong laut nio pulo mamakan sampah dapua nan dibuang jo panduduak desa ke sungai.[6]
Di dalam panangkaran, tuntong laut dapek diagiah an makan jo babagai jinih sayua samisal bayam, kale, sawi, salada, jo enceng gondok.[6] Salain tu, hewan ko dapek pulo mamakan pisang, mangga, belewar, caciang tanah, jo makanan olahan.[6] Tapi, ndak saruman jo spesies kuro-kuro lainnyo, tutong laut ndak manunjuakan minat untuak mamakan stroberi jo apel.[6]
Ancaman populasi
suntiangTadapek babarapo ancaman nan bisa maancam populasi tuntong laut di alam lia.[4] Salah satu panyebab utamanyo adalah paburuan lia.[4] Panduduak lokal banyak nan manangkok hewan ko tu maambiak taluanyo untuak dijua di pasa lokal.[4]
Panyebab kaduonyo adolah rusaknyo hutan bakau nan marupoan habitaik tampek tingga hewan ko.[4] Siap tu, buah nan jatuah dari pohon berembang (Sonneratia caseolaris) marupakan salah satu sumber makanan utamo tutong laut.[4] Rusaknyo hutan bakau dapek mampangaruhi sumber makanan hewan ko.[4] Salain tu, rusaknyo hutan bakau dapek pulo marusak rantai makanan sarato ekologi lingkungan. Itu karano hewan ko baperan sabagai payebar biji pohon berembang.[4]
Ancaman lain nan dapek manggangu adolah kacelakaan sangkek kontak jo manusia.[4] Tuntong laut dapek taparangkok dalam jariang nelayan, taluko oleh kaia panciang, atau tabunuah oleh baliang-baliang kapa.[4]
Status konservasi
suntiangOleh International Union for the Conservation of Nature (IUCN), populasi hewan ko dimasuakan ka dalam kategori kritis (CR, Critically Endangered).[4][7] Manyikapi hal samacam ko, Pamerintah Indonesia alah mangkategorikan hewan ko sabagai spesies dengan prioritas konservasi tinggi.[4] Labiah jauah lai, tuntong laut alah dicantuman dalam lampiran Paraturan Pemerintah Nomor 7 tahun 1999 tantang palindungan hewan jo tumbuhan.[4][8]
Tadapek anggapan di kalangan ilmuwan bahwo karusakan alam sabagian gadang disebaban oleh perilaku manusia, dibanding an jo faktor alami.[4] Manyikapi hal ko, Guntoro (2010) mangamukoan bahwo parubahan tingkah laku manusia adolah pentiang untuak manyelamatkan hewan ko di alam lia.[4] Untuak maubah tingkah laku, panetapan regulasi nan ketat, sarato paningkek an kasadaran masyarakaik dinilai pentiang.[4]
Konservasi spesies tutong laut dapek didukuang jo pengamatan bakalanjuik an sarato tindakan panyelamatan aktif, samacam mangawasi tampek hewan ko batalua jo manginkubasi talua nyo tu di tampek aman.[4] Malindungi hutan bakau sabagai habitaik hewan ko tamasuak pulo hal pentiang nan harus dikarajoan.[4]
Rujuakan
suntiang- ↑ a b (Inggirih) Praschag, P., Hundsdörfer, A. K. & Fritz, U (2007). "Phylogeny and taxonomy of endangered South and South-east Asian freshwater turtles elucidated by mtDNA sequence variation (Testudines: Geoemydidae: Batagur, Callagur, Hardella, Kachuga, Pangshura)". Zoologica Scripta. 36: 429–442. line feed character di
|title=pada posisi 14 (bantuan) - ↑ Schlegel, H. & S. Muller. 1844. "Over de Schildpadden van den Indischen Archipel". In: Temminck, V. (1839-1847) Verhandelingen over de natuurlijke geschiedenis der Nederlandsche overzeesche bezittingen, door de leden der Natuurkundige Commisie in Oost-Indie en andere schrijvers. Leijden folio. Afd. 1 Zoologie.
- ↑ Fritz Uwe (2007). "Checklist of Chelonians of the World" (PDF). Vertebrate Zoology. 57 (2): 213–214. Diarsipkan (PDF) dari versi asli tanggal 2010-12-17. Diakses tanggal 29 May 2012.
- ↑ a b c d e f g h i j k l m n o p q r s (Inggirih) Guntoro J (2012). "Tracing the Footsteps of the Painted Terrapin (Batagur borneoensis) in the Aceh Tamiang Regency, Aceh, Indonesia. Preliminary Observations" (PDF). Radiata. 1: 60–67.
- ↑ a b c d Iskandar, D.T. 2000. Kura-kura & buaya Indonesia dan Papua Nugini: 101-2. Bandung: ITB.
- ↑ a b c d e f g h i j k l m n o p q r (Inggirih) Kegler B (2011). "Callagur borneoensis". Animal Diversity Web. Diakses tanggal 04 May 2014.
- ↑ (Inggirih) Asian Turtle Trade Working Group (2000). "Batagur borneoensis". IUCN. Diakses tanggal 4 May 2014.
- ↑ "LAMPIRAN PERATURAN PEMERINTAH REPUBLIK INDONESIA NOMOR 7 TAHUN 1999" (PDF). 27 Jan 1999. Diarsipkan dari versi asli (PDF) tanggal 2014-05-05. Diakses tanggal 22 May 2014.