Tunggal panaluan

Tunggal panaluan adolah tungkek sati nan digunoan dek dukun atau Datu urang Batak, Sumatera Utara untuak manyigakan baragam panyakik, mandatangan ujan, manjago kampuang (huta) dari sarangan musuah sarato mausia balo/kasialan. Tungkek ko tabuek dari kayu pohon tatantu sarato diukia babantuak muko manusia nan diieh jo bulu kudo sarato utak manusia nan dimasak. Kaduo bahan tu didapek dari pangorbanan saurang korban. Tunggal panaluan dipakiroan alah ado sajak abaik ka-19 Masehi.

Tunggal panaluan

Sijarah

Pado zaman dahulu tadapek sabuah kaluarga di hutan Sidogordogor Pangururan nan alah lamo indak punyo katurunan hinggo tujuah taun lamonyo. Kaluarga tu tadiri dari Guru Hatahutan jo istrinyo nan banamo Nasindak Panaluan. Tujuah taun sasudah tu, kalauarga tu mandapekan anak kamba laki-laki jo padusi dari panantiannyo badoa ka Ompu Mula Jadi Na Bolon. Sasudah itu dilakuan alek Martutu Aek (maagiah namo) ka kaduo anak tu, namonyo yaitu Aji Donda Hatautan untuak nan laki-laki jo Siboru Tapi Nauasan Penatua untuak nan padusi. Huta atau tokoh masyarakat manganjuran supayo kaduo anak tu dipisahan supayo di kudian hari indak tajadi hal nan indak diinginan. Katiko kaduo anak tu alah tumbuah dewasa, timbua raso suko diantaro kaduo anak tu nan indak dipakiroan dek urang tuonyo. Wakatu kaduonyo pai ka hutan mancari kayu baka, tajadi kajadian nan indak diinginan. Kaduonyo dimabuak cinto sahinggo malakuan hubungan seksual. Sasudah tu, Siboru Tapi Nausan mancaliak buah dari batang Tuo Manggule jo maminta saudara kambanya untuak maambiakannyo. Aji Donda Hatautan mamanjek batang tu sarato mamakan buahnyo, sasudah tu badannyo malakek ka batang tu sacaro tibo-tibo. Siboru Tapi Nausan pun mamanjek batang tu sarato mamakan buahnyo pulo, badannyo pun malakek pulo ka batang tu basamo jo Aji Donda Hatautan. Salanjuiknyo kaduo urang tunyo tibo basamo Datu (urang sakti) untuak malapehan badan anak-anaknyo, tapi indak berhasil. Urang sakti tu basamo ampek urang Datu lain dibek malakek lo ka batang tu dek barusaho malapehan kaduo anak tu. Sadolah urang nan malakek ka batang tu akhianyo maningga di tampek.

Sasudah kajadian tu tajadi, diukia lah patuang tungkek panaluan untuak manganang kajadian tu. Urutan nan malakek ka batang tu adolah Aji Donda Hatautan, Siboru Tapi Nauasan, Datu Pulu Panjang Na Uli, Si Parjambulan Namelbuselbus, Guru Mangantar Porang, Si Sanggar Meoleol, Si Upar Manggalele, jo Barit Songkar Pangururan. Mitos ko sabagai bantuak pangajaran turun tamurun untuak suku Batak untuak mandangaan saran urang tuo. Manuruik mitos tu, tajadinyo Tunggal Panaluan marupoan hukuman dari Dewa-dewi ka kaduo anak kamba tu dek amlakuan hubungan badan nan indak dibuliahan. Kaduo anak nan malakek ka batang nan sadang babuah tu manandoan basonyo Siboru Tapi Nauasan sadang manganduang anak kakaknyo Aji Donda Hatautan.

Bantuak

Tunggal panaluan dari ateh sampai bawah

Tunggal panaluan mampunyoi katinggian 1,70 meter, tabanyo 5-6 sentimeter, barekknyo sakitar satangah kilogram sampai sakilo nan bantuaknyo gadang di ateh jo mangetek ka bawah. Bagian bawahnyo marunciang jo tadapek basi pulo. Tungkek ko barono coklat kahitaman nan tabuek dari kayu donggala atau oiu-iu tangguli. Salain tu, tadapek pulo ukiran-ukiran di tungkek ko dari ujuang ateh sampai ka bawah. Ukiran tu babantuak sarupo manusia nan belirik dari ateh sampai ka bawah nan punyo tangan, kaki , mato, iduang, muluik, jo talingo.

Di ujuang ateh tungkek pas di ateh kapalo ukiran manusia, tadapek bulu sarupo rambuik nan tabuek dari ikua kudo, bulu ayam atau bulu buruang. Bagian bulu tu diikek jo ikek kapalo barono putiah, sirah, jo itam. Ikek kapalo nan barono putiah malambangan kasucian jo benua sabagai tampek basamayamnyo Sang Pencipta. Nan barono merah malambangan kabaranian jo tampek manusia, hewan, jo alam iduik. Nan barono itam malambangan tampek galok nan tadapek roh-roh di dalamnyo.

Di bagian tangah paliang banyak tadapek ukiran manusia jo ruang untuak mangganggam tungkek. Salain tadapek ukiran bantuak manusia, ado pulo ukiran bantuak hewan sarupo anjiang, kudo, kabau lia, ula bakaki ampek, buayo, atau ayam. Penggabuangan antaro seni jo ukiran tradisional tu dibuek jo pamahat dari kampuang Siallagan.

Fungsi

Tungkot Malehat

Tungkek Tunggal panaluan marupoan tungkek rajo adaik Batak nan dipacik dek satiok rajo adaik atau datu nan punyo ilimu magis untuak saliang bataruang manunjuakan daerah kakuasaan jo mancari sia nan takuek diantaro rajo dari datu-datu nan sakti. Sacaro fisik, tungkek ko indak mambuek efek serius kok digunoan untuak manyarang urang, tapi masyarakaik Batak mayakini pado maso lampau Rajo Batak manggunoan tungkek ko sabagai sanjato untuak malumpuahan lawan nan indak basentuhan langsuang.

Tungkek ko dapek manyegakan urang sakik, maagiahan katurunan ka kaluarga nan alah mananti katurunan, mausia roh-roh jaek, mandatangan ujan, mambarantian ujan, mabuek tanah jadi subua, dipakai parang katiko mausia panjajah di jaman panjajahan, sarato maagiah pituah, parintah atau hukuman. Dalam ritual, tungkek Tunggal panaluan dipakai dalam tari-tarian adaik batak katiko ado upacara adaik sarupo upacara katiko musim panen tibo. Tungkek tu marupoan representasi dari simbol Tuhan Yang Maha Tinggi, masyarakaik Batak nan ado di Pulau Samosir mayakini basonyo tungkek ko marupoan panjelmaan dari Tritunggal (Benua Ateh, Benua Tangah, Benua Bawah) nan manjadi sabuah tungkek. Salain itu, tungkek ko manjadi simbol atau patando adonyo kahidupan jo kamatian elok jo buruak. Tungkek nan manjadi sanjato tradisional ko disucian sacaro khusus dek masyarakaik satampek. Kini ko masih ado ciek tunggal panaluan nan masih tasiso tasimpan di dalam Museum Gereja Katolik nan ado di Samosir.

Jinih

Tunggal panaluan punyo jinih lain nan sarupo, yaitu Tungkot Malehat. Tungkot Malehat marupoan jinih Tunggal panaluan nan labiah ketek. Tinggi tungkek ko sakitar 162 cm, lebanyo 22 cm, jo badiameter 31 cm. Tungkek ko dibuek dari kayu jo digunoan dek urang Karo jo bukan urang Toba. Desain tungkek ko labiah sederahana daripado tungkek Tunggal panaluan. Tunggal panaluan diukia sampai bagian bawah, sadangkan tungkek Malehat indak punyo banyak ukiran. Tungkot Malehat babantuak sosok manusia nan sadang naiak kudi atau singo. Di kapalonyo tadapek panutuik kapalo atau ikek kapalo. Ukiran pado tungkek ko tadapek di bagian atehnyo nan diukia barupo sosok manusia nan naiak singo atau kudo. Sacaro umum tungkek ko marupoan pakambangan tungkek Tunggal panaluan nan labiah baru.

Galeri

• 
  Bantuak ateh Tungkot Malehat
• 
  Tunggal panaluan nan ado di Universitas Hawaii
• 
  Bagian ateh Tunggal panaluan

Rujuakan

Catatan Kaki

Daftar Pustaka

• Artanegara (2016). "Tongkat Tunggal Panaluan". Sistem Registrasi Museum Nasional. Diakses tanggal 28 Desember 2019. 
• Gobatak (2016). "Asal Mula Tongkat Tunggal Panaluan". Gobatak.com. Diakses tanggal 28 Desember 2011. 
• Nico Octo Vanroy Siagan (2013). "Makna Simbol Tunggal Panaluan". Universitas Komputer Indonesia. 
• Vannisa (2019). "Senjata Tradisional Sumatera Utara Lengkap Penjelasan dan Gambarnya". Perpustakaan Online Nasional. Diakses tanggal 28 Desember 2011. 
• Richman (1988). "Finial from a Ritual Staff (Tungkot Malehat)". The Metropolitan Museum of Art. Diakses tanggal 30 Desember 2011. 
• Syuaa Ash Shiraata (2011). "Tungkot Malehat". Perpustakaan Digital Budaya Indonesia. Diakses tanggal 30 Desember 2011. 
• Vipper. "Top of a Priest's Staff (Tunggal Panaluan)". Yale University Art Gallery. Diakses tanggal 30 Desember 2011. 
• "Priest's magic staff (tungkot malehat or tunggal malehat)". National Gallery of Australia. Diakses tanggal 31 Desember 2011.