Wikipedia

True at First Light

True at First Light adolah karya nonfiksi nan ditulih dek Ernest Hemingway. Buku ko bacarito tantang pajalanannyo basamo istrinyo Mary Hemingway pado tahun 1953-54 di nagara-nagara di bagian timur banua Afrika. Buku ko tabikkan pado tahun 1999, jauah satalah kamatian Hemingway.

Ernest jo Mary Hemingway di Kenya.

Latar suntiang

 
Hemingway manembak gajah di Tanganyika.

Pado tahun 1953, Ernest Hemingway barancano untuak mangunjuangi anak laki-lakinyo Patrick nan sadang tingga di Tanganyika. Hemingway pado maso tu alah pernah ka Afrika untuak safari pado tahun 1933 basamo istri patamonyo Pauline; kunjuangan tu manginspirasinyo untuak manulih carito pendek "Snows of Kilimanjaro". Majalah Look manawaran Hemingway untuak manugasannyo ka Afrika, jo bayaran $15,000 untuak pangaluaran jo $10,000 untuak hak cipta tulisan sapanjang 3,500 kato tantang pajalananan. Salain istrinyo Mary, Hemingway dikawani dek fotografer Earl Theisen.[1]

Pasangan Hemingway maninggaan Havana, tampek tingga kaduonyo kutiko itu, pado bulan Juni 1953. Tujuan patamonyo adolah Eropa untuak mangurus babarapo urusan; kaduonyo barangkek dari Venesia ka Tanganyika dan sampai pado bulan Agustus.[2] Di Tanganyika, Hemingway dipandu dek Philip Percival, nan mamandunyo pado safari patamonyo pado tahun 1933.[3] Rombongan manjalajahi bantaran Sungai Salengai manuju rawa-rawa di Kimana jo Lambah Rift sabalun basobok jo Patrick nan tingga di sabuah ladang di tangah Tanganyika. Salapeh tu, Percival maninggaan pulang rombongan Hemingway. Ernest, Mary, jo Theisen malanjuikan pajalanan dan tingga salamo duo bulan di kaki Gunuang Kilimanjaro.[4]

Kacalakaan kapa tabang suntiang

Pado 21 Januari 1956, Hemingway mancater sabuah kapa tabang raun-raun sabagai hadiah Natal untuak Mary. Duo hari sudah tu, dalam pajalanan manuju Aia Tajun Murchison di Uganda, kapa tabang Hemingway malantak sabuah tiang listrik; saluruah panumpang mandapek luko ketek-ketek. Namun, sabuah kapa tabang lain nan tabang malinteh malaporan baso indak ado panumpang nan salamaik, sainggo pado isuak arinyo barito kamatian Hemingway alah takaba ka saluruah dunia.[5]

Rombongan Hemingway disalamaikkan dek surang pilot nan tabang malinteh, namun kapa tabang de Havilland nan manyalamaikkan tu tabaka pado kutiko cubo tabang. Ladakan di kapa tabang panyalamaik tu mambuek anguih paspor rombongan, rol film, jo saluruah pitih nan ado. Rombongan tapaso bajalan ka Entebbe manaiki oto, dan malanjuikkan ka Nairobi untuak mamuliahan diri.[6] Walaupun luko-luko, Hemingway ikuik jo Patrick dan istrinyo pai mamanciang pado bulan Februari. Kutiko sabuah kabakaran hutan tajadi, Hemingway jatuah ka dalam api kutiko sadang mancubo mamadaman, nan mambuek kaki, paruik muko, bibia, jo kaki kirinyo ikuik tabaka. Pado kutiko dipareso di Venesia manjalang pulang ka Kuba, Hemingway diagnosa ratak tulang balakang, ratak ginjal jo hati, bahu tageser, jo ratak tangkurak.[2][7]

Proses panulisan suntiang

Kutiko sadang mamuliahan diri di Nairobi, Hemingway mulai manulih laporannyo untuak Look, nan mambayia tambahan $20,000 untuak laporan eksklusif tantang cilako kapa tabangnyo. Laporan Hemingway ditabikkan pado 26 Januari 1954, sapanjang duo puluah halaman majalah.[5][8]

Salapeh Hemingway tibo di Kuba, inyo lansuang manulih pangalamannyo salamo di safari walaupun masih sakik. Inyo lansuang manulih labiah dari 10,000 kato, sainggo naskah awalnyo mencapai labiah 800 halaman.[9][10] Pado bulan Oktober 1955, inyo manulih baso inyo alah mancapai sakitar 650 halaman[11]; namun pado Januari 1956, inyo mangaku mulai sulik maingek a nan tajadi salamo pajalanan tu. Karajo pado buku ko ditangguahan dek proses syuting film The Old Man and the Sea;[12] Hemingway kudian mangatoan pado redakturnyo baso inyo indak mungkin lai mangarajoan buku tu.[13] Naskah awalnyo disimpan pado sabuah kotak deposit di Havana, walaupun sasudah Revolusi 1959 Hemingway bapikia baso naskah tasabuik alah ilang.[14]

Panabitan suntiang

True at First Light indak pernah ditabikan pado maso Hemingway masih iduik. Pado tahun 1965, Mary Hemingway mandirian Hemingway Foundation dan manyumbangan naskah jo surek paninggalan suaminyo ka John F. Kennedy Library. Pado tahun 1980, sakumpulan sarjana-sarjana pangkaji karya Hemingway mamutuihan untuak mandirian Hemingway Society, nan batujuan untuak mamaliaro karya-karyanyo. Salapeh Mary maningga pado tahun 1986, anak-anak Hemingway, John jo Patrick mamintak pado Hemingway Society untuak turuik sato mangurus Hemingway Foundation.[15][16]

Pado awal tahun 1970an, Sports Illustrated manabikkan cuplikan dari naskah Afrika Hemingway dalam babarapo seri ateh izin Mary Hemingway.[17] Pado tahun 1997, ahli waris jo Hemingway Society/Foundation basatuju untuak manabikkan pajalanan Hemingway di Afrika dalam duo buku. True at First Light disuntiang dek Patrick Hemingway, samantaro naskah nan labiah lengkap ditabikkan dalam judul Of Under Kilimanjaro.[16]

Scribner's, panabik buku ko, mamintak pado Patrick untuak manyuntiang naskahnyo manjadi kurang dari 100,00 kato. Inyo bakarajo salamo duo tahun untuak manyuntiang naskah nan labiah dari 200,000 kato, mampakuek jalan carito, dan mambuang bagian-bagian nan ado opini-opini pribadi Hemingway taadok babarapo anggota keluarga jo urang nan masih iduik. True at First Light ditabikkan pado 7 Juli 1999. Cetakan patamonyo adolah sabanyak 200,000 eksemplar. Majalah 'The New Yorker manabikkan cuplikan bukunyo sacaro berseri. Versi rakaman suaro ditabikkan pado tahun 2007.[18]

Tanggapan suntiang

True at First Light masuak ka dalam daftar buku nan paliang banyak tajua versi The New York Times,[19] walaupun kritikus Ralph Blumenthal di koran tu surang manyatoan baso buku ko indak sarancak fiksi autobiografi Hemingway nan sabalunnyo. Dalam resensi tahun 1999, James Wood manyatoan baso Hemingway mamukasuikkan buku bukan sabagai novel, namun panyuntiang sasudahnyo maubahnyo manjadi novel.[20]

Jim Campbell dari The Guardian manyatoan baso buku ko adolah salah satu karya Hemingway nan paliang buruak.[21] Namun, Christopher Ondaatje di The Independent bapandapek baso carito-carito Hemingway dari Afrika marupoan salah satu karyanyo nan paliang rancak.[22]

Banyak kritikus nan mangkritik Patrick Hemingway subagai panyuntiang naskah ko. Di National Review, Kenneth S. Lynn manulih baso Hemingway mungkin akan berang dek anak-anaknyo mamutuihan untuak manabikkan naskah nan inyo surang anggap indak layak tabik ko.[23] Panulih Joan Didion juo mangkritik kaputusan kaluarga Hemingway untuak manabikkan buku ko dan mangkomersialisasikan warisan Hemingway.[24]

Rujuakan suntiang

  1. ↑ Mellow 1992, pp. 337–340
  2. ↑ a b Mellow 1992, pp. 582–588
  3. ↑ Baker 1981, p. 825
  4. ↑ Baker 1972, pp. 331–333
  5. ↑ a b Reynolds 2000, pp. 270–276
  6. ↑ "Hemingway out of the Jungle; Arm Hurt; He says Luck Holds; Hemingway Quips over his ordeal". The New York Times. 26 January 1954. Diakses tanggal 1 Juni 2020. 
  7. ↑ Meyers 1985, pp. 505–507
  8. ↑ Weaver, John B. "Hemingway and the Magazines". University of South Carolina. Diakses tanggal 1 Juni 2020. 
  9. ↑ Baker 1972, pp. 335–336
  10. ↑ Reynolds 2000, p. 366
  11. ↑ Baker 1981, p. 847
  12. ↑ Baker 1981, p. 853
  13. ↑ Baker 1981, p. 868
  14. ↑ Reynolds 2000, p. 354
  15. ↑ Miller 2006, pp. 78–80
  16. ↑ a b Seefeldt 1999
  17. ↑ Blumenthal, Ralph. A New Book By Hemingway; Blend of Life and Fiction Tells of African Bride The New York Times. 14 August 1998. Retrieved 1 Juni 2020.
  18. ↑ "Library of Congress Online Catalog". Library of Congress. Diakses tanggal 2010-02-26. 
  19. ↑ "Best Sellers Plus". The New York Times. 5 September 1999. Diakses tanggal 1 Juni 2020. 
  20. ↑ Wood, James (11 July 1999). "The Lion King". The New York Times. Diakses tanggal 1 Juni 2020. 
  21. ↑ Campbell, Jim (4 July 1999). "Rogue Hemingway". The Guardian. Diakses tanggal 1 Juni 2020. 
  22. ↑ Ondaatje, Christopher (30 October 2001). "Bewitched by Africa's strange beauty". The Independent. Diakses tanggal 1 Juni 2020. 
  23. ↑ Lynn 1999
  24. ↑ Didion, Joan (9 November 1998). "Last Words". The New Yorker. Diakses tanggal 1 Juni 2020. 

Sumber suntiang

Pautan lua suntiang

Diambiak dari "https://min.wikipedia.org/w/index.php?title=True_at_First_Light&oldid=2023782"