Tari Toga

Tari toga marupokan tarian tradisonal warisan karajaan Siguntur. Sacaro etimologis tari toga barasal dari kato togaan nan dalam bahaso Siguntur bararti "larangan". Unsur utamo Tari Toga adolah panari, pandendang, jo pemusik. Samantaro sabagai palengkap diparalukan saurang rajo, hulu balang, dayang-dayang, jo tadakwa. Tari Toga mancaritokan saurang nan elok banamo Sutan Elok nan mati ditanduak kabau. Nan punyo kabau banamo Bujang Salamaik dibaok kahadapan rajo untuak diadili. Salanjuiknyo rajo mangeluakan titah supayo baliau dihukum pancuang. Alaik musik nan dimainkan adolah momongan, kemong, gong, canang, jo gandang.

Tari toga pado dasarnyo dapek dikalompokan manjadi 2 yoitu 1) Garakan tari, jo 2) Kumpulan bait atau syair. Kaduo kalompok ikolah nan sasungguahnyo manjadi bagian tapantiang dari tari toga, namun dalam panampilannyo takadang dipisahkan dek masyarakaik. Gerakan tari mangandalkan kaindahan jo kalenturan tubuah, sadangkan bait atau syair mangutamokan kamampuan pandendang untuak manyampaikan isi bait atau syair tasabuik.

Dari segi etimologi, istilah tari toga barasal dari kato togaan nan dalam bahaso Siguntur mampunyoi arti larangan. Manuruik carito nan baredar hinggo hari kini, asa mulo atau kabaradoan tari toga bahubuangan jo suatu paristiwa pado maso karajaan Siguntur dahulu. Disabuikan pado acara buru babi, rajo bertitah kapado saluruah masyarakaik di Nagari (karajaan) Siguntur kalau kasado taranak harus dimasukan ka dalam kandangnyo, sabab bisuak ka diadoan buru babi. Katiko titah disampaikan, ado saurang panduduak nan lupo jo titah tasabuik, urang tasabuik tatap malapeh taranaknyo. Malang bagi pamilik, disaaik buru babi balangsuang, taranak urang tasabuik alah manyababkan anak rajo maningga dunia. Akibaiknyo rajo manjadi murka jo manjatuahkan hukuman mati tahadap urang nan indak manjalankan titah rajo tasabuik. Kahilangan saurang anak manyababkan rajo manjadi sadiah, sahinggo muncua ide dari urang-urang istano untuak manghibur rajo supayo bisa malupokan kamatian anaknyo. Tarian nan digunokan dalam menghibur rajo kamudian dikenal jo namo tari toga.

Tarian nan ditampilkan dihadapan rajo supayo marubah kaputusannyo dimainkan dek masyarakaik jo kaindahan gerakan jo senandung bait nan didendangkan. Indahnyo gerakan tari jo bait atau syair yang didendangkan sacaro babalasan dek masyarakaik mangesankan hati rajo jo mahilangkan kasadiahan nan dirasoan. Bakurangnyo kasadiahan nan dirasoan rajo, manyababkan baliau marubah kaputusannyo dari hukuman mati, manjadi hukuman mangabdian diri kapado kaluarga karajaan pado urang nan didakwai hukuman tasabuik Samanjak itu tari toga acok ditampilan tarutamo katiko urang-urang istana sadang mangadokan kagiatan sarupo turun mandi, parkawinan, maangkek panghulu jo lainnyo nan dilaksanakan di rumah gadang Siguntur, nan manjadi tari karajaan.

Pado maso panjajahan, tari toga indak lai ditampilkan sabagai lambang dari kajayaan karajaan, karano dilarang penampilannyo dek Balando. Sahinggo, katiko itu masyarakaik Siguntur manampilkan tari toga indak jo garakan tari namun hanyo mandendangkan bait atau syair tari toga dalam kagiatan batobo. Batobo adolah kagiatan gotong royong nan dilakuan dek babarapo urang dalam mangarajoan sawah atau ladang. Tujuan dari panampilan tari toga katiko batobo adolah untuak mahibur diri jo maisi waktu katiko sadang batobo di sawah jo ladang. Pado maso Indonesia merdeka sampai saaik kini, tari toga kambali dimuncuakan dalam bantuak tari jo dendang bait/syair. Pado maso kini diadokan revitalisasi tahadap panampilan tari toga nan disasuaikan jo konteks kini, sahinggo manjadi labiah manarik sarato lamak untuka ditonton. Badasarkan hal diateh, dipahami parkambangan tari toga pado masyarakaik Siguntur alah malalui 3 tahap atau pariode, yoitu 1) Karajaan Siguntur, 2) Panjajahan Balando, jo 3) pariode sasudah kamerdekaan (revitalisasi). Dalam panampilan tari toga tadapek babarapo unsur utamo sabagai pelaku (actor) yaitu panari, pandendang jo pamusik, sarato pameran rajo, dayang-dayang, hulubalang dan tahukum.