Tari Padusi

Tari Padusi marupokan sabuah tari nan mangisahan padusi di Minangkabau nan mancaritoan tantang kasatiaan, pacintoan, jo harago diri padusi di Minangkabau. Dalam Tari Padusi mancaritoan kondisi padusi di zaman kini, dimano padusi dizaman kini indak sarupo layaknyo padusi di Minangkabau. Padusi di Minangkabau nan tanamo sabagai "Limpapeh rumah nan gadang" kini alah barubah manjadi padusi nan indak diharagoi di Minangkabau. Tari Padusi digarap manjadi tigo babak nan tadiri dari kasatiaan, pacintoan, jo harago diri padusi di Minangkabau.[1]

Tari Padusi digarap dek Tom Ibnur, panulih naskah Nia Dinata sarato sutradara Rama Soeprapto. Tari Padusi ditampilkan di Teater Jakarta pado 12 Mei 2013. Tari Padusi diangkek dari tigo lagenda kaba di Minangkabau, nan tadiri dari kaba Siti Jamilah, Puti Bungsu, jo Sabai Nan aluih nan mancaritoan padusi ebaik di Minangkabau nan manjago ucapan jo tindakannyo. Karano dari lagenda nan mampunyoi naskah drama nan kudian ditarikan, makonyo Tari Padusi disabuik sabagai "Legendra Drama Tari Padusi".[2]

Legenda Siti JamilahSuntiang

Siti Jamilah marupoan sabuah kisah kaba Minangkabau nan mancaritoan tantang saurang padusi Minang nan balaki banamo Tuanku Lareh Simawang nan mampunyoi sifaik sawenang- wenang kapado Siti Jamilah. Dalam legenda ko, Tuanku Lareh Simawang cinan bana mampunyoi bini salain Siti Jamilah, dimano katiko itu Siti jamilah sadang manganduang anak Tuanku Lareh Simawang, walaupun baitu Tuanku Lareh Simawang basikukuah untuak mampunyoi istri baliak. Karano kasatiaannyo, Siti Jamilah marilaan lakinyo babini baliak.

Legenda Puti BungsuSuntiang

Dalam legenda Puti Bungsu mancaritoan tantang pacintoan saurang padusi di Minangkabau nan banamo Puti Bungsu jo Malin Deman. Bamulo dari carito tujuah urang bidadari nan turun untuak mandi, Malin Deman indak sangajo lewaik maambiak pakaian Puti Bungsu, bidadari paliang ketek dari tujuah bidadari. Malin Deman manyuruah Puti Bungsu untuak nikah samo Malin Deman. Puti Bungsu pun manikah jo Malin Deman dikaruniai saurang anak nan banamo Malin Duano, saurang anak nan mada sangaik, sainggo mambuek amak Malin Deman berang karano maanggap Puti Bungsu indak pandai mandidiak anak. Karano indak tahan dek Puti Bungsu jo kecek amak Malin Deman, Puti Bungsu maajak anaknyo untuak ka kayangan. Dek karinduan anak kapado ayahnyo, Malin Duano turun ka bumi dan basarobok jo ayahnyo, akhianyo kaluarganyo iduik bahagia.

Legenda Sabai Nan AluihSuntiang

Sabai Nan Aluih marupokan saurang gadih minang nan lahia dari saurang bapak nan banamo Rajo Babandiang jo Sadun Saribai. Sabai Nan Aluih gadih minang nan rancak, nan tapandang dikampuang. Dek karancakannyo, Tuanku Rajo Nan Panjang andak malamar Sabai. Tuanku Rajo Nan Panjang marupokan saurang rajo nan kayo di kampuang. Dek umua Rajo Nan Panjang alah gaek, Sabai indak manarimo lamaran Rajo Nan Panjang. Sampai suatu katiko, Rajo Nan panjang indak tarimo panolakan dari sabai, Rajo nan Panjang pun mambaok lari apak Sabai nan Aluih. Dek mandanga apaknyo ka dibaok Rajo nan Panjang, Sabai pun pai untuak manolong apaknyo, di situlah balago antaro Rajo nan Panjang jo Sabai nan Aluih, Sabai akhianyo mambunuah Rajo nan panjang karano mampatahankan harago dirinyo.

RujuakanSuntiang

  1. "Drama Tari 'Padusi' Siap Pentas di Jakarta". Diakses tanggal 15 Agustus 2019. 
  2. "Legendra: tentang Kesetiaan Perempuan Minang". Diakses tanggal 15 Agustus 2019.