Sabai Nan Aluih adolah sabuah carito rakyat dari Padang Tarok, Baso, Agam nan talatak di provinsi Sumatra Barat. Carito nan batema pahlawan ko ditulis dek Sutan Sati. Sabai Nan Aluih adolah namo anak padusi dari Rajo Babanding jo Sadun Saribai. Carito ko mancaritoan tantang aksi kapahlawanan Sabai Nan Aluih dalam mambalehan kamatian ayahnyo kapado musuahnyo Rajo Nan Panjang.[1]

Carito suntiang

Di sabuah tampek di daerah Padang iduiklah sapasang laki- bini jo kaduo anaknyo. Sapasang laki bini tu adolah Rajo Babanding jo Sadun Saribai. Mampunyoi anak laki-laki jo padusi nan banamo Mangkutak Alam jo Sabai Nan Aluih. Kaduo anaknyo mampunyoi sifaik nan babeda. Sabai rajin manolong ibunyo di rumah, sadangkan Mangkutak acokbana bamain layang-layang hinggo kuliknyo bawarna itam karano sinar matahari. Babeda jo panampilan adiaknyo, Sabai mampunyoi paras nan rancak jo rupawan. Malahan dek karancakan nyo disukoi dek banyak urang, tamasuk Rajo Nan Panjang. Rajo Nan Panjang adolah saurang nan sangaik disagani di kampuang Situjuah. Rajo Nan Panjang mangiriman pangawalnyo ka rumah Rajo Babanding untuak malamar Sabai Nan Aluih. Namun, lamaran tu ditolak, Rajo Babanding bahkan menantang Rajo Nan Panjang untuak bacakak. Rajo Nan Panjang pun manarimo tantangan itu. Baliau pun datang jo pangawalnyo, cakak pun dimulai. Cakak tu ruponyo balangsuang lamo, tapi pangawal alah tumbang labiah dulu. Rajo Babanding jo Rajo Nan Panjang masih taruih bacakak sampai akhianyo Rajo Babandiang kanai paluru dek pangawal Rajo Nan Panjang nan datang tibo-tibo dari samak-samak. Rajo Babandiang pun tagulatak ndak bagarak. Kajadian ko diliek dek saurang gubalo. Gubalo ko kamudian pai ka rumah Rajo Babandiang untuak maagiah tau kajadian tu kapado kaluarga Rajo Babandiang. Sampainyo di rumah Rajo Babanding, gubalo ko basarobok jo Sabai sarato maagiah tau kajadian itu.Sabai pun balari ka tampek kajadian. Di tangah jalan, Sabai batamu jo Rajo Nan Panjang jo pangawalnyo. Sabai batanyo tantang kacurangan Rajo Nan Panjang, tapi Rajo Nan Panjang hanyo galak saakan-akan manggalakan kamatian Rajo Babanding. Sabai pun indak bisa manahan berangnyo. Saaik itu juo Sabai langsuang mairik pelatuk sanapan nan nyo baok dari rumah. Paluru manganai dado Rajo Nan Panjang. Rajo nan Panjang pun langsuang tajatuah dari kudo. Pangawal Rajo Nan Panjang pun langsuang balari. Sabai pun balari manuju tampek ayahnyo. Sabai pun manangih katiko nyo tau ayahnyo alah maningga.[1]

Amanat Carito suntiang

Kisah Sabai Nan Aluih mampunyoii pasan pantiang bagi kahidupan manusia. Inyo adolah padusi nan rancak jo lamah lambuik. Tapi, inyo indak takuik untuak mambela nan bana walaupun inyo tau kalau nyawonyo alah manjadi taruhan. Sabai adolah anak nan patuah kapado urangtuonyo. Iny manolong urang tuonyo sarato mahormati ayah jo ibunyo. Sabai Nan Aluih manjadi taladan nan elok untuak anak-anak.[1]

Rujuakan suntiang

  1. a b c https://www.kompasiana.com/filiniagusti/56b9b55187afbd730894744a/sabai-nan-aluih?page=all