Syarifah Nawawi
Syarifah Nawawi (laia di Bukiktinggi, 1896 - maningga di Jakarta, 17 April 1988 pado umua 91 taun) adolah surang tokoh pandidikan sarato pajuang Indonesia. Syarifah adolah anak dari pasangan Nawawi Soetan Makmoer, surang guru tanamo di Sakola Rajo (Kweekschool) Bukiktinggi jo surang padusi nan banamo Chatimah. Syarifah adolah anak kaampek sarato putri katigo dari 9 basudaro.
Syarifah Nawawi | |
|---|---|
 | |
| Lahia | 1896 |
| Maningga | 17 April 1988 (umua 91) |
| Kabangsaan |  Indonesia |
| Karojo | Panggiat |
| Dikana dek | Panggiat pandidikan padusi |
| Pasangan | Wiranatakoesoema |
| Anak | Am, Nelly dan Minarsih |
| Urang tuo | Nawawi Soetan Makmoer Chatimah |
Pandidikan
suntiangManuruik Nawawi, pandidikan untuak anak sangeklah pantiang. Syarifah manampuah pandidikan di Europeesche Langere School (ELS), sakola Balando di Bukiktinggi. Sasudah tamaik pado taun 1907 Syarifah malanjuik-an sakolanyo ka Kweekschool, tampek ayahnyo maaja. Pado taun 1908, Syarifah adolah satu-satunyo murik padusi di antaro 75 urang murik sakola tu, sarato Syarifah adolah gadih Minang partamo nan mangalami pandidikan ala Eropa. Tamaik dari Kweekschool, Syarifah jo sudaronyo, Syamsiar, malanjuik-an sakola ka Salemba School di Batavia.
Rumah Tanggo
suntiangKatiko balibur ka Cianjur, dek kawannyo, Syarifah dikenalkan kapado surang bangsawan Sunda, Wiranatakoesoema, nan dikudian hari jadi lakinyo. Mareka manikah pado bulan Mei 1916. Namun rumah tanggo mereka indak balangsuang lamo, pado tanggal 17 April 1924, Wiranatakoesoema mancaraian Syarifah malalui telegram katiko Syarifah jo anak-anaknyo sadang balibur di Bukiktinggi. Ateh kaputusan Wiranatakoesoema tu, inyo-pun mandapek banyak kacaman di koran Balando maupun koran pribumi, tamasuak kacaman dari H. Agus Salim.
Dalam maso panikahan nan pendek tu mareka dikaruniai 3 urang anak iyolah Am, Nelly dan Minarsih. Minarsih, anak bungsu Syarifah dikudian hari dikana sabagai Mien Soedarpo manikah jo Soedarpo Sastrosatomo, surang pajuang kamardekaan lalu manjadi pangusaha gadang sasudah Indonesia mardeka. Soedarpo mandirian parusahaan palayaran nan kudian hari manjadi gadang nan banamo Samudera Lines. Sapanjang taun 1924-1937, Syarifah jo anak-anaknyo tingga di Bukiktinggi. Syarifah mamimpin sakola De Meisjes Vervolg School (Sakola Lanjutan untuak Anak Padusi) sabagai kapalo sakola di kota tu.
Pangabdian
suntiangSasudah kaduo urangtuonyo maningga, pado taun 1937 Syarifah baliak ka Batavia. Syarifah manyakolaan anak-anaknyo di Koning Willem III Batavia. Aktivitasnyo-pun balanjuik jo mamimpin Sakola Kamajuan Istri di Meester Cornelis.
Syarifah maunduran diri dari sakola tu katiko Japang masuak sarato manguasoi Indonesia. Namun Syarifah tatap bajuang mamajuan pandidikan padusi jo anak-anak lalu masuak ka Fujinkai, suatu organisasi padusi binaan Japang.
Pado tanggal 11 Juli 1955 Syarifah basamo kawan-kawannyo mandirian Yayasan Panti Wanita Trisula PERWARI. PERWARI adolah sabuah organisasi padusi pajuang Indonesia nan didirian pado taun 1945. Syarifah indak pernah baranti mangabdi pado masyarakaik malalui pandidikan sarato mambarian pangajaran kapado anak-anak padusi sarato padusi mudo nan indak mampu, bahkan Syarifah marelaan rumahnyo dijadian tampek sakola.
Pangabdian Syarifah Nawawi untuak pandidikan jo pancardasan padusi di Indonesia tantu akan salalu dikanang dek bangsonyo. Syarifah manarimo piagam pangaragoan ateh sumbangsihnyo nan tulus sarato indak kenal lelah demi tarangkeknyo anak-anak padusi miskin ka darajaik nan labiah tinggi. Sampai kini potret wajahnyo masih tagantuang di gaduang Panti Trisula Perwari sabagai pangakuan ateh pangabdian sarato sumbangsihnyo nan tulus tu.
Syarifah Nawawi, pajuang pandidikan tu alah maningga di Jakarta pado tanggal 17 April 1988 dalam umua 91 taun.
Pautan lua
suntiang- Syarifah Nawawi : Wanita Minang Pertama Yang Mengecap Sistem Pendidikan Eropa Archived 2014-02-22 di Wayback Machine. Minang Forum, 05 Agustus 2011. Diakses 09 Mei 2013.
- Yayasan Panti Wanita Trisula PERWARI Archived 2012-06-29 di Wayback Machine.
