Urang Gayo

Urang Gayo adolah sabuah kalompok etnik nan mauni pagunuangan di tangah Aceh nan populasinyo bajumlah kurang labiah 85.000 jiwa. Urang Gayo sacaro mayoritas ado di Kabupaten Aceh Tangah, Bener Meriah, jo Gayo Lues. Urang Gayo baragamo Islam dan tunduak dalam manjalankan agamonyo. Urang Gayo manggunokan bahaso nan disabuik bahaso Gayo. Salah satu kasenian Gayo nan alah tanamo di Indonesia adolah Tari Saman.

Urang Gayo

Marapulai jo anak daro Gayo
Total populasi
lk. 85.000
Kawasan jo populasi nan signifikan
Bener Meriah, Aceh Tengah, Gayo Lues
Bahaso
Bahaso Gayo
Agamo
Islam
Kalompok etnis takaik
Alas, Mandailing, Batak, Karo

Sijarah

Pado abaik ka-11, Karajaan Linge didirikan dek urang-urang Gayo pado maso pamarentahan Sultan Makhdum Johan Berdaulat Mahmud Syah dari Kasultanan Perlak. Informasi iko didapek dari katarangan Rajo Uyem jo anaknyo Rajo Ranta iolah Rajo Cik Bebesan dan dari Zainuddin iolah dari rajo-rajo Kejurun Bukit nan kaduo-duonyo panah bakuaso sabagai rajo pado maso kolonial Ulando.

Rajo Linge I tasabuik mampunyoi 4 urang anak. Nan tatuo saurang padusi banamo Empu Beru atau Datu Beru, nan lain Sebayak Lingga (Ali Syah), Meurah Johan (Johan Syah), jo Meurah Lingga (Malamsyah). Sebayak Lingga kudian marantau ka Tanah Karo dan mambukak nagari di sinan inggo mandapek gala Rajo Lingga Sibayak. Meurah Johan manjalajah ka Aceh Besar dan mandirikan karajaannyo nan banamo Lam Krak atau Lam Oeii atau nan tanamo jo Lamuri atau Kasultanan Lamuri. Samantaro Meurah Lingga tingga di Linge nan kudian manjadi Rajo Linge turun tamurun. Meurah Silu marantau ka daerah Pasai dan manjadi pagawai Kasultanan Daya di Pasai. Meurah Mege surang dikubuakan di Wih ni Rayang di Lereang Keramil Paluh di daerah Linge, Aceh Tengah. Sampai kini masih tapiaro dan dihoromati dek panduduak. Panyabab marantau indak dikatahui. Akan tatapi manuruik riwayaik, dikisahkan baso Rajo Linge labiah manyayangi bunsunyo Meurah Mege. Saingga mambuek anak-anak nan lain labiah mamiliah untuak manjalajah.

Dinasti Lingga

1. Adi Genali Raja Linge I di Gayo
   1. Rajo Sebayak Lingga di Tanah Karo, manjadi Rajo Karo
   2. Rajo Meurah Johan (panaruko Kasultanan Lamuri)
   3. Meurah Silu anak dari Meurah Sinabung (panaruko Kasultanan Samudera Pasai), dan
2. Rajo Linge II alias Marah Lingga di Gayo
3. Rajo Lingga III-XII di Gayo
4. Rajo Lingga XIII manjadi Amir al-Harb Kesultanan Aceh. Pado taun 1533 tabantuaklah Karajaan Johor baru di Malaysia nan dipimpin dek Sultan Alauddin Mansyur Syah. Rajo Lingga XIII diangkek manjadi kabinet di karajaan baru tersebut. Katurunannyo mandirikan Kasultanan Lingga di Pulau Lingga, Kapulauan Riau nan kadaulatannyo mancakuik Riau (Indonesia), Temasek (Singapura), jo saketek wilayah Malaysia.

Rajo-rajo di Sebayak Lingga Karo indak tadokumentasi. Pado maso Ulando, diangkek baliak rajo-rajonyo walau hanyo duo periode

1. Rajo Sendi Sibayak Lingga (piliahan Ulando)
2. Rajo Kalilong Sibayak Lingga

Kolonial Ulando

Salapeh palawanan awal Ulando, nan manewaskan banyak urang Gayo jo Ulando, Ulando manduduaki daerah itu salamo 1904–1942. Salamo wakatu itu, urang Gayo baparak tanaman komersial cando sayua jo kopi. Sajak panjajahan Ulando, urang Gayo alah mandapek akses ka tingkek pandidikan nan labiah tinggi, dan turuik sato sampai taraf tatantu dalam Islamisasi jo modernisasi kampuangnyo.

Kahidupan sosial

Umah Gayo Pitu Ruang

Urang Gayo hiduik dalam komunitas ketek nan disabuik kampong. Satiok kampong dikapaloi dek saurang geucik. Kumpulan babarapo kampuang disabuik kemukiman, nan dipimpin dek mukim. Sistem pamarentahan tradisional barupo unsua kapamimpinan nan disabuik sarak opat, tadiri dari reje (rajo), petue (datuak), imem (imam), jo rayat (rakyaik).

Pado maso kini babarapo kamukiman marupokan bagian dari kecamatan, jo unsua-unsua kapamimpinan tadiri ateh: geucik, wakil gecik, imem, dan cadiak pandai nan mawakili rakyaik .

Sabuah kampong biasonyo diuni dek babarapo kalompok belah (klan). Anggota-anggota ciek belah maraso barasa dari ciek niniak muyang, masih saliang tau, dan mangambangkan hubuangan tatap dalam babagai upacara adat. Garih katurunan diambiak manuruik prinsip patrilineal. Sistem pakawinan nan balaku manuruik adat adolah eksogami belah, sarato adaik manatap sasudah nikah nan patrilokal (juelen) atau matrilokal (angkap).

Kalompok badunsanak paliang ketek disabuik sara ine (rumahtanggo). Kasatuan babarapo rumah tanggo disabuik sara dapur. Pado maso saisuak babarapo sara dapur tingga basamo dalam sabuah rumah panjang, sampai disabuik sara umah. Babarapo buah rumah panjang atau umah gayo bagabuang ka dalam ciek belah (klan). Pado maso kini banyak rumah tanggo nan mauni rumah surang. Pado maso saisuak, urang Gayo bakarajo jo ka sawah sarato bataranak.

Salain itu ado panduduak nan baparak, manjalo ikan, sarato maramu hasia utan. Inyo juo mangambangkan karajinan tangan mambuek keramik, mauleh, jo mananun. Kini mato pancarian nan dominan adolah baparak, utamonyo baparak kopi. Karajinan tangan mambuek keramik dan anyaman panah tarancam punah, tapi jo dijadikannyo daerah Gayo sabagai salah satu daerah tujuan raun di Aceh, karajinan tangan iko mulai dikambangkan baliak. Kerajinan lain nan juo banyak mandapek paratian adolah karajinan mambuek sulaman kerawang jo ragi nan khas.

Seni budayo

Pusaro saisuak urang Gayo

Kasenian Gayo ampia indak panah tasandek, malah canduang bakambang. Bantuak kasenian Gayo nan tanamo, antaro lain tari Saman jo seni batutua nan disabuik Didong. Salain untuak hiburan jo rekreasi, bantuak-bantuak kasenian iko punyo fungsi ritual, pandidikan, nasihaik, nan juo sabagai sarana untuak mampatahankan kasaimbangan jo struktur sosial masyarakaik. Di sampiang itu ado pulo bantuak kasenian sarupo tari Bines, tari Guel, tari Munalu, sebuku/pepongoten, guru didong, jo melengkan (seni bapidato manuruik adaik).

Urang Gayo mampunyoi sajumlah nilai budayo nan manjadi acuan baparilaku untuak mancapai iduik nan taratik, disiplin, kasatiakawanan, gotong royong, jo rajin (mutentu). Pangalaman nilai budayo iko dipacu dek suatu nilai nan disabuik bersikemelen, iyolah pasaingan nan tantang harago diri (mukemel). Nilai-nilai iko diwujuikkan dalam baragam aspek iduik, sarupo dalam bidang ekonomi, kasenian, badunsanak, jo pandidikan. Sumber dari nilai-nilai tasabuik adolah agamo Islam sarato adat satampek nan dianuik dek sadoalah urang Gayo.

Seni jo Tarian

• 
  Didong
• 
  Panari Saman
• 
  Tari Guel Gayo

• Didong
• Didong Niet
• Tari Saman
• Tari Bines
• Tari Guel
• Tari Munalu
• Tari Sining
• Tari Turun ku Aih Aunen
• Tari Resam Berume
• Tuah Kukur
• Melengkan
• Dabus

Makanan khas

• Masam Jaeng
• Gutel
• Lepat
• Pulut Bekuah
• Cecah
• Pengat
• Gegaloh

Galeri

• 
  Urang Gayo
• 
  Kampuang Gayo
• 
  Danau Lauik Tawar, Takengon (Aceh Tengah)

Bacoan Lanjuik

• Bowen, John Richard, 1991,"Sumatran Politics and Poetics : Gayo History, 1900-1989", New Haven : Yale University Press.
• Bowen, John Richard, 1993,"Return to Sender: A Muslim Discourse of Sorcery in a Relatively Egalitarian Society, the Gayo of Nothern Sumatra", in C. W. Watson and Roy Ellen (Eds.), Understanding Witchcraft and Sorcery in Southeast Asia, Honolulu-Hawaii: University of Hawaii Press.
• Bowen, John Richard, 1993, "Muslims Through Discourse : Religion and Ritual in Gayo Society", Princeton, N.J. : Princeton University Press.
• SNOUCK HURGRONJE, C., - Het Gajoland en zijne bewoners.
• Ibrahim, Mahmud, 2007, "Mujahid Dataran Tinggi Gayo", Yayasan Maqamammahmuda.
• Wiradyana, Ketut dan Setiawan, Taufiqurrahman, 2011, "Gayo Merangkai Identitas", Gudang Penerbit.

Pautan Lua

• (Indonesia) Gayo Linge Archived 2020-09-21 di Wayback Machine.
• (Indonesia) Pustaka Nad Archived 2007-11-23 di Wayback Machine.
• (Inggirih) Urang Gayo
• (Indonesia) Keni Gayo
• (Indonesia) Lintas Gayo
• (Inggirih) Video Gayo YouTube