Seni Pertunjukan Pantun

Seni Pertunjukan Pantun marupokan sabuah panampilan yang manjadikan pantun sabagai bahan pertunjukan nyo. Adopun SEni Partunjukan Pantun nan ado di Minangkabau antaro lain (1) Bailau (2) Saluang (3) Bagurau (4) Barombai (5) Bajoden (6) Batintin (7) ayuak (8) Pertunjukan Anak Mudo.

Bailau

Bailau pado mulonyo marupokan suatu uapacaro pambacoan mantra nan dipandu dek saurang pawang jo pandendang- pandendang nan tadiri dari kaum padusi na alah manikah. Upacaro ko bamukasuik untuak manangkok harimau di daerah bayang, Pasisia Selatan, Sumatera Barat. Dalam parkambangan salanjuiknyo, Bailau adolah seni partunjuakan dendang pantun dek sakalompok padusi diiriangi bunyi santakan korek api atau hantakan kaki basamo- samo disaratoi garakan kapalo jo badan.

Saluang

Saluang adolah seni musik jo lagu. Musiknyo barupo saluang alat musik ambuih, lagunyo barupo dendang. Saluang hanyo dimainkan dek laki- laki, karano norma adaik jo agamo islam. Saluang dipaartunjuakan di tampek- tampek tabukak katiko acara gadang atau baralek katiko malamnyo.

Bagurau

Bagurau adolah seni bapantun nana manggunokan aat musik sabagai pangiriang. Alat musik nan digunkan adolah saluang jo bansi. Bagurau pado mulonyoadolah seni pertunjukan rakyaik nan dimainan dek siapo sajo katiko waktu kosong sabagai hiburan sasudah karajo di sawah. Dalam pangambangan salanjuiknyo, bagurau di patunjuakan di muko urang banyak jo imbalan pitih. Ado sabuah group bagurau di Pasa Banto, Bukittinggi, banamo Luhak Saiyo.

Barombai

Barombai adolah seni pertunjukan dendang pantun di Koto Sungai Taratak, Kabupaten Sawahlunto- Sijunjuang. Seni mandendang pantun ko biasonyo dilakukan sakali satahun katiko urang mulai ka sawah untuak mailangan raso latiah. Barombai ko dilakukan dek padusi nan masih kuek bakarajo na tadiri dari 10- 20 urang. alaik musik nan digunoan dalam barombai adolah duo buah gandang ketek, anam buah talempong, jo duo buah gong nan barukuran sadang.

Bajoden

Bajoden adoalah seni babaleh pantun dek sakalompok remaja, pado wakatu istirahaik sahabih mangubalo taranak, manuai padi, atau katiko mancari kayu baka di utan. Bajoden ko barasal dari Gaduik, Kabupaten 50 Koto.

Batintin

Batintin adolah seni baleh pantun antaro sakalompok urang nnan dilakuan pado malam hari katiko manjago kaamanan kampuang, di daerah Jumango, Kecamatan Sungai Tarab, Kab. Tanah Datar.

Ayuak

Ayuak adolah seni tradisi babaleh pantun antaro sakalompok urang pado siang hari atau malam hari wakatu istirahaik sahabih manuai padi di sawah di daerah Tigo Koto , Kacamatan Rambatan, Kabupaten Tanah Datar. Ayuak biasonyo dimainan dek kaum padusi untuak manyampian raso cinto ka urang nan mandangaannyo.

Pertunjukan Anak Mudo

Pertunjukan anak mudo adolah seni pertunjukan sastra lisan barupo pantun nan mamakai alaik musik kecapi, saluang, rabano, harmoni jo talempong, d akhia paertunjukan beko ado tarian. Pertunjukan anak mudo ko ado di daerah Matur, Kabupaten Agam, tapeknyo di nagari Tigo Baleh nan Basa.