Sabuah Shehnai.

Sarunai (Serunai), atau disabuik juo pupuik sarunai, adolah namo alaik musik tiup nan dikana di Indonesia sabagai alaik musik tradisional masyarakaik Minang. Bagian unik dari sarunai adolah ujuangnyo nan mangambang, bafungsi untuak mampagadang volume suaro.

Latar balakangSuntiang

Asal mulo sarunai atau pupuik sarunai dipakiroan datang dari namo shehnai, alaik musik nan barasa dari Lembah Kashmir di dataran India Utara.[1] Alaik musik shehnai diduga marupoan pakambangan dari alaik musik pungi nan dipakai dalam musik para pemikat ular tradisional India.

Sasudah dikana lueh di dataran tinggi Minangkabau (kawasan Sumatra Barat kini), sarunai manjadi populer sabagai alaik musik tiup tradisional Minang. Alaik musik iko dikana marato di Sumatra Barat, tarutamo di bagian dataran tinggi sarupo di daerah Agam, Tanah Datar dan Lima Puluh Kota, dan juo di sapanjang pesisir pantai Sumatra Barat. Alaik musik iko sajak lamo alah dipopulerkan ka saluruah Indonesia dek para imigran dari Minang dan juo dikana sabagai alaik musik tradisional di Malaysia dan masyarakaik Banjar di Kalimantan jo namo nan samo.

KagunoanSuntiang

Pupuik sarunai biasanyo dimainkan dalam acara-acara adaik nan rami, sarupo upacara baralek, batagak penghulu, dan sabagainyo. Alaik musik iko biaso juo dimainkan sacaro bebas, baiak parorangan, katiko mamanen padi atau katiko bakarajo di ladang. Musik sarunai populer juo untuak mairiangi patunjukan pencak silat Minang. Dalam sabuah penampilan, sarunai dapek dimainkan sacaro surang dan dapek digabung jo alaik musik tradisional lainnyo, sarupo talempong, gandang, dan sebagainyo nan mambuek papaduan bunyi jo irama tradisional khas Minang.

Bantuak jo cara mambuekSuntiang

Bahan untuak mambuek sabuah pupuik sarunai tradisional Minang tadiri dari batang padi, kayu atau bambu, tanduak kabau atau daun karambia.

Bagian penata bunyi sarunai tabuek dari kayu capo ringkik atau dari bambu talang nan ukurannyo sagadang ibu jari tangan. Capo ringkik adolah sajinih tanaman perdu nan punyo lapisan kayu kareh namun mampunyoi bagian dalam nan lunak, sahinggo murah untuak dilubangi. Kayu nan panjangnyo 20 cm tasabuik diagia 4 lubang nan basalisiah jarak 2,5 cm, yang baguno mambuek beda tinggi rendah nada. Nada nan lazim pado alaik musik tradisional Minang tamasuk pupuik sarunai adolah nada pentatonis "do-re-mi-fa-sol".

Pupuik adolah bagian nan ditiup pado alaik musik sarunai, biasonyo tabuek dari kayu, bambu talang, atau batang padi tuo. Bagian iko disambungan dek bagian panyambuang nan baguno sabagai pangka pupuik tasabuik. Panjangnyo kiro-kiro 5 cm dan tabuek dari kayu kareh. Panyambuang iko dilubangi untuak saluran udaro tiup, yang basambuangan jo poros badan dan poros corong. Di bagian balakang, bagian panyambung iko babantuk corong, nan punyo diameter 2 cm.

Bagian corong adolah bagian ujuang sarunai nan dibantuak agak gadang sarupo ujuangnyo alaik musik trompet. Fungsi bagian iko adolah untuak mambuek kareh volume suaro. Bagian iko biasonyo tabuek dari kayu, tarutamo kayu gabus, dari tanduak kabau nan sacaro alamiah alah babantuak lancip mangambang, ataupun dari daun karambia nan dililikan. Panjangnyo kiro-kiro 10 hinggo 12 cm, dengan garih tangah 6 cm di bagian nan mangambang.

Dalam pambuatan sarunai tadapek spesifikasi nan bavariasi di tiok daerah. Bahkan ado jinih sarunai nan pangaturan nadanyo dilakuan jo caro manutuik dan mambukak pamukaan bagian corong.

Liek juoSuntiang

  • Taepyeongso, alaik musik sarupo sarunai dari Korea.

RujuakanSuntiang