Saik ajik

Saik ajik atau saik galamai adolah salah satu ukiran tradisional Minangkabau nan barasa dari bantuak galamai. Pola motif iko iolah balah katupek, sarupo jo galamai nan alah dipotong-potong. Motif saik galamai bafungsi untuak mamparancak takuluak atau salendang, baju kuruang, jo kodek.

Motif saik galamai nan maisih ruang motif kuciang lalok

Ajik atau galamai ko biasonyo disaik dulu sabalun dihidangan. Manyaiknyo pun indak sumbarang bantuak sajo, tapi babantuak malereang. Motif ukiran saik ajik ko manganduang arti parhatian nan panuah katiko bakarajo atau mahadoki bamacam-macam masalah. Motif ukiran ko juo marupoan caminan dari pamahaman masyarakaik Minangkabau, tapeknyo di Nagari Sumpur, kapado kato ampek nan biasonyo dipakai dalam bantuak istilah jo ungkapan pendek tapi punyo makna nan bakaik jo aturan-aturan. Contohnyo kato nan ampek.

Istilah kato nan ampek mangarah kapado aturan jo nilai adab dalam mangecek jo bagaua di tangah masyarakaik. Biapun istilah nan dipakai sangai pendek, tapi manganduang katantuan-katantuan nan harus dipakai satantang caro mangecek, baiak ka urang nan labiah gadang, ka nan ketek, ataupun nan samo gadang.

Patatah

Dikarek disusun nyato

Elok tampaknyo pandangan mato

Ukia tuturan tumpuan kasau

Balampih jo itiak pulang patang

Basalo jo tatandu manyasok bungo

Raginyo dama tirih bintang gumarau

Baitu tatah lataknyo ukia

Dalam barih cupak adat