SMA Negeri 1 Padang

SMA Negeri 1 Padang adolah salah satu sikolah manangah ateh (SMA) bastatus negeri nan talatak di Kelurahan Lolong Belanti, Kecamatan Padang Utara, Kota Padang, Sumatra Barat. Sikolah iko baalamaik di Jalan Belanti Raya No. 11, babarapo puluah meter ka arah barat dari Jalan Khatib Sulaiman, Padang. Sabalumnyo, sikolah iko baalamaik di Jalan Sudirman No. 1, tatapi kamudian direlokasi ka lokasi kini karano bangunan sikolah nan lamo rusak berat akibaik gempo bumi Sumatera Barat 2009. Gaduang sikolah nan baru dibangun di ateh lahan salueh 1,6 hektare pado 10 November 2009 dan salasai pado 7 Agustus 2010.

Sijarah

Cikal bakal tabantuaknyo sikolah iko bakaitan jo kabaradoan Paguruan Manangah Indonesia (Permindo) nan didirikan pado tahun 1949 dek tokoh-tokoh Republikein di Padang. Sabalumnyo, sikolah-sikolah di Padang masih manggunokan bahaso Balando sabagai bahaso panganta kecuali Madrasah Adabiyah, nan alah babahaso pangantar Indonesia. Dek karano itu pado tanggal 2 Mei 1949, babarapo tokoh Republikein tamasuak para guru mambuka sikolah Paguruan Manangah Indonesia di Padang nan batampek di bakeh gaduang Persatuan Guru Agama Islam (PGAI) di Jati, Padang Timur. Pado mulonyo Permindo dibagi manjadi anam kelas, maliputi tingkek SMP dan SMA. Maskipun barado di bawah pangawasan pamarintah Hindia Balando, kabaradoan Permido nan juo manggunokan bahaso Indonesia sabagai bahaso pangantar indak dipamasalahkan. Paro guru dan siswa Permindo bebas masuak dan kalua sikolah, bahkan tokoh-tokoh Republikein dibiarkan manyalanggarokan kagiatan-kagiatannyo di kompleks sikolah iko, saparti upacara paringatan proklamasi kemerdekaan Indonesia pado tahun 1949.

Gaduang

Gaduang SMA Negeri 1 Padang pado mulonyo marupokan bakeh gaduang Europeesche Lagere School (ELS), salah satu sikolah Balando di Padang nan talatak di Jalan Balantuang nan didirikan pado tahun 1917. Salain digunokan untuak tampek balaja ELS, gaduang sikolah iko sampek siliah baganti manjadi bamacam-macam tampek pandidikan, saparti sikolah Jagoka salamo panjajahan Japang, baliak manjadi gaduang ELS pado maso pajuangan kamerdekaan, dan tarakhia baru manjadi gaduang SMA Negeri 1 Padang. Maskipun alah tamasuak tuo, gaduang iko masih tatok batahan jo arsitektur aslinyo. Pado tahun 2008, katiko Drs. Jufril Siry, MM manjabek sabagai kapalo sikolah, gaduang iko direnovasi dek Balai Pelestarian Peninggalan Purbakala Batusangkar nan pamohonannyo alah disampaikan sajak tahun 2003.