Wyza Rahmi Febrimanita

Dikia Rabano

Dikia rabano iolah kesenian Minangkabau nan barasa dari nagari Simarasok, Kacamatan Baso, Agam. Dikia rabano marupoan tradisi dakwah lisan masyarakaik Minangkabau dalam dimensi agamo jo sosial. Kato “dikia” barasa dari bahaso Arab nan artinyo “dzikia”. Alaik musik, bahaso jo iramanyo indak pernah diubah-ubah. Latihan dikia rabano dilakuan sakali saminggu nan diadoan pas malam Jumaik. Caro latihan dikia rabano iolah maapa matannyo jo malatiah tangan untuak manokok rabano. Pamain dikia rabano ko hanyo dimainan dek laki-laki sajo. Alaik musik dikia rabano barupo rabano gadang. Jikok untuak nan padusi rabanonyo rabano ketek tapi itu ndak tamasuak ka dalam dikia rabano tapi nan dibaco nyo ndak jauah beda.

Sejarah

Sajarah dikia rabano bamulo dari buya canduang nan mandirian sakolah islam jo mangolah manjadi dzikia rabano. Awalnyo dikia rabano babahaso arab,kamudian buya Canduang manarjamahan ka bahaso Latin jo ka bahaso Minang. Dzikia rabano badiri mulai tahun 40-an tu bakambangnyo sacaro turun-tamurun sampai kini. Dikia rabano diolah indak untuak kesenian tradisional, tapi kesenian dikia rabano iolah kesenian nan barupo akidah, dzikia atau sajarah-sajarah Nabi Muhammad SAW mulai dari Aminah manikah jo Abdullah sampai lahia nyo Nabi Muhammad SAW jo maningganyo Nabi Muhammad SAW. Caro pawarisan dikia rabano iolah mamanggia anak-anak nan sudah tamaik SD jo anak-anak nan idak manginyam bangku sakolah untuak bakesenian minang, kamudian dibawok ka musajik dilatiah ciek-ciek mulai dari patamo dzikia. Dikia rabano diturunan kapado urang-urang nan tatarik kapado agamo. Dikia rabano idak ado unsua-unsua kesenian lain, tapi dikia rabano hanyo bahubungan jo agamo Islam samo saputa sajarah Nabi dari lahia sampai maningga.

Panampilan

Dikia rabano biasonyo diadoan katiko maulid Nabi, baralek, manaikan rumah jo khatam Quran. Dikia rabano durasinyo salamo sajam. Panampilannyo ado 7 sesi, Patamo "kato junjuangan" nan mancaritoan Nabi Adam basamo Hawa. Kaduo "ciek mukaluak", 'mukaluak' maksudnyo iolah manusia (makhluk). Katigo "Wahai sudaro dangalah madah", iolah sajarah antaro saudaro jo saudaro (dunsanak di Minangkabau). Kaampek "pado maso itu", mancaritoan tentang baa sejarah islam ko badiri. Kalimo "wahai sudaro sagalo urang", sajarahnyo iolah sado urang diajak untuak masuak islam atau ajakan untuak manganuik agamo Islam (dakwah). Kaanam "wakatu itu", sajarahnyo mancaritoan paparangan islam jo Israel. Katujuah "cukuiklah hamil", iolah kelahiran Nabi Muhammad SAW. Uniknyo dikia rabano bisa digunoan untuak arakan mangiriangan marapulai mangunjuangi rumah anak daro nan dilakuan pado patang hari. Badzikia dimulai katiko alah tibo di rumah sampai laruik malam.