Rumah Bolon

(Dialiahkan dari Rumah bolon)

Rumah Bolon (bahaso Batak: Jabu Bolon) adolah rumah adat urang Batak di Sumatera Utara, Indonesia. Rumah Bolon ko marupokan rumah nan bajinih pangguang nan tabuek dari kayu jo ditopang dek tunggak-tunggak kayu gadang. Atoknyo bajinih atok palano kudo jo ujuang pangkanyo marunciang nan indak samo panjang. Rumah ko dapek diuni duo inggo anam kaluarga.[1]

Kampuang Batak nan barumah Bolon

Rumah Bolon ko mampunyoi banyak ukiran pado dindiang-dindiangnyo. Ukiran ko disabuik jo istilah gorga. Gorga pado rumah nan asali atau lah tagak sajak saisuak biasonyo dironoi jo rono sirah, itam, jo putiah. Satiok gorga nan mahiasi dindiang Bolon mampunyoi mukasuik-mukasuiknyo surang. Samakin banyak gorga pado Rumah Bolon, biasonyo manunjuakkan status sosialnyo nan kayo di tangah panduduak. Pado maso daulu, rajo-rajo nan biaso barumah jo ukiran banyak.[2][3]

Manuruik carito, Rumah Bolon mulonyo diuni rajo-rajo Batak nan 13. Kini Rumah Bolon masih dapek ditamukan di sakaliliang Danau Toba. Namun di lua daerah tu indak banyak urang nan mambangun Rumah Bolon. Bahan pambuek rumahnyo pun kini lah sarik didapek sainggo pambangunan Rumah Bolon cukuik maha. Hanyo urang nan mampu sajo nan dapek mambangunnyo kini.[2][4]

Rumah adat Batak ado baragam jinihnyo. Rumah Bolon marupokan panyabutan untuak rumah adat Batak Toba jo Simalungun. Pado urang Mandailing jo Angkola biaso disabuik jo Bagas Godang. Pado urang Karo dinamokan Siwaluh Jabu.[4] Satiok rumah mampunyoi ciri khasnyo masing-masing.[4] Sayangnyo, rumah adat Batak kini jumlahnyo indak pulo banyak sainggo babarapo jinih sulik ditamukan.[4]

Caliak pulo suntiang

Rujuakan suntiang

  1. "Rumah Bolon, Rumah Adat Suku Batak - Semua Halaman - Bobo.Grid.ID". Bobo.ID (dalam bahasa Indonesia). Diakses tanggal 2019-11-02. 
  2. a b Media, Kompas Cyber. "Menengok "Ruma Bolon", Rumah Adat Batak Sarat Simbol". KOMPAS.com (dalam bahasa Indonesia). Diakses tanggal 2019-11-02. 
  3. Sinaga, K. R. (2018). Jabu Batak Toba (Studi Arsitektur Tradisional dan Etno Disain). Medan: Universitas Sumatera Utara
  4. a b c d "Rumah Bolon". Diarsipkan dari versi asli tanggal 2014-04-24. Diakses tanggal 15 Mei 2014.