Pasa Van der Capellen

Pasa Van der Capellen adolah sabuah tampek destinasi wisata kuliner sarato jo tampek patunjuakan seni tradisional nan ado di Batusangkar, Kabupaten Tanah datar, Sumatera Barat. Pasa iko di buek dalam bantuak pasa rakyat dengan nuansa nan tradisional jaman dulu. Aratinyo, pasa tasabuik mambuek pangunjuang saakan marasoan suasana pasa pado maso lampau dimano kasado panjua atau urang kadai mamakai pakaian tradisional Minangkabau.[1] Pasa iko manjua makanan jo minuman tradisional Minangkabau. Pamerintah Kabupaten Tanah Datar alah manatapkan pasa iko manjadi salah ciek destinasi wisata nan ado di Kabupaten Tanah Datar. Pasa Van der Capellen iko hanyo dibukak pado hari minggu mulai dari pukua 07.00 wib hinggo pukua 12.00 WIB.[2][3]

Lokasi pasaSuntiang

Pasa Van der Capellen barado di lingkuangan atau persis di halaman Benteng Van der Capellen nan barado di pusek Kota Batusangkar, Kabupaten Tanah Datar, Provinsi Sumatera Barat.[4] Pasa iko talatak di lahan nan agak tinggi di bandingan jo lahan nan ado di sakitarannyo karano barado di kawasan benteng nan di buek dek panjajah Balando pado maso daulu bia murah mamantau situasi dari katinggian. Untuak lokasi pasa Van der Capellen tasabuik dari pasa Batusangkar dapek di tampuah jo bajalan kaki karano lataknyo nan cukuik dakek dari pasa.[5]

SijarahSuntiang

Lingkuangan pasa iko dahulunyo adolah Benteng Van der Capellen nan marupoan salah ciek paninggalan bangunan cagar budaya nan ado di Batusangkar, Kabupaten Tanah Datar. Situs jo bangunan benteng tasabuik mampunyoi pajalanan sijarah nan panjang. Kabaradoan Benteng Van der Capellen indak talapeh dari peristiwa paparangan antaro kaum adaik malawan kaum agamo nan tajadi sakitar tahun 1821.[6] Hal iko ko tajadi karano adonyo patantangan kaum agamo nan dipelopori dek tigo urang Haji nan baru baliak dari Mekkah nan nio malakuan pamurnian ajaran agamo Islam.[7] Pado zaman panjajahan Balando, benteng Van der Capellen marupoan sabuah benteng patahanan nan di bangun dek Balando katiko masuak manjajah ka padalaman Sumatera Barat. Bangunan benteng patahanan nan dibangun pado tahun 1824 iko barupo bangunan nan mampunyoi taba dindiang 75 cm jo labiah kurang sapanjang 4 meter dari dindiang bangunan dibuek parik sarato jo tanggul patahanan nan malingka mangaliliangi bangunan.[8] Pado tahun 1960, bangunan benteng iko sarato lingkuangan sakitar nyo di jadian markas Kepolisian Resort Kabupaten Tanah Datar.[9] Kamudian pado maso kiniko kawasan jo lingkuangan benteng tasabuik di pakai dek Dinas Pariwisata, Pemuda dan Olahraga Kabupaten Tanah Datar.[10] Karano lingkuangan Benteng Van der Capellen nan cukuik lueh, mako Pamerintah Daerah jo Dinas Pariwisata mambuek sabuah pasa dengan konsep nan babeda sarato unik nan batujuan untuak manggerakkan sektor pariwisata dengan namo Pasa Van der Capellen.[11][12]

Kagiatan pasaSuntiang

Pasa Van der Capellen marupoan pasa nan batemakan nuasa tradisional jaman dahulu. Suasana pasa dibuek saolah-olah peristiwa transaksi jua bali yang tajadi pado maso lampau atau zaman sabalum kamardekaan di Sumatera Barat. Suasana tasabuik dapek diliek di lingkuangan pasa Van der Capellen. Partamo para panjua, para panjua di pasa Van der Capellen mamakai pakaian tradisional Minangkabau nan acok di pakai dek masyarakaik Minangkabau pado zamam dahulu. Untuak padusi manggunoan baju kuruang basiba sarato mamakai tingkuluak di ateh kapalo sabagai panutuik kapalo, sadangkan untuk para panjua laki-laki manggunoan baju guntiang cino sarato manggunoan deta di kapalo sabagai panutuik kapalo.[13][14] Para panjua nan mamakai jinih pakaian tradisional Minangkabau tasabuik mambuek suasana pasa saakan barado pado zaman dahulu. Palengkapan-palengkapan nan manunjang jua bali di pasa Van der Capellen iko juo di buek sacaro tradisional.[15]

Bangunan tampek para penjual nan manjajoan atau manjua makanan di buek jo bantuak sarupo jo kadai-kadai pado zaman dahulu. Kasado kadai dibangun jo manggunoan kayu nan di ikekan ciek samo lainnyo. Indak ado tampek atau kadai panjua di pasar Van der Capellen iko babantuak parmanen atau dibangun jo bahan dasar semen atau beton. Atok dari kadai para panjua di pasa iko juo indak tabuek dari bahan seng atau genteng. Atok-atok kadai tasabuik tabuek dari bahan rumbio sajinih dadaunan nan di jalin babarapo halai kamudian di satuan.[8] Kumpulan daun-daun rumbio tasabuik kamudian di susun rapek baderet di ateh bangunan kadai panjua bia dapek talinduang dari aia hujan jo paneh matohari. Salain itu, palengkapan panjua nan di pakai bajualan di pasar Van der Capellen iko juo manggunoan alaik-alaik tradisional sarupo kuali nan tabuek dari tanah liek nan baguno untuak manampuang kuah sate atau kuah gulai. Kuali nan tabuek dari tanah liek tasabuik marupoan tampek masak nan banyak di pakai katiko dahulu kala. Kuali tasabuik salain banilai estetis dapek juo mambuek cito raso atau punyo raso khas tasandiri.[16]

Alaik jua bali di pasa Van der Capellen iko manggunoan caro nan tradisional. Di pasa Van der Capellen indak dipabuliahan balanjo atau mambali makanan jo minuman jo manggunoan pitih. Alaik pambayaran nan sah di pasa Van der Capelin iko iolah barupo koin.[17] Koin tasabuik tabuek dari kayu nan mampunyoi cap jo stempel resmi pasa Van der Capellen. Koin tasabuik dapek dibali jo caro manukaan pitih kito ka bagian panukaan koin nan barado di mungko pintu masuak manuju pasa Van der Capelllen. Pihak panyalanggara akan maagiah informasi tata caro balanjo manggunoan koin tasabuik kapado pangujuang nan bakunjuang ka pasa Van der Capellen. Dengan babalanjo di pasa Van der Capellen iko manggunoan alaik tuka koin, mako hal tasabuik mambuek nuansa jaman dahulu akan taraso, dimano pado zaman dahulu alum ado pitih sabagai alaik tuka. Alaik tuka pado zaman dahulu yaitunyo barupo barter barang atau tuka manuka barang nan sanilai jo harago barang nan akan saliang ditukaan, dan kamudian mambali sabuah barang jo koin ameh, logam, atau perak. Ameh, logam, jo perak mampunyoi nilai nan cukuik tinggi sabagai alaik jua bali pado maso lalu.[18]

PariwisataSuntiang

Kagitan wisata nan dapek dilakuan di pasa Van der Capellen ko indak hanyo babalanjo makanan jo minuman sajo. Tadapek babagai kagiatan lain nan dapek dilakuan di pasa Van der Capellen. Sala ciek kagiatan nan ado di pasar Van der Capellen yaitunyo panampilan kagiatan seni tradisional minangkabau.[19] Pihak panyalanggaro pasa Van der Capellen biasonyo alah mampunyoi kagiatan seni patunjuakan apo nan akan di tampilan dari minggu ka minggu. Pnampilan seni tari tradisional acok tampil di pasa Van der Capellen nan batujuan untuak manghibur para pambali di pasa tasabuik.[20] Tari tadisional nan di tampilan dapek barupo tari piriang, tari galombang jo lainnyo, tari tasabuik diiriangi juo dek musik talempong jo gandang sabagai alaik musik tradisional Minangkabau.[21] Salain itu pangunjuang wisata pasa Van der Capellen dapek pulo mancubo permainan tradisional barupo egrang, dimano pangunjuang akan bajalan dengan manggunoan duo buah batuang nan dinaiakan jo kamudian bajalan manggunoan batang batuang tasabuik.[22]

RujuakanSuntiang

  1. "WAMEN ESDM NIAT BANTU KEMBANGKAN PASAR VAN DER CAPELLEN". Pemerintah Kabupaten Tanah Datar. 24 Februari 2019. 
  2. Mustika, Syanti. "Pasar Van der Capellen, Destinasi Hits Kuliner di Sumbar". detikTravel (dalam bahasa Indonesia). Diakses tanggal 2020-09-15. 
  3. Nanda Anggara (2018-10-14). "Pasar Van Der Capellen, Destinasi Digital Baru di Tanah Datar". GenPI News Indonesia (dalam bahasa Indonesia). Diakses tanggal 2020-09-15. 
  4. "Pasar Van Der Capellen, Destinasi Wisata Baru Tanah Datar". Berita Sumatra Barat Terkini (dalam bahasa Indonesia). 2020-03-03. Diakses tanggal 2020-09-15. 
  5. Suprapto. "Pasar Van Der Capellen". voinews.id (dalam bahasa Inggris). Diakses tanggal 2020-09-15. 
  6. "Dikirim ke Padang, Letkol Raaff Menyerang Padri dan Dirikan Benteng Van Der Capellen". Langgam.id (dalam bahasa Indonesia). 2019-12-08. Diakses tanggal 2020-09-15. 
  7. Caniago, Naali Sutan (2004). Naskah Tuanku Imam Bonjol. Padang: Pusat Pengkajian Islam dan Minangkabau. ISBN 9789793797052. 
  8. a b NEOLDY, YHOHANNES (November 23, 2013). "BENTENG "VAN DER CAPELLEN" YANG TERLUPAKAN". Diakses tanggal September 15, 2020.  Kutipan rusak: Tanda <ref> tidak sah; nama ":0" didefinisikan berulang dengan isi berbeda
  9. "Berita Polres Tanah Datar". polrestanahdatar.id. Diakses tanggal 2020-09-15. 
  10. "Skpd Pemerintah Kabupaten Tanah Datar". tanahdatar.go.id. Diakses tanggal 2020-09-15. 
  11. bpcbsumbar (2019-12-05). "Untaian Kisah Di Balik Benteng Van Der Cappelen". Balai Pelestarian Cagar Budaya Sumatera Barat (dalam bahasa Inggris). Diakses tanggal 2020-09-15. 
  12. "Keunikan Wisata Pasar Van Der Capellen di Tanah Datar". Republika Online (dalam bahasa Indonesia). 2020-02-02. Diakses tanggal 2020-09-15. 
  13. firdausmarbun (2019-06-14). "Baju Kurung Basiba: Cerminan Jati Diri Perempuan Minangkabau". Balai Pelestarian Nilai Budaya Sumatera Barat (dalam bahasa Inggris). Diakses tanggal 2020-09-15. 
  14. "Fungsi Tikuluak dan Deta bagi Masyarakat Minangkabau". Sumbarsatu (dalam bahasa Inggris). Diakses tanggal 2020-09-15. 
  15. JawaPos.com (2020-01-31). "Pasar Van Der Capellen, Nuansa Tempo Dulu di Ranah Minang". JawaPos.com (dalam bahasa Indonesia). Diakses tanggal 2020-09-15. 
  16. SabanaKaba, Admin. "Gerabah Galogandang Harapan Tanah Datar Juara Sumbar | SabanaKaba" (dalam bahasa Indonesia). Diakses tanggal 2020-09-15. 
  17. antaranews.com (2018-11-04). "Nuansa tempo dulu pasar Van Der Capellen". Antara News. Diakses tanggal 2020-09-15. 
  18. Agency, ANTARA News. "Pasar Van Der Capellen, destinasi wisata baru Tanah Datar berkonsep tempo dulu". Antara News Sumbar. Diakses tanggal 2020-09-15. 
  19. Nusantara, Solusi Sistem. "Pasar Digital Bernunsa Tempo Dulu di Tanah Datar | Gaya Hidup". www.gatra.com (dalam bahasa Inggris). Diakses tanggal 2020-09-16. 
  20. Media, Kompas Cyber. "Resmi Meluncur, Pasar Van Der Capellen Hadirkan Suasana Tempo Doeloe". KOMPAS.com (dalam bahasa Indonesia). Diakses tanggal 2020-09-16. 
  21. "KINTANI BIKIN SEMARAK PASAR VAN DER CAPELLEN". 31 Desember 2018. Diakses tanggal 16 September 2020. 
  22. "Serunya Libur Lebaran di Pasar Van der Capellen Tanah Datar". kumparan (dalam bahasa Indonesia). Diakses tanggal 2020-09-16.