Pangguno:Afdal Hasan/bak kasiak

Urang Sumando

Urang sumando adolah gala nan langsuang lakek ka marapulai Minangkabau katiko alah manikah. Manjadi urang sumando mambuek Marapulai harus bataratik iduik di rumah keluarga Anak Daro. Karano si laki-laki tingga di rumah keluarga padusi sabagai tamu, inyo indak buliah ikuik campua jo sagalo urusan nan adoh di rumah tu. Duduak tagak si laki-laki ko hanyo sampai pintu biliak inyo balaki-bini. Artinyo, inyo hanyo buliah maurus urusan inyo jo bininyo sajo. Salabiahnyo, apo sajo nan tajadi di keluarga pihak padusi, si laki-laki indak punyo hak untuak ikuik campua.

Di dalam adaik Minangkabau, katiko alek alah salasai, Marapulai dilapeh dek urang tuonyo untuak tingga di rumah keluarga anak daro. Katiko alah tingga di rumah keluarga anak daro, marapulai indak bisa sumbarang sajo dalam mangecek jo balaku. Karano di dalam rumah tu si marapulai/laki-laki ko indak hanyo manjadi laki atau minantu sajo, tapi inyo alah manjadi urang Sumando.

Jiko di rumah itu adoh nan bacakak dek mamparabuikan tanah atau adoh nan batangka mamparabuikan harato bando nan lainnyo, si laki-laki ko indak buliah ikuik campua. Inyo alah bisa mangecek katiko diminta pandapaik dek urang rumah. Sarupo nan dikatokan tadi, urang sumando hanyo buliah sampai pintu biliak, lewat dari itu jan cubo-cubo.

Macam-Macam Urang Sumando di Minangkabau

Adoh ampek macam urang sumando di Minangkabau. Apo sajo nan kaampeknyo tu?

Sumando Kacang Miang

         Sumando Kacang Miang adolah gala untuak laki atau minantu nan karajonyo mambuek masalah sajo di rumah keluarga bininyo, bahkan inyo bisa dikatokan aib nan mampaburuak namo keluarga bininyo di mato urang sakampuang.

Sumando Lapiak Buruak

         Sumando Lapiak Buruak dimukasuikkan untuak laki atau minantu nan sabana pamaleh, indak nio mancari pitih untuak keluarganyo. Karajonyo duduak-duduak ka kadai sajo. Ibaraik lapiak buruak, indak tapakai di keluarga bininyo. Mampabarek beban keluarga bininyo sajo.

Sumando Langau Ijau

         Sumando Langau Ijau disabuik untuak laki atau minantu nan hanyo pandai baranak sajo tapi indak nio batangguang jawek. Bahkan banyak kasus dimano laki maninggaan bininyo katiko sadang manganduang untuak mangaja padusi lain.

Sumando Niniak Mamak

         Ikolah sumando nan rancak. Inyo pandai manampekan dirinyo sabagai Urang Sumando di rumah keluarga bininyo. Inyo pandai mancari pitih, inyo pandai bagaua di kampuang. Ikolah caminan baa sapatuiknyo urang Sumando di Minangkabau.