Pandai basi

Pandai basi adolah karajinan tradisional urang Minangkabau nan tingga di Sumatera Barat. Kususnyo di Nagari Sungai Pua, Kabupaten Agam atau Luhak Agam, labiah tapeknyo talatak dibagian Barat Gunuang Marapi atau sekitar 10 Kilometer dari Kota Bukiktinggi ka arah Gunuang Marapi.

kerajinan pandai besi di sungai pua Kab.Agam

Karajinan pandai basi iko marupokan proses pangolahan bahan baku basi manjadi babagai pakakeh rumah tango jo alat pertanian, contohnyo sabik, pangkua, pisau, ladiang, kapak, dan lain sabagainyo. Kaahlian dalam pambuekan karajian iko, didapek oleh masyarakaik sacaro turun - temurun dari generasi ka generasi.

Sijarah

Kerajinan pandai basi di Nagari Sungai Pua alah ado samanjak zaman penjajahan Balando, dibuktikan karano nagari iko marupokan daerah pamasok piluru pado maso panjajahan dulu.

Pado tahun 1977 - 1985, industri kerajian pandai basi ko, mengalami maso kejayaannyo, hal iko dikaranokan pado maso itu, biaya produksi yang dikaluakan sabandiang jo harago panjualan.

Dahulu pengrajin basi marupokan karajo yang manjanjikan di nagari iko, namun pado maso kini masyarakaik kurang tatarik manjadi pengrajin basi. Tarutamo generasi mudo yang labiah tatarik untuak pai marantau jo mangaleh, karano manjadi pangrajin basi indak manjamin hiduik di kamudian hari.

caro mambuek

Proses pambuatan kerajian iko dilakukan masyarakaik sacaro tradisional, nan partamo mamiliah bahan baku basi dan manantuan alaik nan akan dibuek. Salanjuiknyo mamanggang batu baro ditungku pambakaran, satalah batu baro dipanggang, salanjuiknyo manapo basi. Manapo ko adolah proses mambantuak basi manjadi barang yang diinginkan dengan manggunoan basi tapo atau martil. Manapo dikarajoan pado saat basi sadang angek-angeknyo bawarna merah tarang, siap manapo dikarajoan pengrajin manyapuah basi. Manyapuah adolah proses pamadekan atau pambarian efek kareh pado material basi, sahinggo pado saat panggunoanyo basi dapek tahan lamo dan indak mudah patah, manyapuah dikarajoan jo caro mamanggang ulang basi yang alah ditapo, salanjuiknyo basi nan alah angek tadi, dimasuakan ka dalam aia dingin/oli, pandinginan ikolah nan mambuek basi labiah kareh. Langkah proses salanjuiknyo manggarinda, manggarinda batujuan untuak mampaaluih bahagian-bahagian yang kasa pado basi yang alah dibantuak tadi, atau marapian bahagian yang kurang barasiah pado basi. Tahap panyalasaian iyolah maasah, maasah adolah proses panajaman.

Kagunoan

Hasil dari kerajian pandai basi yang alah salasai proses karajonyo, selain digunokan untuak kaladang jo kaparak, juo dijua oleh masyarakaik ka pasa-pasa tradisional, contonyo pasa Bukiktinggi, Payokumbuah bahkan sampai ka Riau jo Medan.

Rujuan

Armila, M.T. 2018. Pentingnya Palu Tempa Pengarajin Pandai Besi sungai Puar Mulai Sunyi.Rang Teknik journal. Vol 1. No.2